[المدودي]

عشره ايام ونحن في صوعه ولوحه .. وريت نحن ضوينا بشي فايده
وجينا عليهن .. ! وكأن الأرض انشقّت وصرطتهن ..

دوّرنا في كل مكان .. ولعاد خلينا حدبه
لدرجة ان نحن حطينا أعلان في إذاعة سيؤن وذلحين الثاني هنا في السقيفة .. لعل وعسى ان حد من الحلان أو غيرهم يلقّي مرقعيّه ويرد لنا نابي عنهن .. !

هلك نفسه .. وهلك نحن معه .. !


الله يهدي بو عامر

كل مره يوم يجي من ابوظبي يلقي لبونا خازوق .. ويحنبنا معه ..

ونا ذلاّ يوم انا ما اسخى به .. ولاّ هو يستاهل ـ شوي ـ
يوم نشوفه ليّام ذي مصوري .. وفي حاله كشفه .. والله انه يوجع قلبي

يا ما قلت له : يا بو عامر .. آه بغيت بالهتفه .. خل كلّين في حاله .. كل قرصك ودخل خلصك .. بس قدكم داريين به .. إنسان عَمِي لا يسمع ولا يرجع .. وان حد كارزه اعتمس ولعاد يصوّر لي قدامه

المره ذي من يوم جاء من السفر وهو لا قد جلسنا على التكّه بعد صلاة المغرب .. تشوفه يتماوس ويحقّط ضروسه ..

* : يا بو عامر حاول تهدا .. طرحها بشيش .
بو عامر : آه بشيش .. ذولا ناس يطلعون للواحد الضغط ويخلونها تزنقر للغور
* : انت تحب تحر على قلّها .. آه لقوا بك الناس .؟
بو عامر : وراك .. من يصبحون وهم يسعننون في المطاريق .. ويهربدون في السواقي والعدين .. ويقوشون الشوارع برجيلهم .. وما شاء الله قدك عارف شوارعنا نظيفه .. إلا من القمائم والأوساخ .
* طيب .. خلهم .. ليش هم يهربدون فوق كورك ؟؟
بو عامر : أنا ما انا من شي .. بس اللي يحوش بي انهم لا حل الصلاة يدخلون المسجد .. ويدخّلون حذيهم معهم وهي ملانه وضر وبعر .. ولا بعدين قالوا يالله بغينا الحريم يلقّين مبادره وييحشن المسجد
* : وليش دخول الحذي للمسجد حرام ؟
بو عامر : ما هو من حرام ولا حلال .. المسأله احترام للمسجد .. إتحداك ان بعضهم لا قده ديخل الدار حقه يحط الحذي في الحوش وما يدخلهن الضيقه من الوسخ .. ولا قده المسجد ما هو فا كر بشي .. والمشكله انك انت عادك واحد منهم لي يطلعون الضغط
* : ما انا الا فزعان لا حد يسرقهن ..
بو عامر : لك سبع راعات .. معك حذي زنّوبه مشكّفات بالمسامير وخيوط السلب .. من يوم نحزر وانت لا بسهن .. وهومن ذا اللي با يسرق حذيك ؟
انا معي حذي ظبياني ( المسلول ) بميتين درهم .. بقيمة ملى جونيّه كما لي معك ولا بدا دخلتهن المسجد ..
* : وانت آه لي حرق رزّك .. خلّنا .. كلن يشوف زنوبته ظبياني ..!
بو عامر : با خلّيك .. بس لعلمك .. بعد صلاة العشاء با قوم بالقّي كلمه .. ومن لا عجبه كلامي يشرب من البحر .
* : با نشوفك يا ذا الرجال الصلاة با تقوم بعد خمس دقايق .. ومنك بو عامر قم تكلم على الحذي .. يا بو عويمر
بو عامر : أفا عليك .. وانا اتحدّاك وبا قوم على خزاك ..;fl



وقمنا للصلاة .. وبو عامر لقّى حِيّة من لا يعرف .. وقام بعد الصلاة

بو عامر : يا مصلين .. شو ذا سالف عيف ..
ــ
ــ
ــ
ــ
ــ

وبو عامر طوّل في المواضعه حقه .. والناس يضروا وتمارشوا من المسجد .. وانا مرشت نفسي كماهم لا التكّه ..< معاد معي وجه يقابل , بو عامر زاد علي .. وبا يجي با يتخزّل بي >

وتمّيت مساهنه

وبو عامر ما طاع يجي
و اشتغبت عليه .. غير ما تلابش هو وحد .. وقمت بدرا به
ــ
ــ
ــ
ــ
ــ
ــ
ــ
ــ
ــ
ــ
ــ
ــ

< بو عامر قيم فوق العصبي ومزرم >
* : كنك مقتر كما الضانه لي كلت باغه .. ؟؟
بو عامر : حذيي الظبياني .. ؟؟؟؟؟؟؟؟؟
* : خير انشاء الله
بو عامر : معاد حصلتهن ;fl
* خير انشاء الله ...

[الشبامي]

اضحك الله سنّك يالمدودي
وينك يارجل ووين بوعامر؟
يااخي تبغا كلامي ليش ماتنشر حلقات بأسلوبك المميز هذاعن قفشات بوعامر ورحلات بوعامر وماجرى مع بوعامر
صدقنا الفكره جيده وباتكون احلى بأسلوبك الظريف والأدبي الرائع
وشفك ذكرتنا بشيخنا الجليل شيخ القبايل اللي له مدّه ماظهر والظاره جرابه ملان هذيف هذه المره

[المدودي]

هي فكره
بس إنشاء الله ربنا يوفقنا على ذلك


تحياتي المدوديه

[بن صران]

سلمت وعفيت يامدودي
وعلى حسابي حذي ضبياني وزقل بالحذي المشكفات بالمسامير وخيوط السلب
وشكراً إرفاق صورة رجييل بوعامر الحافيات وياريت ترفق صور للضانة لي صرطت باغة

[الشعف]

جزاك الله خير يالمدودي عالموضوع لانه بصراحة انتشرت ظاهرة سرقة الحذي في المساجد في الآونة الاخيرة ... مما ادى الى نفور المصلين من بعضها خوفاً على احذيتهم .. وان دخلوا يصلون ؟؟ يصلون و حسوسهم عند حذيهم ماهم داريين الامام صلى اربع والا خمس ,,,










وياما نزلنا حافيين ومقهورين على حذينا ... انشاء الله حذي "قرشط" المهم الواحد مايسخى بحذية ويشوفهن احسن حذي في العالم ==>( القرد في عين امه غزال ),,,

الله يستر على حذينا وحذيكم وحذي جميع المسلمين

[المدودي]

بن صران جات منك
وشفنا حذفت بالزنّوبه ومساهن الضبياني .. وانشاء الله يكنن ماركة ( المطراش ) ومقاس 47,98 و إيطالي لازم ..

وعادك بتّل كاني فنص بو عسكري , و شال كشميري من شان العيد , وبتّل عودين دخون , و كرف معسّله , وووووو


ملاحظة :- صورة الضانه لي كلت باغه با تصلك نهار نستلم الحذي واللي وصيتك فيه !

ـــــــــــــــــــــــــــــــــــــــــ

بو شعفان
وينك ..كنك معاد لك حس من فتره .. غير مانت كمانا تدور على حذيك ؟؟


لا تتعب نفس شفنا شفت حذيك عند الجابيه النيديه ... سرع شلهن قبل ما حد يبعدهن من مكانهن


و انتبه في الصلاة لا تنسى شي ركعه




تحياتي المدوديه ..