[المدودي]

بن حسين : نص خمده .. بوّاق وعنتري زياده

جابر : لِهده .. ما يقدر حتى ينش الذباب لو برّح على عينه .. معتمد في ملمّاته على صهره بن هكسان ( قبيلي بطران )

جابر وبن حسين .. كما الجان والثوم .. واللي بينهم ماهو من امس ولا قبل امس .. ذا من سنين ومنين ..

شيبانهم كان كل واحد بذبره .. يسنون عا بير وحده .. وبين ذبر ذا <....> وذبر ذاك صعيه ... لا غير

كبروا العيال .. ماتوا الشيبان ;baw .. دخل بينهم الشيطان .. تعالقوا عا البير .. ووقع كسر راس عند المقود .. فرعوهم الناس ... كل واحد استقل بذبره وحفر له بير خاصه ... والأمن استتب

ذاك اليوم ... في صيف ما قبل كم سنين .. بن حسين غرّا عياله , قالهم : فرصه عيال جابر با يصيّفون في مسبح قصر القبّه .. روحوا انتم تغسلوا في حوضهم ولا تقصرون ..

ما حد يعطي المغروم نضف ..

هت يا تطامير ...وخذ يا تقافيز في حوض جابر
الطلع نقّفوه ...
القضب هرّشوه ..
علوب الدوم وحذّفوها ..
القحازيز وفقّشوها ...

ولعاد خلّوا في المزرعه عتم يسقي مطيره ..
حتى الغوى لي تفزّع الطيور غرّموا بها وفزّعوها وخلّوا قلبها طق بين رجيلها ــــــ> (رغم انها بلا قلب ورجيل )

جابر يوم وصله الخبر وهو في قصر القبه ما استانس يجي .. ووصّى لصهره بن هكسان من شان يبدّي نقاه من بن حسين

الناس ماحد وقف مع بن حسين .. لانه ما هو سوى الجار يطمر ظلم عا جاره ..

وما قصّر بن هكسان .. شل حق جابر .. وشل له شق .. ولا سيب لي حضروا معه شلّوا لهم وبالزايد ... وهلكوا بن حسين .. وهلكت زراعته معه ..

القضب لي كان يكسر به السوق .. الغنم معاد قنعن به ..
النخل لي صيطه رافع معاد حد قنمه .. والتمر لي فيه غبّر وحشّف

وما استفاد بن حسين من غورته عا بير جابر غير الجوع والصدوع ;baw



هذي الأيام .. بن هكسان ما مع ابوه حاجه .. وقلّة الحاجه مضرّه .. قبيلي النحس كرفت عياله ونزلوا في شحنة ثلاثه استاوتات وزفّة عربية زحّافه ... وقربع في مزرعة جابر .. وديخلين عا صعيه بن حسين

بن حسين يوم شافهم جا قداهم حوشان معه قدومه .. وعا طريقه طرّب على عياله .. وجاوا حد معه قُصم , وحد مطي , و الثاني مثمر و الثالث شريم ..

بن حسين : ;fl آه مع امك يا بن هكسان انت وخس الجلب لي جبتهم معك ؟;fl ( لسانه خامه )
بن هكسان : بلا هربده ..القصد با ختصار بغيناك تشل قشّك وتحمّل من البير .. معنا حرّاث غيرك واحسن منّك ..
بن حسين : وآه لمّك دخل .. حد قال اننا ورثت البير من حبابتك . ؟
بن هكسان : البير انت ما تستحقّها .. وعيالك ما يحبّونك
بن حسين : لك حبّة نقط في خر .. ـك .. ذلاّ ذي الهذوه لي معك ؟
بن هكسان : ما هو كذا وبس .. فاطن يوم بهذلت ببير صهري جابر قبل كم سنين ؟
بن حسين : الكلام ذا وعرفناه .. وكل بير قد شربت ماها ..
بن هكسان : عيال اختك انت لي تشجعهم .. قبل عام ونص قاموا يترزّحون فوق عروش الغنم حقّي لمّان خسّوا السقف و هروسوا الغنمان لي وسطها ورشنوا فيها ...
بن حسين : عاد شي معك يا ود المكلوله .. ولاّ سرح من هنا قبل ما تشوف امك عروس .. وتنسى هجمات عروش الغنم ولعاد تتذكّرهن ;fl
بن هكسان : غنمان الخلق مرضتهن بـالرضيح لي تعطيهم ايّاه .. والقضب لي ملقيه سبار ما هو صحّي ولا هو على حسب النظم والقوانين لي سنّتها هيئة الغنم الدوليه ( غين . إن ) مرشوش بدواء الحلّه وبعضه به شُمام .. وعادنا سمعت خبر يقين من واحد عبر عند لي شاف جار حبابة خال ود عم الحرّاث لي سمع انّك با تستخدم بودرة الجمره الخبيثه في صرع المسيبلي القادم ..
وذلاّ شف نحن رحمناك .. وما اتهمناك لا انت ولا عيال اختك في انفجار مستودع الصليط الحارق لي وقّع البارح .. و بيتت الدخاخين تعكبش منه لمان الفجر .. وذلحين شفنا جبت العيال وحسب ما تشوف مسلّحين .. ذا معه بلجيك .. وذاك هطفه .. وذا عيلمان .. و لخري معه قصف والثاني بو مغر .. والفسل فيهم معه بو فتيله .. ولا با تنفعك الشرم والمثامر لي مع عيالك .. ولعلمك شف ما حد با ينفعك من الجيران ..
خرج من البير بكل هدوء وسكينه ولا تلقي لنا شاقي باقي .. ونضمن لك ان نحن با نلقّي لك خشّه تبيع فيها شبس و سمبوسه من شان تضف حق لقمتك ...
وانت بكيفك .. آه قلت ؟؟ .......... و أيش رايك


وذلحين بن حسين يرقل وجيرانه يتفرجون وجابر وعياله حد في قصر القبّه وحد في بن هلابي .. وبن هكسان مخيم في ثلاثه ارباع مزرعة جابر

والبقيّه في نشرة الاخبار

[الشبامي]

والله ياخوي المدودي ماالمره ذي شفها ماهي كما الاوله
والظاهر بايقع لبن هكسان ياعبيد لقّط الغاسي
المرّه الأوله ظلم جاره وولد عمّه اللّهده جابر ووقع له مريحنّ ماالمره ذي بن هكسان ظلم وتجبر ومثامر بن حسين شفها باتلقي شي والله يكون يكون في عون عيال بن حسين;baw
ولاتنسى بن محمد لي قاعد ينتظر عساه بس يبخ من الفليت على وجه بن هكسان وجماعته

[بن صران]

سلام الله على لي يعرفون الحق

ونحن ندعي معك يا شبامي إن بن هكسان تقع له غصّه ما كماها
لكن ما دام عيال عم بن حسين كل واحد من ذلحين مقرب حذيه وثوبه القصير وشاد على حماره بغى با يشرد أشوف الأمر صعب با يقع على بن حسين

لكن الأمل مثل ما قلت في بن محمد ومن مثله وهم كثير إن شاء الله
وكيه معي با ندعي ( ولا معنا أفضل من الدعاء ) على بن مبارك وبن صالح وبن .... وبن ..... الى آخر القائمه من الأبناء لي ما يهشون ولا ينشون .... أن تتكسر عروشهم وينطلقن أغنامهم في مراعي ربي بحريه وعزت نفس

وألف شكر يا مدودي

[الشعف]

ياحيا بالمدودي .. لي طول غيباته علينا .. شكلك رحت تفرع بينهم والا شي .

بس المصيبة ان الجماعة كذ تلابشوا وكلين ماسك رقبة الثاني وقالوا يوم الجمعة ان ماعطف بن حسين هو وعياله .. لايلوم الا نفسه;baw ..

الله يقلع بن هكسان او نكسان ... ليهو نكسها على راسها .. ونوى على خرابها ... بس وين بايروح ان كانه تكبر وتجبر وحس ان ماحد قده ولا عليه بايقدر ... قولوا له عاد فوقك جبار متكبر .. بايقلبها عليك فوق تحت ... وكذ سبرت تتقلب والحمدلله اول امس هزة ناشت القاع ولحقت بعدها قرحه في غيلة السليط ورشنت نار مابعدها نار ... لك الحمد ياجبار ... واللهم زيدها وبارك ... عليهم عليهم .

وكله سبايبها جابر وقرابيعه لي هم قاعدين ينكشون في الدفاتر الدويلة لي كذ ضاعت من سنين ... حتى البعير زادوا عليه في الحقد لبوهم حقطه .. الله يهديهم .. لان النطش بايقع قديهم ان نطشت بقعه .. وبصر ابوهم بعدين يبقطون سلحتهم .. لعاد باتنفعهم لاقبة ولا قصر .. لا كذ جنازتهم بعد صلاة العصر

بارك فيك يالمدودي ... ودع ونحن باندعي ان ربنا يدفع البلا والشحن ويطفي نار الفتن .. ويحرق بالنار من جابها او رشن .

تحياتي,,,
الشعف

[المدودي]

مرحيب باللي مرّوا على الهدّه

مشرفنا الشبامي
بن محمد بن عوض كذه ما يقصر وكبادهم متدايعه منّه
وكل ساعه عطا ابوهم نوشه خلتهم يتناوشون في المعابير

ـــــــــــــــــــــــــ

بن صرّان
وينك تغمز علينا وتدبّر .. بغينا با نشوفك على راضه

وان شاء الله بن هكسان ما يشوف الغصه وبس ... انشاء الله تتمسك به وتقع له غنصه بعيد وصفها ..


وخلنا شوفك على راضه

ـــــــــــــــــــــــ

الشعف
ربنا يسمع دعاك .. و يفك علينا من الطبانه كلهم ومن عا النهج ذاك ..

و الهزّه لي ناشت القاع .. الحمد لله ما غربقوا حد فيها ولا با يروح فيها كل من معه ميفى ودافور

ربّك ستر



تحياتي المدوديه