المدودي
11-25-2002, 03:20 PM
قولوا الحمد لله على السلامة
قريب أسبوع مرطوس بي في الدار وماحد نشد ولا تخبرعلي
با قولكم السبب :
عزكم الله قبل اسبوع ضويت من السوق وجبت معي غرشه شراب .. شراب وارد ( يونايتد كنج دم ) ـ أصلاً نحن كل سنة نجيب ( تانج ) بس طلع شركة أمريكية .. و( قالوا ) لازم نقاطعها .. وقدر الله قاطعناها رغم ان طعمه زين .!
المهم .. قلت لاهل الدار لقّوا لنا نص طنق ـ بالدي ـ منه الشراب ذا وقربوه مع الفطار ... وما قصروا .. بعد ما أذن كلت لي تمرات وقلت على الطنق وكعتت لي ربع فيه .. وعندي نيه نغلّقه كله بس يوم قامت الصلاة قلعته ورحت للمسجد
قبل الصلاة كنت ريّض .. بس في الركعة الثانية حسيت بقعه تتماوس في شواتي .. ويالله تخلص الصلاة وخبّه على الدار ـ ثلاثه مساقط في الطريق شُوي ! ـ وبسرعة للطهاره ـ WC الله يعزّكم ـ وطحست عند الباب بس في النهاية وصلت للـ ..
عشر دقائق وما طرّقت الشوى .. خرجت ..عادنا الا جلست .. رجعت الحاله .. رجعت دخلت .. خرجت .. دخلت ..خرجت .. دخلت .. لمان كذ دحقت رجلي علمت عند المردم حق WC
في النهاية قررت الإعتكان في WC ما دمت فيه .. وأمري لله تعالى .. جات الكاميرا الخفية .. وغلّق حق كشكوش .. وانا مكاني معكون وماشي فايده
الوجع كلما يزيد
خرجت وقلت لخوي محمد : رح قدا بو حمدي ـ صاحب صيدلية ـ وقله تجمّل بغينا نص درزن ( فوار فروت ) .. الباين انه (حَيز ) قده دايم يجينا في رمضان ..!
وما قصر بو حمدي قام من فوق الشربه .. وعطا محمد الفوار.. وكثبت ثلاثه منه في الدن وقلت منه حيز ؟؟ بايقتله الفوار..
لا انقتل .. ولا هم يحزنون ..!
مكان الحاله هي ذيك هي .. محمد : رح قدا بو حمدي خلّه يعطيك ( ريني ) ولا ( أسيكون ) ولا (ترايسيل ) ولا أي دوا حق حموضة .. وبسرعه
شربت الحبوب .. وماشي فايده
محمد : جب دوا الحوشه اللي يقع ( أفومين ) , (بلاسيل ) ... خر بسرعه شفنا بانفقش من الوجع .
ما شي تحسن .. والباين ان يومي قرب
محمد : (فولتارين ) , ( باسكوبان ) أي شي ضد الماغص هته .. وخف نفسك ..
محمد : هت ( بندول ) , ( باراسيتامول ) , ( أسبرين ) , (سيدرجين ) , شل السيارة ونقف الصيدلية كلها ... لحقنا شف الوجع بايوخذنا ..
وزاد علي الوجع كذنا نصيح ونغفل .. وربشت أهل الدار .. و جاوا الجيران..
بو هادي ـ جاري ـ قال : شفه ( حالب) .. وبا نفحس العرق ..؟
* فحسوه ..!
فحسوا العرق ..و الوجع ما خف .
بو هادي : آخر طب الكي .. بغيت لك كيّه في العرقوب بشريم أعوج حق حداد ..اه قلت باتكوي ؟
* في العرقوب ولا حتى في النغاه .. كو وخارجنا..
كويت وعويت .. والليل كله وانا اتمحلل من الوجع : لك الحمد يا رب .. كل الأدويه جربناها .. وماحد غيرك يفرج على عبده .. فرجها يا رب
ومن غبوشة الله .. سرحنا لمان المستشفى فحصنا البول والمخروج و الدم والسكري وسوينا خمسه وسبعين كشفيه ورحنا قد الباطني ..
ـــ أيش عندك ؟
* دار .. سيارة ..غـ...
ـــ أيش بك ؟
* آه ... مغص ونغص من البارح .
ـــ كلت شي مقلوب ؟
* كما هواه ؟
ـــ حاجة عادك ما بدا كلتها من يوم دخل رمضان ؟
* والله .. ماشي جديد .. الفلاح كما كل يوم .. الفطار كما كل ليله .. نعم !
ما خلاف الشراب اللي هو جديد على الفطار.!
ـــ بس أكيد هو
* ليه شي شراب طلع في الكشفيه ؟؟
ـــ طلع عندك ( بيوسننج )
* و أه يعني الكلام ذا ؟
ـــ تسمم ..
* ولا خنّه من الشراب ؟؟ ما هو معقول ..! شراب Made in UK مش أي شراب
القصد .. عطانا زنبيل دوا ... وأول ما وصلت للدار قلت لهم هاتوا الغرشه حق الشراب با شوفها
جابوها
قلّبتها
* محمد : عكن الشراب اللي في الغرشه في WC
ــــ ليش
الشراب خايس حسف يومه من حق برع
الله يقلع ( حق برع ) وما جا نحن من آل برع وقدها مقاله سابقه :
من قوته على الجيران ـ أو بالأصح عيال الربحان ـ عِد به يكزم ومصيره يسقم
وبصراحه الباين أنه لازم نقاطع بضايعهم ولا نصطقر بالدعايه اللي مسوينها لها .... و اللي عندنا يكفينا ويغنينا
قاطعوهم .. ولا بايقع لكم كماي
وما تشوفون شر إنشاء الله
قريب أسبوع مرطوس بي في الدار وماحد نشد ولا تخبرعلي
با قولكم السبب :
عزكم الله قبل اسبوع ضويت من السوق وجبت معي غرشه شراب .. شراب وارد ( يونايتد كنج دم ) ـ أصلاً نحن كل سنة نجيب ( تانج ) بس طلع شركة أمريكية .. و( قالوا ) لازم نقاطعها .. وقدر الله قاطعناها رغم ان طعمه زين .!
المهم .. قلت لاهل الدار لقّوا لنا نص طنق ـ بالدي ـ منه الشراب ذا وقربوه مع الفطار ... وما قصروا .. بعد ما أذن كلت لي تمرات وقلت على الطنق وكعتت لي ربع فيه .. وعندي نيه نغلّقه كله بس يوم قامت الصلاة قلعته ورحت للمسجد
قبل الصلاة كنت ريّض .. بس في الركعة الثانية حسيت بقعه تتماوس في شواتي .. ويالله تخلص الصلاة وخبّه على الدار ـ ثلاثه مساقط في الطريق شُوي ! ـ وبسرعة للطهاره ـ WC الله يعزّكم ـ وطحست عند الباب بس في النهاية وصلت للـ ..
عشر دقائق وما طرّقت الشوى .. خرجت ..عادنا الا جلست .. رجعت الحاله .. رجعت دخلت .. خرجت .. دخلت ..خرجت .. دخلت .. لمان كذ دحقت رجلي علمت عند المردم حق WC
في النهاية قررت الإعتكان في WC ما دمت فيه .. وأمري لله تعالى .. جات الكاميرا الخفية .. وغلّق حق كشكوش .. وانا مكاني معكون وماشي فايده
الوجع كلما يزيد
خرجت وقلت لخوي محمد : رح قدا بو حمدي ـ صاحب صيدلية ـ وقله تجمّل بغينا نص درزن ( فوار فروت ) .. الباين انه (حَيز ) قده دايم يجينا في رمضان ..!
وما قصر بو حمدي قام من فوق الشربه .. وعطا محمد الفوار.. وكثبت ثلاثه منه في الدن وقلت منه حيز ؟؟ بايقتله الفوار..
لا انقتل .. ولا هم يحزنون ..!
مكان الحاله هي ذيك هي .. محمد : رح قدا بو حمدي خلّه يعطيك ( ريني ) ولا ( أسيكون ) ولا (ترايسيل ) ولا أي دوا حق حموضة .. وبسرعه
شربت الحبوب .. وماشي فايده
محمد : جب دوا الحوشه اللي يقع ( أفومين ) , (بلاسيل ) ... خر بسرعه شفنا بانفقش من الوجع .
ما شي تحسن .. والباين ان يومي قرب
محمد : (فولتارين ) , ( باسكوبان ) أي شي ضد الماغص هته .. وخف نفسك ..
محمد : هت ( بندول ) , ( باراسيتامول ) , ( أسبرين ) , (سيدرجين ) , شل السيارة ونقف الصيدلية كلها ... لحقنا شف الوجع بايوخذنا ..
وزاد علي الوجع كذنا نصيح ونغفل .. وربشت أهل الدار .. و جاوا الجيران..
بو هادي ـ جاري ـ قال : شفه ( حالب) .. وبا نفحس العرق ..؟
* فحسوه ..!
فحسوا العرق ..و الوجع ما خف .
بو هادي : آخر طب الكي .. بغيت لك كيّه في العرقوب بشريم أعوج حق حداد ..اه قلت باتكوي ؟
* في العرقوب ولا حتى في النغاه .. كو وخارجنا..
كويت وعويت .. والليل كله وانا اتمحلل من الوجع : لك الحمد يا رب .. كل الأدويه جربناها .. وماحد غيرك يفرج على عبده .. فرجها يا رب
ومن غبوشة الله .. سرحنا لمان المستشفى فحصنا البول والمخروج و الدم والسكري وسوينا خمسه وسبعين كشفيه ورحنا قد الباطني ..
ـــ أيش عندك ؟
* دار .. سيارة ..غـ...
ـــ أيش بك ؟
* آه ... مغص ونغص من البارح .
ـــ كلت شي مقلوب ؟
* كما هواه ؟
ـــ حاجة عادك ما بدا كلتها من يوم دخل رمضان ؟
* والله .. ماشي جديد .. الفلاح كما كل يوم .. الفطار كما كل ليله .. نعم !
ما خلاف الشراب اللي هو جديد على الفطار.!
ـــ بس أكيد هو
* ليه شي شراب طلع في الكشفيه ؟؟
ـــ طلع عندك ( بيوسننج )
* و أه يعني الكلام ذا ؟
ـــ تسمم ..
* ولا خنّه من الشراب ؟؟ ما هو معقول ..! شراب Made in UK مش أي شراب
القصد .. عطانا زنبيل دوا ... وأول ما وصلت للدار قلت لهم هاتوا الغرشه حق الشراب با شوفها
جابوها
قلّبتها
* محمد : عكن الشراب اللي في الغرشه في WC
ــــ ليش
الشراب خايس حسف يومه من حق برع
الله يقلع ( حق برع ) وما جا نحن من آل برع وقدها مقاله سابقه :
من قوته على الجيران ـ أو بالأصح عيال الربحان ـ عِد به يكزم ومصيره يسقم
وبصراحه الباين أنه لازم نقاطع بضايعهم ولا نصطقر بالدعايه اللي مسوينها لها .... و اللي عندنا يكفينا ويغنينا
قاطعوهم .. ولا بايقع لكم كماي
وما تشوفون شر إنشاء الله