جلسات السمر و الدان

[الشعف]

السلام عليكم ورحمة الله وبركاته

كيفكم ياشعارنا .. عساكم متعافيين .. مشتاقين لكم كثيييير ;)

المهم طالبينكم في سمرة دان .. ايش رايكم ؟!


واليكم التقدمة :

فيما مضى وعلى وجه التحديد منذ قرابة العام ونيف , وضع اخونا العزيز ( شبامي اصلي ) مشاركة له في ( محابي شبام ) تحت عنوان ( هل من مبارز في الدان ) .. وكانت عبارة عن مساجلات على نمط جلسات السمر والدان المعروفه . وقد لاقت اقبالا وتفاعلا من محبي الدان وعاشقيه حيث دامت واستمرت لفترة لا بأس بها .. ولكن وفي ظل غياب المحابي وللاسف انقطعت تلك المبارزة وتلاشت .. وها نحن نجدد العزم على اعادتها هنا في ( سقيفة الشبامي ) .. وبما ان السقيفة تزخر بكمّ كبير من الشعراء المجيدين نتمنى حضورهم ونرجوا تفاعلهم ... وعلى رأسهم المحاربون القدامى ( شبامي اصلي - عاشق الدان - سبع الليل - مستقي من سعيديه - الزقر - الباشمشعفف ) كونهم ممن ساندوا تلك الفكرة و ساهموا في انجاحها بترانيمهم والحانهم .. التي طالما سعدنا بها وباستمراريتها .

وعلى نفس النمط سنبدأ من هنا ..راجين من كل شعراء السقيفة وعشّاق الدان الاصيل الحضور والتفاعل .. وخلونا نتعلم من بعض ونحافظ على اصالة تراثنا التليد والراقي .. ولن يتم ذلك الا بتظافر جهود الجميع .


اساس الفكرة :

فكرة الجلسات ترتكز على ان يأتي الشاعر ببيت شعري مشهور في لحنه او مطلع او مقطع من اغنية معروفة .. ومن ثم يبني على نفس لحنه ووزنه وتقاسيمه , يبني مقطعا مماثلا له ومطابقا له في الوزن واللحن , دون التقيد بقوافيه .. بمعنى آخر >> له حرية التغيير كيفما يشاء في القافية والتخميس .. لان الاساس في الوزن واللحن .


شروطها :

ان يتقيد المشاركون في مشاركاتهم بنفس الوزن واللحن والقافية و( عدد المقاطع - ما امكن - ).

ولكي يسهل على الشعراء التقيد بالوزن واللحن .. فقط عليهم ترديد ابيات المقطع الاساسي -( مقطع الاغنية )- بصورة مغناه لان الدان يعتمد على السماع ومن ثم يبنون ابياتهم على نفس وزنها ولحنها .
وفي حال امتلاء الفصل بالكلمات المتكررة والقوافي المتشابهة .. ندخل في فصل آخر على وزن مقطع غنائي آخر .. وهكذا دواليك ,,,,,

كما اود التنويه الى ان هذه المساحة ستخصص للدان فقط .
وبخصوص المساحات الاخرى : ( مساجلات الشعراء ) و ( المساجلة الشعرية ) ستستمر على نفس المنوال باذن الله . ولا يعني ذلك اننا سنهجرها .
وانما رغبة منا في الحفاظ على الدان الحضرمي الاصيل وجذب متذوقيه وعاشقيه ومحبيه .

واملي في الله كبير ثم فيكم الا تخيبوا ظني .. وخلّوا نحنا نتعلم منكم ونستفيد من بعض .
والدعوة مفتوحة لجميع شعار السقيفة والحاضر يعلم الغايب .

وعلى بركة الله نبدأ على نفس ما بدأ به ( شبامي اصلي ;) ) :

يقول بو محضار في بيت له :

يانود نسنس مــن قــدا العربان خبرنا
كيف استوت حالاتهم من بعد ماسرنا
لانني ذكري بهم ان جيت اوبتّيت
( لاحل للفرقه محينه منها ونّيت )


وهذه على وزنها ولحنها :


ذا فصل والثاني بغيت القول يتنظّم
نسنس بصوت الدان ياذا الشاعر الملهم
باينشرح خاطري لو شعّارنا يوفون
( هل عاد شي رحمه لعاشق كذ مسى مشطون )
***
هل عاد حد للدان يالحلان بايهتم
نا جيتكم عاني وراجي منكم اتعلّم
ومنتظر للوصل بس ياريت لا تبطون
( هل عاد شي رحمه لعاشق كذ مسى مشطون )



واليكم احبتي المقطعين مغنّاه باللحن السماعي ارجوا التقيد بنفس اللحن .. لكي تضبط الاوزان .. واعذرونا على رداءة الصوت ;) وانما الجود من الموجود :D:D .. ارجوا الانتظار ريثما يتم تحميل الفلاش ;)
http://members.lycos.co.uk/shouof/for_all/dan.swf
على امل ان تنال الفكرة استحسانكم ورضاكم .. ولاتبخلوا علينا بالتوجيهات ... والشكر موصول لصاحب الفكرة الاساسي ( شبامي اصلي ) الذي نتمنى عودته و حضوره مع البقية .
والرجاء التقيد بقافية الفصل والوزن وعدد الابيات ما امكن .

بانتظار مشاركاتكم او آرائكم وملاحظاتكم بشغف .


الشعف

[طالب النعماني]

يامرحبا بالقول من شاعر كما البلسم
يشفي فؤاد القلب لي من سمح يتألم
مثل البغيه قال بوراضي عسل مشنون
***

كيف الخبر حبيت لي واحد طلع مجرم
غدار في غدار لا يعطف ولا يرحم
روّح وخلاني في الشارع كما المجنون

***

عداء في الشارع قبل عيني ولاسلم
دقيت له دقه على الجوال ماكلم
مغرور لا سلم ولا جوب على التلفون






الاخ العزيز الشغف اعذرني ان قصرت او طولت في الوزن لاني جديد على هذه الالحان حتى الاغنيه حق المحظار ماقد سمعتهاء ولكن كتبتها على وزن البيت بدون لحن ارجوا ان تكون مشاركتي موفقه
وشكرا للجميع

[الشعف]

حيا وسهلا بالذي بالدان يتهمهم
شاعر وله معنى يداوي الجرح بالمرهم
ينفح بريح المسك هو والعود لي مدهون
***
قولوا لبو راضي صبر عالمر والعلقم
والا لحق نفسك من العشقة قبل تندم
ذا بحر ماله بر ولا له طعم والا لون


حياك الله اخي العزيز طالب .. سررت بمشاركتك وسرعة بديهتك .. وما شاء الله ابياتك موزونه على اللحن والقافية ومصلوووبه .. ماقصرت يابو راضي :rolleyes:

والله يعينك من العشقه ;baw

بس ياريت نترك المجال للبقية يشاركون .. بحيث لا نزيد عن اكثر من شطرين ... والا لي تشوفه زين .. وفعلا ابياتك كلها مكملة لبعضها وفيها مغزى جميل .

واشهد انك شاعر وذوّاق وعاشق;)
لا تحرمنا من مشاركاتك ... وعلى الله تلقى الجلسات اقبال من الشعراء البقية .

تحياتي,,,
الشعف;)

[الشبامي]

ياسلام يابوشعفان
سبّاق للأبداع سبّاق!!!
بصراحه شئ ممتع
شعر جميل وكلمات اجمل
من شعراء اجمل واجمل!!!
يالله ياجماعة الخير وينكم ياشعّار؟؟

[شيخ القبايل.]

عاد الشعف والعود احمد

عساها عودة متعافي ماهي ربطة في الدار بعد الحادث

و بعدين تشرد

خلهم يقددون لك لحم وبيشوون لك كبد شفها زينه للمرضملين

وان عادك الا كويت الا بزايد .....دندنة


كويت من الكي = عشان مايطمر عليكم صدام

[حاتم الطائي]

دركوا على حاتم تولّع في هوى أحوم
غيّب علي حسّي وضاع العقل وتهيّم
وهبت له قلبي هديّه فوقها مليون
***
حوري من الجنة حسين الثغر والمبسم
حوى صفات الزين متربّي ومتعلّم
قط ماخلق في الكون حد مثله كذا مزيون


قويتوا يارجال
والا نقول جمعة مباركة احسن :D

مشكورين على السمرة التراثية الاصيلة والتي نتمنى استمرارها على الدوام .

شكرا يالشعف شكرا ابو راضي .
اخوكم/
حاتم الطـــــــــــــــائي

[الزعيم]

يامرحبا بالشعف لم الشمل وتلملم
ابو الرضا والشعف محبتهم بمجرى الدم
والعشق بلوه من عشق مايلزمه قانون



********
غن يالمغني شل بصوت الدان وترنم
شفنا مولع بالسلى وقلبي يحبه جم
هذا كلامي والجواب من صاحبي مسهون



تحياتي للجميع........

[شيخ القبايل.]

يقول بو علوي سريت اليوم باتنسم
قالوا تحرك ( للعلية ) ان بغيت الشم
حصلتهم من سمح خلق الله يتعاشون !!
***
حد يدفر السترة وحد يعوي و يتلطم
و الشوحطة ما بينهم يرطن ويتغمغم
و الحاصل ان الناس في ذا الوقت يتلوون
***
ان عاد شي ناهي بغينا العبد يتقدم
ذي هو شرد للحصن ما عبر ولا عوم
خلا عباد الله حد عاقل وحد مجنون !!
***
ان مارفع سيفه على الطغيان بايندم
ما للفتن الا شفار الذبح تذلح دم
ذي صدت النافش .. وردت ( بن دغر ) للدون !!


بعد تعديل الوزن .. ان شاء الله يكون ضبط يالشعف ..
ولك التقدير والشكر

[الرعد]

السلام عليكم ورحمة الله وبركاته
مشكور الشعف على هذه السمره والدان والابيات الجميله والاخ باتيس بابياته الجميله والشاعر الطائي ذو الموهبه الشعريه
وارجو قبول هذه المشاركه البسيطه


بور اضي أحييت في القلب نار عليها مردم
من جور المحب لي ضيع خله و لاتكلم
غصب عني اسال عنه في التلفون

شربني كاس فيه طعم المر والعلقم
و لاشتكيته لقلبي رجف و قال لي ارحم
صغير في الهوى بعده عليه بون

إلى متى يا قلبي في حبه أنا مغرم
رعبوب ماحد مثيله في الهوى يا قوم
ومن حسنه عذرتك يا قلبي المضنون

صبر يا قلبي على الأشجان والغم
وبكره باتنفرج ولا عساها اليوم
وباتنطفي ذيك الحرقه والرشون

;bounc ;figer ;figer ;danc ;cowboy الرعد

[الشوحطه]

الرسالة الأصلية كتبت بواسطة طالب باتيس النعماني

يامرحبا بالقول من شاعر كما البلسم
يشفي فؤاد القلب لي من سمح يتألم
مثل البغيه قال بوراضي عسل مشنون
***

كيف الخبر حبيت لي واحد طلع مجرم
غدار في غدار لا يعطف ولا يرحم
روّح وخلاني في الشارع كما المجنون

***

عداء في الشارع قبل عيني ولاسلم
دقيت له دقه على الجوال ماكلم
مغرور لا سلم ولا جوب على التلفون






الاخ العزيز الشغف اعذرني ان قصرت او طولت في الوزن لاني جديد على هذه الالحان حتى الاغنيه حق المحظار ماقد سمعتهاء ولكن كتبتها على وزن البيت بدون لحن ارجوا ان تكون مشاركتي موفقه
وشكرا للجميع انا من الشحر وفي الدان متعلم لكنني غطاس وووسط البحر اتكلم وبعطيك اخبار عن ليلى وعن مجنون

[الشوحطه]

انا من الشحر وفي الدان متعلم
لكنني غطاس ووسط البحر اتكلم
وبعطيك اخبار عن ليلى ومجنون

[الشعف]

يامرحبا باقوال من شعّار تتقدّم
وفّوا ووافونا ومنهم خير واجد عم
سلّوا على خاطر مولّع بالهوى محنون
***
على بحور الدان يالعشاق با نلتم
لكن بغينا الوزن بالالحان يتّمّم
لان صوت الدان له معنى وله قانون
***
باننظم الاقوال عالدفتر وبالمرسم
لان لحن الدان لو مكسور يتشتّم
لازم على الابيات يالشعار تتغنّون


حياكم الله ياشعارنا وفيتم وكفيتم ...
لكن لي ملاحظة عالوزن واللحن .. الرجاء التقيد بها قدر الامكان
وان شاء الله ساقوم بارفاق مقطع ملحن للفصل .. لكي نلتزم ببناء الباقي عليه ...

وبالنسبة للملاحظات والتفاصيل حول مواضع الكسر في الابيات .. لنا عودة لها لان وقتي الان لايسمح ... وسنحاول تبيينها لكي نتجنبها ..
والعفو منكم ترانا مثلكم اتعلم ..

تحياتي ,,,
الشعف:)

[الشعف]

حياكم الله يااهل السلا ;)
شاعرنا الهمام ابو راضي: جلبت لك اللحن .. وبصراحة معجب جدا بدقة وزنك الفطري .. وترقبا معك في مساجلات الزامل قريب تقبل ازكى سلامي واحترامي .
العزيز الشبامي : اشكر لك حسن الظن والتشجيع والاطراء .. وان شاء الله نكون قدّه .
الغالي محمد باذيب : شاكر لك حسن الترحيب بالعوده .. والحمدلله ابوشعفان بأوفر صحة ولم يصبي شي مما ذكرت .. لارضمله ولا تعكّاف ;) ... لكن ان كان العذر باينفع وبايقع بعده كبده ولحم مقدّد ;)
شف الشعف يعرف يمثّل :D:D:D
شيخنا حاتم : ماقصرت يابو الكرم ... ومشاركتك نفتخر بها وماشاء الله موزنه على نفس اللحن .. خالص احترامي لك .
الزعيم الجيد : يسعدني تفاعلك مع الموضوع ومشاركتك معنا .. ولكن ارجوا ان تدقق في الوزن قدر الامكان حيث توجد بعض الكسرات في مشاركتك ... سأترك لك تحريرها اذا تكرمت .. وقد قمت بارفاق ملف فلاشي بالصوت ... ارجوا التقيد بلحنه .. والقياس على وزنه .. ومن ثم حاول ان تغني ماكتبت على نفس اللحن فاذا وجدت فيه توافقا مع اللحن الاصلي فذلك المراد اثباته ... استمر معنا بارك فيك على امل ان ينضم ابو هاني كذلك .
شيخنا الموقر شيخ القبايل : على الرحب والسعه .. وسررت جدا بمشاركتك .. وبصراحة الشطرين الاخيرين موزونه جدا على نفس اللحن ... وبالنسبة للاول والثاني !! حاول ان تغنيها على نفس اللحن وستجد مواضع القصور فيها بعض الشي ;).... كما نرجوا استمرارك معنا على الدوام .
اخي الرعد الحنّان : مشكور عالمشاركة والمحاولة الجيدة .. ولكن ارجوا مراعاة الدقة كذلك في الوزن واللحن .. اتبع نفس التوصيات لكي تضبط اوزانها .. ومشكور .. آملين في استمرارك .
اخي الشوحطة : اولا نرحب بك حال جديد في السقيفة .. مرحبا الف حيا وسهلا ... كذلك شاكرين مساهمتك معنا .. واقول حاول تدقق في الوزن اكثر .. ولا تقطعنا .

عموما ... اسف اذا كنت ثرثار بعض الشي .. وثقيل دم ;).. والعفو منكم سامحونا بس قصدنا نتعلم من بعض وندقق في الاوزان ونتسلى على المغنى .. وماحد معصوم من الخطأ .. ولا تحرمونا من اي توجيه .
ولا زال النداء موجها للجميع وكلنا في سهون وصولهم .

ملاحظة بسيطة :
ارجوا منكم واكرر الرجاء بالالتزام بعدد المقاطع بحيث لا يتجاوز الاثنين واقصاه ثلاثة مقاطع .. مع محاولة التركيز على الفكرة في المشاركة وايجازها من خلال هذه المقاطع ... لكي يتسنى للجميع المشاركة وكي تتعدد الافكار والقوافي ... كلي امل في التقيد .. مع جزيل الشكر والتقدير .
و
شلّ صوتك واحسن المغنى **** وانطرب بالدان ولحونه

تحيات محبكم ,,,
الشعف;)

[طالب النعماني]

الشعف عالم وعنده للكلم منجم
ملقي معاهد لكل جاهل ومتعلم
ياريتني بلتقي به في رباء سئؤن

***

بالفهم الشخص لي هو قط مايفهم
لمان يفهم كلامه حين يتكلم
لا يقفل الباب بالقرصه وبالكالون

[جمال العطاس]

حيا الله اخي الشعف . وحيا الله الجميع
الفكرة اكثر من رائعة . والشعّار ماشاء الله موجودين
واعتقد انني تأخرت في دخولي الي السقيفة ولم استطع الدخول
الخميس والجمعة .
الحاصل اعذروني لاني قليل المتابعة هذه الايام .
المرجو من جميع الاحباب التركيز الشديد . الدان يتطلب تركيز في الوزن




باقول يالشعّار فيكم قول يترنّم
بالدان في جلسة صفاها بايزول الهم
والدان يبغى قول زين القافية موزون

انا امام العشق والعشاق بي تأتم
على يدي في العشق ياكم كافرٍ أسلم
تتنفل العشّاق في المحراب ويصلّون

خليت كل الغيد تتهلّك وتتخدّم
من اجل مرضاتي لأني عاشق متيّم
قولي اذا قلته يخليهم مطر يبكون

[جمال العطاس]

أهيف كحيل الطرف ذوّبني اذا سلهم
مكحّل العينين كالبلوط رسم الفم
والعنق لجرد مامثيله شفت حد في الكون

قلبي تعلّق به وفي معشوقه تهيّم
والله ماباتوب منه لو سقاني سم
لوهم عطوني في حبيبي ماملك قارون

يأمر على قلبي ويتدلع ويتحكّم
وان قال كلمه ياجماعه قلت والله تم
لاقده راضي ماعلي مابايكون يكون

[الشعف]

يامرحبا بالحان عازف عالوتر قسّم
شاعر يجيب القول صافي مثل ماء زمزم
وابيات موزونه جواهر بالدرر مكنون
***
العشق ذا بلوه على العشاق يايسلم
كل من صبر في العشق تالي الصبر بايغنم
ما يهمرون القبص لي هم للعسل يجنون
***
هل عاد حد يعرف يفك السحر والطلسم
ريته يطببنا اذا في الطب هو يفهم
صاحي من الظاهر ولكن في الحشا مطعون


حياك الله يابوهاني .. وينك من بدري ؟!! المهم مشكوووور على حضورك
وبصراحة ابدعت في الوزن واللحن .. كما عهدناك يا استاذنا ... نورت السقيفة بحضورك .

العزيز ابوراضي .. العفو شف الشعف ماهو عالم .. عاده الا يتعلم منكم يافطاحل .. وشكل العين صابتك من شبامي ;)
ماشاء الله حولك ... شويّه الوزن اختلف حاجة بسييييطة .. لكن ماتضر كثير .. مشكور عالمشاركة .

[جمال العطاس]

حيا الله بوشعفان ياخير فصل !!!

باتيس شاعر مبدع والوزن في القول الاولي زين كماقلت .
لكن الثاني اكيد صابته عين .
لكن ولايهمك باتشوف من باتيس كل مايعجبك ويعجب الجميع
شاعر متمكن وصاحب افكار وتوظيف ممتاز للمفردات .
موفقين وهاتوا اقوالكم !!!

[الشعف]

ياهلا بو هاني ..
اسمحوا لي اوضح بعض الاشياء ..
انا لم اعني بردودي انقاصا من وزن اي شاعر شارك او ساهم بمحاولته الشعرية معنا هنا او في سواها .. ولست في موضع الحكَم
ولكن من باب التنويه فقط لاغير ... والكمال لله وحده .. واذا ترون اي خلل في اي بيت لبوشعفان هاتوا له خبر .. وماحد يخلق متعلم وماحد في الخطأ معصوم .. وكلنا سنتقبلها بقلوب وسيعه .. بالعكس سيزيد ذلك من فرحنا .. في سبيل الرقي بجميع المشاركات الى المستوى المطلوب .

ابو راضي كما هو حال الجميع .. له منزلة خاصة في القلب اضافة لكونه شاعر فذ ومتمكن وواثق كل الثقة ان كل ما بايجيبه زين كما اشار بوهاني .. والتنويه لايعني ذلك انقاصا من قدره .. ارجوا ان يعذرني ان فُهِم عكس ذلك .

عموما من ذحين :D خلاص شونا باصرط مخووووط ولعاد باتكلم ان كان حد بايحنق ؟!!..
ما بغينا الا الخواطر تقع سلية وسالية .. ونجتمع ونحنا متراضيين .
والا كيف يارجال !!

اذا ترون الفصل ملان حد يفصل .. والا على ماتبغون قفاكم ;)

[طالب النعماني]

اخواني الاعزا
السلام عليكم ورحمة الله وباركاته
شكرا لكم على انتقادكم وانا افرح بكل واحد ينتقدني لانه يقوي من موهبتي الشعريه لاني اصحح اخطاي وكل واحد يخطي ولا حد معصوم من الاخطاء وانا قلت في البدايه للاخ ابو شعفان اعذرني لاني جديد على اللحن هذا واول مره اسمعه
وارجوا منكم ارشادي الى الطريق الصحيح
وانا فخور بكم وبمشاركاتكم معناء في مساجلات الزامل الشعبي واشكركم على المشاركه معنا
والعفؤ اذا اخطات الطريق ونزلت عن الوزن لاني تلميذكم وانتوا اسلاتذتي في الشعر
تقبلوا تحياتي
اخيكم ابوراضي

[الزعيم]

شكرا اخي الشعف على لفت نظرك .. وانتقادك بلسم .. وصديقي من اهدىلي عيوبي ....وارجوك تلفت نظرك الكريم على تعديلي استاذي الفاضل ..

[الشعف]

عزيزي ابو راضي ...
يعلم الله معزّتك عندي يالغالي وجميع الشعار الاعزاء .. والعفو ياحبيب شف العين ماتعلى على الحاجب ونحن تلاميذكم كلكم ... و
الله لايجيب الزعل بينك وبيني *** وان زعلت ارضيك انا يانور عيني
احترامي لشخصكم الكريم ,,,


الله الله يازعييييييييييم ...
اول اشكر لك حسن الظن وانت خير من يحسن الظنون
ثانيا : اطلعت على تعديلك الاخير
وبدون مجاملة اقولها فعلا ( ابدعت يااااازعيم )
ولا يهمك الرد مسهون وان وقع لي شعر باجيبه لك شعر.. وسخانا بك.

واستمر معنا وبالفعل كلنا متعلمين وكل واحد يستفيد من الثاني ...
ورحم الله امرؤا اهدى الي عيوبي
اي واحد لديه اي ملاحظة او توجيه لايبخل بها ... والنفس في القلوب

والى بقية الشعار الافاضل :
شيخ القبايل - العفو والسموحة ياشيخنا اذا زلينا .. شف مالنا غنى عن مشاركاتك بالله لاتحرمنا منها .
وكذلك الرعد والشوحطة .. لايكون في خاطركم شي .. واستمروا في المحاولات ولا تحرمونا منها ومن توجيهاتكم .

[جمال العطاس]

انسى همومي كلها لاشفته أتبسم
جمال مامثله وفي طبعه خفيف الدم
خلا العذارى كلهم من حسنه يغارون

من يوم حبيته وعمري ماعرفت الهم
من حب مثله ياعرب والله مايندم
البعض متهني وحد في عشقهم يشقون

[الزعيم]

حبيت وانته مامعك دينار او درهم
بعض العرب انذال ياصاحبي ما ترحم
يمسوا سكارى والعرب لي جنبهم يبكون

ثاني محاوله ارجو ان اكون قد وفقت .. شكرا استاذي الشعف وشفنا اتعبتك معي سامحنا ....

[شيخ القبايل.]

مساجلة لطيفة و رائعة
والرابط الصوتي معها زادها جمالا

بس صوتك مشحب يالشعف !!


وبخصوص النقد .. فما ادري لماذا الشعف يكرر الاعتذار
النقد دائما ما يجي منه الا التعديل والخير
وما اعتقد ان احد من الاشخاص الذين توجهت الانتقادات نحوهم سيغضب
بالعكس . الواجب يشكرون

تحياتي للجميع .... تهانينا لكم بالشهر الفضيل

[شيخ القبايل.]

بارك الله فيك اخي الشعف
بالعكس انا سعيد بنقدك .. والصوت اللي ارفقته باينفع ان شاء الله ..
و ارجوا ان الابيات ادناه تكون مناسبة ..





حبيت والحب ياعرب وعره شعابه جم
شابت نواصينا وهو مازال يتأزم
ما يعترف بالعمر لا هاج الهوى المدفون
***
يتذكر السرحة بيوم العيد .. في بيحم
و الغيد تتنعطل كما المرعاد .. ما تهتم
والقلب تجرحه السهام الفالتة من ( نون )
***
نامت عيون الناس بالفرحة وهو ما نم !
ولعاد شي في العقل الا الورد والعندم
حاير .. ويتنهد .. ويتقلب .. كما المسكون
***
ليت القبايل يوم شافوا شيخهم ( مغرم )
خلوه يتقرب .. و يتعرب .. و يتعمم
قالوا صغير عادك الا .. لاتقع مشطون
***
شقت على خاطري ليت الجرح يتكلم
ويقول يا زين المباسم .. جود بالبلسم
طلاب شونا عند بابه .. ياعرب .. محنون



و سلامتكم

[جمال العطاس]

حيا الله جميع الاخوان الاحباء !!

الزعيم شوف هذا الوزن ماشئ كماه ابدا . ولا أروع
وذا رد لك على ( الدرهم والحب ) .


الحب صار اليوم كم تدفع وكم وكم
سلعه لمن بايشتري مانالها المعدم
من لامعه في وقتنــا فيه العرب يشنون

أرزاق يالعشّاق حتى الحب يتقسّم
وبعضهم عشقه كتبه الله له مغنم
حد في الهوى يكسب وحد في عشقته مديون



حيا الله شيخ القبائل !!!
قول ملان واكثر من رائع صحيح ( ابداااااااااااع )

وذا رد


قُل للقبايل شيخكم في عشقته هيّم
تنزف جروحه عندمٍ ويصبها عن دم
يشكي طعون الحب..جرح الحب ذا طاعون

مسكين كل من غَل جرحه صعب مايلتم
لانوم يهنا له ولا له شئ فرح قد تم
تمضي حياته كلها ياصاحبي مغبون


لكم جميعا حبي

[باجرش]

ذا غيث يخوي في السقيفة أو أنا اتحلّم
رعده يحن بالدان والشعار تترنم
سلى على خاطري بعد الضيم لو تدرون

***

الله يبارك لا طلع شمروخ وتسنّم
أصفر وشي أحمر له العربان تتعزم
يلقي بخلعه ( فسحمي) من خير ما يجنون

***

قلبي على خلع السقيفة ذاب واتهيم
إن شل صوت الدان عصب راديه وتقدم
وخاض في بحر السلى لي هم فيه يخوضون

***

المسك هو عطره غزال البيحم الأحوم
يسري عبير الحب من همسه إذا كلم
يروي ربيب عشق من ليلى ومن ومجنون

[الشعف]

يازينها اقوال عالسموار تتلاطم
اقوال من شعّار فيها الكيف هو والكم
شلت هموم القلب لي هو من زمن محزون
***
القلب في حرقة وذاك العقل بايغرم
والجمر يتشبّب وعاده من اطم لا طمّ
ياريت لي هم رشنوا الجمره لها يطفون
***
خايف على عمري يمر الوقت واتهرّم
هل عاد شي معروف في قلبك وتتكرّم
تعطف على قلبي و ترحم حالة المضنون


حياكم الله ياشعارنا ...
والله بصراحة الواحد يفخر بكم ويرفع الراس ولا يوطيه .. مادمه معكم .

شكرا للجميع ...
ابو هاني : ماشاء الله معيان لاينضب من القوافي والكلم .. تبارك الله ;)
واقول للزعيم :.. ماشاء الله عليك الوزن عال العاااال استمر هوكذا .
كذلك سلامي الحار لبوحمد .. والصوت بانشرب عسل عشان يتحسن .. يمكن اغيره الى الاحسن ;)
شيخ القبايل : برّدت كبدي شفك يوم ظهرت وامتعتنا بابيات كما شاهي السموار تتلاطم .. شو هالتعئيد ;)
العزيز باجرش : بصراحة شرف لنا حضورك ومشاركتك مكسب
وعلى فكرة انا كنت احسبك مبدع في الفصيح فقط ;) بس والله شفك طلعت المخبأ والمدفون وابدعت .. لاتقطعنا .

ولازال النداء موجهاً للجمييييييييييييييييييييع ;)

[الزعيم]

لا جدي بالحمر ولاهائل سعيد انعم
ريت الرويشان بايقع لي خال والا عم
الخير بايجيني وبابني مثل لي يبنون

مشكور بوهاني على لفت نظركم
مشكور استاذي الشعف على متابعتكم لنا
مشكورين كل الاخوان المشاركين والعفو

[المنصورة]

اعجبتني فكرة الشعف وكذلك كل الابيات المشاركة حق الزملاء في هذه المساجلة اللطيفة واسمحو لي ان اشارك بهذا المقطع القصير ارجو ان ينال استحسانكم فانا لست ممن يجيدون الشعر
الحب شف ياصاحبي ما بيننا قد تم
خلي الهوى لي بيننا مكتوم لو تفهم
بعدين كل الناس ياصاحبي بايدرون

[الزعيم]

ياللي سكنتوا القطن غربي دار باللعسم
انتوا سقيتوني العسل مخلوط هو والسم
وين العرب لي هم بهذا الامر ما يدرون


باختم ابياتي بذكر المصطفى الاعظم
محمد الهادي بذكر ه ابياتي تتنظم
والآل والاصحاب لي نا بحبهم مفتون



وتحياتي للجميع . وياشعفان عتابك حلو يامحلى العتاب ........

[جمال العطاس]

رائعين والله رائعين

اخي الزعيم : الوزن جدا رائع . وبعدين ايه بغيت بهائل سعيد انعم
استاذنا باجرش : كما قال حبيبنا الشعف عهدناك مبدع في الفصيح
وفاجأتنا بهذا الابداع المبهر الآن . حقاً المبدع مبدع اينما ذهب.
وهذه ليست شهادة مني فمثلي يتمنى ان ينال شهادة منكم وهو مجرد اعجاب شديد !!
الاخت المنصورة : شاعرة ظهرت فجأة تملك قدرة هائلة في ماتقول
وزن !!! توظيف ممتاز للمفردات !! سلاسة في الاسلوب !!!
اتيان بصورة شعرية سلسة ورائعة !!
والاروع تواجد القلم النسائي شعرا .. لاتحرمينا اختنا الفاضله مما تكتبي





جاء منكم ابداع في اقوال يتهذرم=أُعجِب بماقلتوه كم ناطق وكم ابكم
رقه وحكمه ظاهره في كل ماتقولون




والمعذرة للجميع

[المقدام]

تحيه حاره لجميع المشاركين وبصراحه ابداع جميل
وهذه محاوله متواضعه ان شاء الله تكون على اللحن


اقوالكم في العشق تمتعنا وتطرب جم
خلت حواسي تكشف المكنون واتكلم
اوزان محسوبه تروض عشقة المجنون


بالله تشفونا من الاشواق لــــي تلهم
عشقان لاهل الدان يتناثر ملان الدم
من يوم شفت الحرف يتناغم مع الموزون


وديت من قلبي لو عندي ثنعشـــر فم
باشكر لشعار السقيفه النظم والمغنم
ياريت يتواصل مزيد الشعر بالقانـــــون


شكرا للاخ الشعف على ادراج الصوت وياريت كل مره يتم ادراج الصوت

[الشعف]

اولا ارحب بانضمام الصوت الرقيق المتمثل في شاعرتنا ( المنصورة )
وفعلا ابدعت في الوزن ... نرجوا الاسمترار ولو حتى بمقطع في كل مشاركة .

ثانيا نرحب بانضمام اخ مقدام على اسمه ... كذلك اسجل اعجابي بما نظمت .. كلام جميل وكلام موزون .. مقدرش اقول حاجة عنّه .. غير ( ياريت يتواصل ) ;)

ثالثا : الفصل امتلأ يالسمّار ... ان حد معه فصل طارف بالانتظار
وان ماشي انتظروا بوشعفان بس يجهز الصوت الليلة ويرفقه عشان يقع فصلنا موزون من البداية .. ولنا لقاء بكره ان شاء الله .
وان ماشي ظهر منكم بانجيب من عندنا .. لكن بغيتكم تحاوشونا من الان وكل واحد يجهز فصله .. وبعدين بايقع تكليف ;)
تحيات محبكم وتلميذكم
الشعف :)

[ود احمد]

بسم الله الرحمن الرحيم

السلام عليكم ورحمة الله وبركاته


اشكرك استاذي العزيز ابو شعفان على هذه الابيات الشعريه التي من تاليفكم والتي انورت بها السقيفه وابدعوا معك بها بعضا من الحلان في ر دودهم لك بالرد المناسب لا بياتك الشعريه 0

ولو عندي في الشعر لقلتوا لك جوابي في هذا ولكن للا سف لا اعرف الشعر ولكن اعبر لك عن اعجابي وشكري وتحياتي لك على ابداعك هذا واتمنى من الحلان التواصل بما معهم من رد الى هذا القصيد


وشكرا جزيلا لك ورسالتك مع المذكور وصلت وهذا خاص بالرد

[شيخ القبايل.]

نتمنى من اخينا الشعف ان يضم ابيات الغزل الواردة في هذا الدان في ( الحكايات الجميلة )
بعد ان يهذب اوزانها ويرتب المقاطع بما تناسبه من تسلسل

و سلم على ابي معاذ
نبغى نسمع صوته .. علهوا سوا .. مش وهو يدندن بس

[الشعف]

فصل جديدعلى وزن ( ليالي الانس ):

ليلة الحد لي مرّت بذكر الخواطر
ذكرّتنا بشي ماكان عالبال خاطر
ذكرّتنا بلادي ذكرّتنا بسيئون
يارعى الله ليالي الانس في وسط سيئون

واليكم الفصل :

فصل من بايداوي قلب ولهان معتل
من طعون الهوى يمشي بسبعين علّه
ماهني له منامه لا ولا غمض لجفون
( لاقضى الامر ربك كان بالكاف والنون )
***
هاش لبّي وضاع العقل مسكين واختل
والسبايب تحمّل جور من صدّ خلّه
شي بصر شي نظر من قبل ماصير مجنون
( لاقضى الامر ربك كان بالكاف والنون )
***
سير واصري ودوّر دوب نبحث عن الحل
شاب راسي وركّ العظم من قبل حلّه
مارحم ما شفق مامد لي اليد بالعون
( لاقضى الامر ربك كان بالكاف والنون )


وهذا الصوت عساه يحوز رضاكم .. ترى تعبنا في المؤثرات ;)
http://members.lycos.co.uk/shouof/for_all/layali.swf
ونرجوا التقيد بقافية الشطر :
معتل***علّه
اختل***خلّه
وهكذا ... او بالاشتقاق على نفس اللفظ ...
ومن الان كل واحد يجهز فصله ;)


لاانسى ان ابعث تحياتي لود البدوي ( وجه الخير ) ومشكور على شعورك النبيل .
كذلك بوحمد .. من عيوني بانجمع كل فصل بعد انتهائه ونضيفه حسب مضمونه للحكايات الجميلة .

وتحيااااتي للجميع ;)

[جمال العطاس]

من عشِق لايبالي لو بعشقته يقتل
يحتمل لو جميع الغيد أفتت بقتله
من بغا الزين مايهمُر خناجر ولا طعون

في الهوى يرحم العاشق حبيبه اذا زل
لايعاتب ولايهجر على كل زله
وين اهل القلوب اللي عن الخل يعفون

آه ياليت محبوبي بماردت يقبل
كان قلبي توجه له وخلاه قبلِه
والمحبين في محراب عشقي يصلون

[جمال العطاس]

وينكم يالشعّار ؟؟ وراكم ماحد لاهي منكم !!

هيا خذوا مني :


قال انك تحب صلّي علي دائماً صل
قلت صليت!! قلبي يرتجي مِنْك وَصلِه
قال لي انت ملكي ! قلت انا عبد مرهون

ماوصل عيب عاشق لجل محبوبه ان ذل
والهوى فيه يااهل العشق عز ومذله
قيس قبلي مع ليلى بها صار مجنون

يوسفي الحسن ياحلو دمُه مدلل
يسحر الكل باخلاقه وزينه ودلِه
مارأت عين ( بوهاني ) يشابهه مزيون

لاتبسّم أسر قلبي ووجهي تهلل
مثل بدر السماء وابهى واجمل اذا هل
من ضياء نو وجهه تنجلي ظلمة الكون

[شيخ القبايل.]

في الطريق ان شاء الله

واقول لاخوي الشعف ان الخلل القديم حاولت اصلحه . ان شاء الله ضبط الله يخليك شوفه
وشكرا للاخ جمال على اطرائه وجميل مقاله في تعليقه على الابيات الاخيرة لي . وتكرمه بالتعليق شعرا كذلك

[الزعيم]

لويقع لي مرادي كل محبوب يوصل
بعد ماشوفهم قطعوني مية وصله
خايف الاالشواني لادروا بايوصلون


انته ياصاحبي في القلب ساكن ومحتل
ريتني عندكم حصل مكانه وحله
والحواسد بهذه الارض ما بايحلون

اخواني الاعزاء واستاذي العزيز هذه الابيات خرجت بالقيصريه ان شاء الله موفقين ..

[شيخ القبايل.]

ما بغيت المحب يعجل اذا مالهوى حل
رسخ الود ياخلي ، وسوس محله
قلب الفكر في راسك ، وقل ليش يهوون ؟
***
بعضنا في الهوى هامل كما الرمل لا هل
كم وكم قال ( نا عاشق ) وما كان اهله
كل ساعة وله ( لبنى ) و ( سلمى) و( ميسون )
***
يا تقع صادق الاحساس مخلص مجمل
او بعد من طريق الخل و العشق جملة
و التعشاق يا سيد الغواني .. بقانون !!

[الرعد]

احلى احلى صوت دان والله رهيب يابو شعفان فظيع هكذا الدان صوت معروف ومشهور ويستاهل المشاركه
وصوتك ماشاء الله عليك لعاد نصيبك بعين مايحتاي كلام وارجو قبول هذه المشاركه
قال الرعد قدني من يومها معتل
ومن لابسات الجنز امسى بمية عله
طول وقتي معلق بحب لينات الغصون

لاشفتها الزينه حسيت قلبي كانه اشتل
من بين اضلاعي وطار مع من شله
وبقيت انا جسد بلا روح مدفون

لامتى والنارتضرم بقلبي وتتشعل
غصب عني لاشفتهن ولعت مية شعله
لاهبه في الحشا وزاد ذاك الرشون

ولاشكيت له حالي غافر الذنب والزلل
يغفرها ذنوبي ويعفينا من كل زله
قبل يوم المنايا وقبل ماسير ع لمتون

الرعد

;birth ;cowboy ;cowboy

[حاتم الطائي]

صابنا سهم من رمش الكحيل المكحّل
لي ليالي مقهّد ما خذ الطرف كحله
قابل الطعن في ظهري ولا سهم لعيون
***
كل من شاف زينه قام كبّر وهلّل
وارتجى الوصل منه والتقرب من اهله
بالحلال المحلّل تحت منديل مأذون
***
والمصيبة بقلبي قط ماطاع يعقل
في دروب الهوى مايحتكم لامر عقله
والمحبة تعيبة ريت بالحب تدرون

[سبع الليل]

ذي دخل في بحور العشق قالوا تغلغل=ماقدر عا ضجيج البحر لاوالغليله
والذي هم معه دخلوا لزوما يغرقون
قالوا العشق ذي الايام دربه تحول=كم لقوا له ميه والفين دبره وحيله
هكذا سالف العشاق دايم يحيلون
بابعد من هواءالكذاب احسن وافضل=مانحب المشاكل قط نحب الفضيله
ماقدر عاالذي هم للمصالح يخبون

;alia :) :) :mad: :p :p

[الزعيم]

قلت باحب قالوا لي سرح يالمبدل
حب ذا الوقت يبغا له عمامه وبدله
وين اهل الهوى للعشق هم بايدلون


كلما جيت عنده قال لي رح تعدل
كيف اسوي وانا فوق راسي الف عدله
من هوى الغيد صيحته على لي يعد لون


لو سمحتم تكرموا علي بالتصحيح .. وينك ياشعفان .. ريض والا ماهو ريض ......لاتتركنا وحدي .....

[الشعف]

من دخل في بحور العشق قالوا مغفّل
مادروا ان بحر العشق يوخذك غفله
بحر غامر وموجه كير بالنار مرشون
***
كم تصبّر قليبي كم ويا كم تحمّل
من حَمُول الثَّقَل عالظهر عشرين حمله
ماحملها مثيلي لا ولا بايقدرون
***
كم جرعت الصُّبر لجله وشربي من الخَل
من يحب ما يعابر لو يدحقّه خله
ما يعوّل اذا عظمه من الدحق مطحون


كيفكم ياشعارنا ؟؟ .. كنكم خفشتوا :D
آسفين على الانقطاع المفاجئ للانشغال الشديد ... سامحونا

استاذي القدير ( جمال العطاس ) : اشكرك على سرعة تجاوبك ودقة الوزن والمضمون .. بس لي ملاحظة بسيطة جدا ويبدو انها ناتج خطأ طباعي .. حيث يوجد بيت واحد مختلف القافية وهو :
لاتبسّم أسر قلبي ووجهي ( تهلل )
مثل بدر السماء وابهى واجمل اذا ( هل )
اما البقية ماشاء الله مثل الشهد .. والعفو والسموحة يااستاذي .

شيخنا الموقر ( شيخ القبايل ) .. ماشاء الله ياخير تعديل مضبوووووط كما الطاب ماشاء الله .. كذلك المشاركة الاخيره موزونه 100% ;) ... اشكرك من صميم القلب ولا تبخل علينا بالتوجيه .

اخي الحبيب ( الزعيم ) .. سلامات ليه القيصريه .. بس الحمدلله انها ماهي بالقصرية :D ... عموما ماشاء الله موزونه جميعها ماعدا هذا البيت :
( من بعد ماشوفهم قطعوني مية وصله ) .. يحتاج الى اعادة نظر ;)
والعفو منك .

اخي الغالي الرعد : مشكور على المجاملة .. والحمدلله ان الصوت عجبك ؟؟!:D
عموما سعدنا بمشاركتك .. وياريت تتكرم وتركز على الاوزان قدر الامكان وتحاول تعديلها .. ماقصرت .. شاكرين مقدما ;)

شيخنا ( حاتم الطائي ) : شاكرين مشاركتك وما شاء الله موزنه .. لاتحرمنا منها على الدوام .

سبعنا الهمام ( سبع الليل ) : الف الحمد لله على سلامة وصولك .. وينك من زمااان ؟؟
عموما مشاركتك موزونه جدا .. وانما اختلفت القافية فقط .. على سبيل المثال:
افضل *** فضيله
المفروض : ( افضل *** فضله ) .. لكن من ناحية الوزن جدا موزونه .. والعفو منك ولا تقطعنا كثييير ;)

المهم ياشعارنا .. الشور شوركم ان تشوفون الفصل غلّق .. ياريت حد يفصل يحاوشنا قليل :D .. ومش شرط يكون غزل !! ممكن نتطرق الى مواضيع اخرى كالسياسة مثلا .
وان بغيتوا نحن نوقف الى بعد رمضان ان شاء الله .. اللي تشوفونه خير.
وشهر مبارك مقدما وكل عام وانتم بالف خير .

تقبلوا تحيات تلميذكم المخلص ,,,

[حاتم الطائي]

ينشرح خاطري لو سيّد الحور اقبل
منيتي بس الاقي من مباسمه قبله
منْه قبله ترجّع روح من كان مدوفون
***
كل شي في غيابه ياعرب عيف يمتل
ما يفارق خيالي مابدا يوم ملّه
ريت عيني بعينه والتحاور بلعيون
***
المحبة مثيل الزرع بالهجر تذبل
لا تظن الهوى خطبه وتلبيس ذبله
عاد جبر الخواطر والموده لها تصون

[طالب النعماني]

ياسلام والله على الابداع والكلام الجميل
واعذروني اخواني لعدم المشاركه وليسى تقصور مني ولكن عدم المامي باللحن مع العلم ان اللحن المرفق لم اسمعه لان السماعات عندي عاطله وانا جديد على النت وجديد ايضا على الالحان هذه فاارجو المعذره
واشكر اخي الشعف على ابداعه الجميله وعلى الفكره الرايعه والى الامام
تقبلوا تحيات اخوكم ابوراضي

[سبع الليل]

بانرتب على كل باب اول بلول=في عدن قالوا البحر يكثر بلوله
في سواحل عمان اللول واجد وسمعون
وان تباء الصدق قل للشيخ مني تميل=الكحل في المكاحل لكن الشيخ مله
والعور في عيون الذي هم يشوفون
قال بوزيد مابسمع سواء لي تقول=في السمر ياما قال كثره وقله
والذي ينسطون مفروض لا لا يكذبون
الفلك دار يابخت الذي هو توسل=من معه سيف هندي شل سيفه وسله
مايفيد الندم لا جوله الناس يشكون

[استاذ الشعراء]

السلام عليكم ورحمة الله وباركاته
ارجوا ان تقبلون ضيفا وناقد في هذه السقيفه
واعدم بعدم المجامله
وارجو ان يسمح لي المشرف على السقيفه بهذه المهمه
ويسمحلي ايضا الاخ الكاتب لهذا الموضوع واشكره على اهتمامه بهذء التراث العظيم

حتى لا اقع في الاحراج من احد من اشعراء اعلمكم اني لست بشاعر
ولكن ناقد
ههههههههههههههه
تحياتي للجميه

[سالم محمد بلفقيه ((الشرقاوي))]

ياسلاااااااام والله شي لايصدق الشغله متعووووب عليها ياشباب
يعطيكم الف الف عافيه 0


وبصرااااحه يشرفني كشاعر ان اشارك معكم:D :D :D :D :D :D :D

والحليله ماتجي الا بعد رمضاااان :p

اسجل اعجاااااابي وكلكم ماقصرتو يا شعار وكذلك لاانسى الاخوان
الذين عملو الدويتو الخاص بهذه المشاركه الجميل والرائع ;)

وماشاء الله صوت جميل واخراج قمّة في الرووووووعه 0

[الشعف]

جيت اسلم على من حط رجله ولا شلّ
سبعنا لي بصوت الدان دندن وشلّه
قول ماكن ممكّن مثلما الطاب موزون
***
باتخبّر على باتيس في الهجر طوّل؟!
له زمن في غيابه .. نرتجي منه طلّه
الحذر بعد هذا ياصحابي تغيبون
***
شهر رمضان لي بالخير والنور اقبل
ريت فضله يعم الناس بعده وقبله
شهر واجب علينا فرض في الدين مسنون


كيفكم ياشعارنا
شهر مبارك وكل عام وانتم بألف خير

العزيز ابو راضي : اشتقنا لك يارجل ؟؟ وينك قطعت نحنا وكذها هي ;)
عموما لا تحرمنا من مشاركاتك ... وان شاء الله نتواصل بعد رمضان .

سلامي الحار لشاعرنا القدير ( سبع الليل ) .. ماشاء الله ابدعت في الشطر الاخير وزن وقوافي .. والسموحة ان زلينا ;)

استاذ الشعراء : على الرحب والسعة .. ومنتظرين نقدك وبدون زعل !!
بس كيه ناقد في الشعر ولا انت شاعر ؟؟ ;) .. بانتظار نقدك .. وشهر برك عالجميع .

الغالي الشرقاوي : مشكور على الاطراء ;)
المهم مادام الحليلة باتجيك بعد رمضان .. نحن على احر من الجمر في انتظار مشاركاتك معنا .. بالعافية بعد رمضان ;)

وان وقع لي اجيب فصل في رمضان ( موضوعه عن رمضان ) بانجيبه ان شاء الله .

وشهر مبارك عالجميع ...
نسأل المولى ان يجعلنا من صوّامه وقوّامه وعتقائه من النار .
ومبارك عليكم الشهر

محبكم
الشعف :)

[جمال العطاس]

شهر مبارك يابوشعفان .
كيه قفلت الموضوع !! عاد الهاجس الا جاء ذلحين
:D :D :D
كنا مشغولين بمواضيع قدك داري بها يابوشعفان::) :) :)

البيت الذي اوردته صحيح فيه خطأ ولم انتبه له الا بتنبيهك لي
جزاك الله خير . وذلك لأني اكتب الأبيات فورا . واحيانا وانا في عملي
من اجل مشاركتكم .
طالما وردت كلمة ( تهلل ) فمقابلها ( أهله ) ( وهله ) وغيرها

ولكن خذ التصحيح :

لاتبسم اسر قلبي ووجهي ( تهلل )
كالقمر في مداره يوم شّوع (وهلّه ) أي هل في مداره
من ضياء نور وجهه تنجلي ظلمة الكون

والمعذره يابوشعفان على عدم التركيز قدك عارف ليه
:) :)

أهلا بأستاذ الشعراء . ومنتظرين نقدك !!
ولكن مثل ماقال الشعف . كيف ناقد ولست شاعر ؟؟
;) ;) كيف ستعرف الأوزان على الأقل !!
عموما أهلا بك اخ عزيز :D :D

[الــــدوعنـي 2005]

شباب ورا ماحد شعار عندكم تجاملون انفسكم
خمسه شعار في كل مساجله الاقيهم وين شعار حضرموت وين راحوا
مافيه الا انتم

[طالب النعماني]

[/poet]
قال باتيس كن الباب سدي تقفل
شي بصر شي بصيره باتجيبون قفله
لا فتحنا لكم قرصه تجيبون كالون

ريت خلي ومضنوني بذا الشرط يقبل
مابغينا من المضنون ماغير قبله
قبلة الزين تطفي كير في الجوف مرشون



المعذره اخي الشعف اذا ماهي على الوزن
تراني متعلم وانته استاذنا وانا تلميذك
ارجوا منك اذا كان على الوزن او خارج الوزن تخبرني

وتقبل تحياتي
اخوك ابوراضي

[الشعف]

سلاااااام عليكم .. وجمعه مباركة
ايهييييي والله كم لي معاد افتح الصفحة ذي اعذرونا ... تعرفون رمضان ومشاغله ... بس انا ان شاء الله عند وعدي .. بانجدد اللقاء بعد رمضان ... مايقع رمضان ودان ;)

المهم ابعث تحياتي للجميع ... واخص
بوهاني : والمعذرة على تأخر اطلاعي .. وكلك نظر ياحبيب جمال .. وربنا يكون في عونك .

الدوعني 2005 :
الرسالة الأصلية كتبت بواسطة الــــدوعنـي 2005
شباب ورا ماحد شعار عندكم تجاملون انفسكم
خمسه شعار في كل مساجله الاقيهم وين شعار حضرموت وين راحوا
مافيه الا انتم
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اولا اهل بك في السقيفة .. هذا اذا ماكنت من حلانها اصلا ... واللي يقرأ ردك يبان انك اصلا وفعلا واحد من حلانها .. واتوقع انك داخل عرض شوي .. كما استاذ الشعراء ؟؟ وان كان ردك مقصود به الاستفزاز ... انا باقول ( اللهم اني صايم ) >>>>> على فكرة اسلوبك معروف !!!
واللبيب بالاشارة يفهم ..


ابو راضي : اولا مبروك الاشراف .. والعفو على التأخير عن جد تستحق يابوراضي .. ومشاركتك عالعين والراس ..وحاشا لله انت استاذنا مانحنا الا تلاميذكم .. ابدعت يابوراضي صح لسانك .. وان شاء الله تروح وترجع لنا بالسلامة.

وللجميع اصدق واخلص المحبة والوفاء
والى الملتقى .

[الــــدوعنـي 2005]

الاخ/الشعف الموقر
تحيه طيب
اولا اعتذرلك اخي على الرد الذي سويته لكم ولكن يعلم الله ان ماكنت اقصداستفزازكم ولا التقليل من حقكم حاشالله انتوا تستحقون الشكر والثنا على ابداعكم
وصحيح قلت تجاملون بعضكم وكان قصدي ان تتشادون لان القصيد لاقدفيه مشاده يحلا ويبين لكم فصل في القصيد ولكن ماكان قصدي فتنه والعياذبالله وقلت انتوا خمسه شعار فقط قصدي الذي عليكم العمد
في السقيفه والنقد بايكون عليكم عمالقت الشعر ويشهدالله اني انتظر رددوكم وقصيدكم على احر من الجمر وكل يوم ادخل السقيفه اكثرمن عشرمرات ولاادخل الا سقيفتكم فقط وياليتني شاعر
هذا ماحبيت ان اوضحه لكم والمعذره على الاسلوب حقي تحملوني اخواني انا ابنكم واخيكم الصغير

العفؤ والمعذره

[ثابت بن ماضي]

قل لطالب اذاصاحبك قدمال او زل=غض واصفح عن المضنون لاجات زله
القمروالكواكب في سماهم يزلون
وان خطاء يالعبيثي لجل خلك تحمل=يندم الادمي ذي ماينول بحمله
وانت قد الثقل تقدر تشل عشره اطنون
واخرالقول قالوا الناس ماقل ومادل=وكل انسان بسلوبه وطبعه ودله
دلوا الشيخ ياباتيس لو باتدلون

[طالب النعماني]

احسنت يالشيخ وصح لسانك

ابدعت والله وكلام في الصميم واعذرني كان مفروض اجوب عليك شعرا ولكن عدم وجود وقت جعلني رد عليك هكذا
ارجو ان لاتحرمنا من جديدك


مع تحيات اخوك ابوراضي

[fahtoot2000]

ليه صاحبي يرميني على كل مقتل=باح قتلي واناحرمت في العشق قتله
عادحدبايراجع ناس عمدا يقتلون
جل من صورك كامل مأصل مفصل=من فصول السنه شليت من كل فصله
صانك الله من ذي عالنبي مايصلون
تقبلو هذه المشاركه واشكركم على هذا اللحن الجميل

[الشعف]

السلام عليكم ورحمة الله وبركاته..
ارحب بانضمام كل من الشعراء الافاضل : الشيخ و فحتوت
بالفعل ونعم القول والقايل .. ماقصرتوا ..والسموحه لتأخير الرد والترحيب ;)

وذي للشيخ رداً على ابياته :


شمس تحرق اذا حرّيت منها تظلّل
او تحمّل لظاها لا تبت تحت ظلّه
لو هي الشمس غابت .. انطفت شمعة الكون
***
مايفيد الندم او قول ياليت ولعل
قل مسامح لكل مخطي وبالخير دع له
خلّ ربك يجازي من نوى الغدر ويخون



وذي لفحتوت رداً على ابياته :


لوجرى ماجرى خلّ العجاله تمهّل
لو تحبّه بنيّه .. زيد واعطيه مهله
المحبّه عنيّه مابغت شكّ وظنون
***
شف طريح الهوى قبلك ترعبل تشلّل
يوم قلبه سرح منّه .. مع الزين شلّه
مابكا ما شكا ماباع غاليه بالدون


وان شاء الله نستمر وتستمرون معنا >>>> بعد رمضان بالعافيه ;)

تحياتي لكم وللجميع ,,,,,
الشعف:)

[fahtoot2000]

والله هذا النوع جديد علينا ولكن نحاول
ياسامعين الصوت قبل الهرج نتحمحم
اذا نطقنانبتدي بالمصطفى الاكرم
صلاه تغشى المصطفى الهادي المامون
****
نويت للعمره من ميقاتنالملم
القلب متشوق لمكه زاد شوقه جم
من بايوديني عطيته نقداوعربون

اخواني الجميع الشعف وطالب وجمال والجميع اذا فيه شى من ناحية الوزن انا قابل للنقد000000مع خالص تحياتي وصوما مقبولا باذن الله

[fahtoot2000]

المعذره ماانتبهت للصفحه الاخيره ورجعت بكم الى البدايه يانودنسنس
العفو منكم

[جمال العطاس]

العفو شوفونا ماتابعت القافيه ويمكن يكون تكرار
إذا حصل منكم السموحه !
فحتوت والله إنك شاعر !! وشاعر


لاتصدّق كلام أهل الفتن أو من أعذل
قل ( لفحتوت ) لاتسمع كلامه وعذله
خلهم كان بايثنون أو بايعذلون

من دخل بحر عِشقُه قُل وقٌل له تحمّل
وإن بغيت الصحيح العشق ياثُقُل حمله
حد تحمّل وحد ماطاقوا اللي يحملون


لي ملاحظه إذا سمح لي حبيبي أبو شعفان والجماعه كلهم !!

الأفضل أن يكون البيت هكذا
أعذل _ عذله _ يعذلون
صحيح انه بغى قُدره زايده لكنه يجي أفضل هذا رأيي
والمعذرة إذا قلّيت الأدب .

[ثابت بن ماضي]

كل عام والجميع بالف صحه وعافيه

ونرجوا من الجميع المشاركه والتفاعل


هذه العيدباوزع على الورد والفل=والذي قد زعل بعطيه ورد وفله
والسلى طاب مابغينا الكواكب يفلون
ليش لاقبلت من صاحبي عني تحول= ليش يبغا الجفاء والعيف من قبل حله
وين اهل الفّكر ذي للمشاكل يحلون
وان رضيتوا انا مخلوق دايم تمهل=باعطي صاحبي شهرين اوشهر مهله
والامل في صحاب الشان ذي مايمهلون
واعتقدبعد مايسمع بذي قلت يقبل=يرد راسه من المشرق الى يم قبله
طبع لجواد بالمعروف دايم يقبلون

[الشعف]

اسمحوا لي على ذا القول بالفصل ندخل
عندي اليوم مثل العيد او يوم دخله
دام لحباب ما قطعوا و دايم يدخلون
***
وآخر القول بختم عالنبي عدّ ماهل
له صلاتي وتسليمي و صحبه واهله
عدّ لقمار لي هلّت و لي با يهلّون


حياكم الله يارجال ..
عيدكم مبارك وكل عام وانتم بـألف خير
ربنا يعوّد العواد على خير .. ولا يحرمنا منكم يااارب;)

وطالما ان الفصل السابق امتلأ وفاض .. فأنا عند وعدي السابق بالاستمرار بعد رمضان
واليكم الفصل الجديد عسى ان ينال رضاكم .. واعتقد ان الصوت معروف ومشهور .. وبانقيس على الوزن

** فصل على صوت **


سألتك بالامانه=ترد الماء قدا شجره ضمانه
نباها بالثمر تبدر=وهي قدها على معداه
( رمانا باهي الغرّه وروّح في امان الله )


** واليكم التسبوره **


سلامي والمشاعر=لأهل الدان .. يوصل كل شاعر
لكم وسط الحشا مسكن=وانتم خيرة السكّان
( هلال العيد قد اقبل وبانحسر على رمضان )
***
وقرّبنا الدفاتر=بغينا الدان .. يحما ليه فاتر!
وانا بالدان بادندن=على ذا الصوت ياهل الدان
( هلال العيد قد اقبل وبانحسر على رمضان )
***
عسى يارب ماطر=يغيث الناس يشرح كل خاطر
وشربه من كرع في دن=ومنها تشرب الوديان
( هلال العيد قد اقبل وبانحسر على رمضان )

للاستماع للصوت انقر على زر ( تشغيل الصوت )
http://members.lycos.co.uk/shouof/for_all/amaneh.swf

ملاحظة:
بالنسبة لقافية البيت الاول .. ( مثال ): (المشاعر - شاعر ) .. اذا ترون فيها صعوبة لن نتقيد بنفس اللفظ وانما بآخر القافية اذا امكن ( مثال ) : ( ماطر - خاطر ) او ماشابه .
بالنسبة للبيت الثاني اعتقد انه لاتوجد صعوبة كبيرة في ايجاد مقابل او اشتقاق للقافيه ( دندن - دان ) وهكذا .. سنتقيد بقافية البيت الثاني كما يجب .. والي تروه مناسب نمشي عليه .
تحياااتي ,,,, الشعف

[ثابت بن ماضي]

من الاعماق اقول للجميع كل عام وانتم بالف صحه والعافيه

وربنا يعيده علينا وعليكم بالخير والمسرات ويتقبل من الجميع صالح

الاعمال
====
وهذه مشاركه على الفصل الذي بداء به الاخ الشعف

============================


يجازي كل صابر=وكل ساجد وكل راكع وذاكر
ولاعلى العبد يمتن=انا اترجاك ياحنان يامنان
(هلال العيد قد اقبل وبانحسر على رمضان)
عساء كل بيت عامر=بذكر الله ذي على الخلق ناظر
ويصفى كل معدن=بحق المصطفى من نسل عدنان
(هلال العيد قد اقبل وبانحسر على رمضان)
كلام الشعف وافر=على الموفر طرح سته موافر
وقد قدر وثمن=ويبغا القول ذي غالي بالثمان
(هلال العيد قد اقبل وبانحسر عبى رمضان)
معي وسط المعاشر=وباقهويه لو تاسع وعاشر
وباحاول تفنن=لانه يستحق كل شخض فنان
(هلال العيد قد اقبل وبانحسر على رمضان)
ولجله بانكابر=وبانصبر وحتى الصوب نافر
وكل من نام يذهن=لان النوم دايم يذهب الاذهان
(هلال العيد قد اقبل وبانحسر على رمضان)

[الشعف]

سرح ياطير طاير=وسلّم لي على صحبي وخابر
لوصله دايم اتحيّن=ولكنّ اللقاء ما حان
***
قريب الشهر ساهر=سبب نظره من اكحل رمش ساحر
وهو بالوصل يتمنّن=مصيبة صاحبي منّان
***
اذا هو حبّ آخر=كرهت العيش من لوّل ولاخر
ولو باموت لي احسن=ولا باناكر الاحسان



عزيزي الشيخ المعذرة على التأخير .. تعرف مشاغل العيد:)
على العموم سعدت بمشاركتك كثيراً
واسمح لي بهذه المداخلة اذا تكرمت والمعذرة منكم سلفاً

بالنسبة للمشاركة ممتازة جميعها في البيت الاول ( موزنه ميّه ميّه :D ;) )
بس البيت الثاني فيهم كلهم طال عليك الوزن شوي ويبغى له اعادة نظر ;) .. عموما ماقصرت يالغالي ووجودك معنا شرف لنا لاتحرمنا من مشاركاتك ...

محبّك/ الشعف

[ثابت بن ماضي]

لك مني كل الشكر والتقدير اخي الشعف على لفت النظر وبالفعل طال البيت الثاني واكيد انا هنهنت بلحن قريب منه واتمنى بل ارجومن كل الاخوه تقبل مثل هذه الملاحظه وغيرها من الملاحظات برحابة صدر لأننا هنا مكملين لبعض ولااحد يدعي الكمال لان الكامل وجه الله
واليك اخي الشعف ولكل الاخوه نفس القصيده بعد التعديل



يجازي كل صابر=وكل ساجدوكل راكع وذاكر
ولاعلى العبد يمتن =انا ترجاك يامنان

عساءكل بيت عامر= بذكرالله ذي على الخلق ناظر
ويصفى كل معدن=بحقه نسل عدنان

كلام الشعف وافر=على الموفرطرح سته موافر
وقد قدر وثمن= وقوله غالي الاثمان

معي وسط المعاشر=وباقهويه لو تاسع وعاشر
وباحاول تفنن =لانه شخص فنان

ولجله بانكابر= وبانصبر وحتى الصوب نافر
وكل من نام يذهن=ولا بايفقد الاذهان

[ثابت بن ماضي]

وهذا جواب للاخ الشعف
=============


سمحلي بالتحاور=وخل القول عا عدة محاور
وفي قولي تمعن=ودقق في التمعان
***
اذا خلك مكابر=بعين الحب للمظنون ناظر
ولاتقلق ولاتجن=وأنس الانس والجان
***
طباع الغيد قاهر=لهن اسلوب في حرق المشاعر
يلينن لك ويقسن=ترفق تكسر البان

[المقدام]

تحيه حاره للاخ الشعف والشيخ وكل حلان السقبفه
وعيد مبارك كل عام وانتم بخير
ونتمنى من جميع الشعار المشاركه ويحلى السمر
وهذه محاوله ان شاء الله تكون على الوزن وان شي
ملاحظات وافونا جزاكم الله خير

ووافتنا البشائـــــــر ***بان القول لاهل الدان عامر
وكل يـــوم يتــــزين ***وبالتجديد كــــل مـــــا زان

وباندخل مــباشــــر ***وخل طبعك ودودي بعد ساير
وخل الشوق يتكون ***ولاتـــــندم على مــــا كان

وذللى عشق آسر ***بغى حيله و بالحيله باتصنع مآثر
تلطف بالهوىو تأن ***واكـــسب كل شي لا آن

[الفراهيدي]

السلام عليكم
والله ابيات حلوة وتستاهلون الا محضرة ام اربعة وواحد يسجع بالدان ،
ذحين انا باعطي رايي لكل واحد فيكم بس لاحد يزعل :( لاني باحكم على الشعر من الباب الموسيقي حسب ما اشوفه وربما يكون كلامي صح او قريب للصح او بعيد :D والمهم خلوا الخوطر صافيه ،

وبمناسبة العيد : كل عام وانتم بخير ومن العايدين ;birth

[الفراهيدي]

بسم الله ابتدينا
(اختلال الوزن الموسيقى لاينقص من مقدرة او قيمة الشاعر)
نبدا بالفصل الاخير : رمانا باهي الغرة........

:)
قول الشعف : سلامي والمشاعر ....... الى اخر الابيات
الوزن الموسيقي : تام
:)
قول الشيخ : يجازي كل صابر # وكل ساجد وكل راكع وذاكر
<كل> الاولى : الام متحركة
<كل> الثانية والثالثة :الام ساكنة والوزن تام
قول الشيخ : ولاعلى العبد يمتن : اعتقد فيه خلل
قول الشيخ : انا اترجاك ياحنان يامنان : اعتقد طال وفيه خلل
قول الشيخ : عساء كل بيت عامر : خلل موسيقي
قول الشيخ : بذكر الله ذي على الخلق ناظر : على الخلق تصبح : عا الخلق بحذف لام على والوزن تام
وهذا يكفي للشيخ (المقاطع الاول والثاني في كل بيت اغلبها موزونة والثالث والرابع عليك النظر فيها )

:)
قول الشعف : سرح ياطير طاير.. الى اخر المقطع
الوزن :تام
قول الشعف : سبب نظره من اكحل رمش ساحر
من اكحل : النون مفتوحة والالف لاتنطق و الوزن تام
الابيات الباقية موزونة
:)
قول الشيخ : يجازي كل ....... بعد التعديل
ولاعلى العبد يمتن : خلل في الوزن الموسيقي ناقص تفعيله وهكذا الحال في كل المقاطع
وهناك بعض الخلل في بعض الابيات لم اذكرها

:)
قول الشيخ : سمحلي بالتحاور ....
مازال المقطع الثالث ناقص تفعيله في كل الابيات
مثلا : وفي قولي تمعن لو اضفت : لي لاستقام الوزن يعني تصبح
وفي قولي تمعن لي
:)
قول المقدام : ووافتنا البشائـــــــر ...
بغى حيله و بالحيله باتصنع مآثر :هذا فيه خلل بسيط على مااعتقد
وباقي الابيات موزونة

وشكرا والعفو منكم

[الشعف]

هذي لبو شيخ ;)

معك يالشيخ حاضر=وعاقولك انا باقول .. حاضر
وبا دقّق وبتعيّن=المّا تحول الاعيان
***
وبحر العشق غامر=بغا واحد فيِ الغبّه مغامر
ولا يهتم ولا يحزن=ولا همّه من الاحزان
***
ولا يخشى المخاطر=شديد الباس في الشدّه يخاطر
اذا عظمه بدا يوهن=تروّح هيبته .. ينهان



هذي لك يالمقدام;)

دخل لا لا تشاور=وشلّ الصوت يالمقدام باشر
اذا الدّلال ما ثمّن=انا بوفيك بالاثمان
***
وذلاّ وقت عابر=سمع شوري ومنهم لا تعابر
وصل فرضك اذا اذّن=و قفّل سدّة الآذان
***
وخذ حذرك وحاذر=ووقت الحق حذرك لا تحاذر
وبالاقدار قع مؤمن=ورسّخ عروة الايمان


وذي عالبيعه للفراهيدي;)


اذا هو الوزن قاصر=طرح شورك وبيّن ايش قاصر
وخل القول يتوزّن=على شوكتك والميزان


ارحب بانضمام كل من المقدام والفراهيدي >>>> طبعا بوشيخ كذه من آل الدار ;)
كل سنه وانتم طيبون

بالنسبه لاخونا الفراهيدي .. يبدو انه متخصص في هذا المجال اقصد ( الاوزان بالتفاعيل )
على العموم ملاحظاتك على العين والراس ولا عليها غبار .. ولكن اود ان انوّه بأن القياس على الحن المرفق والالتزام بالقافيه هو الاساس في جميع المشاركات .. فلو توافق وزن البيت مع لحن المقطع الاساسي للفصل ذلك المراد .
لي تنويه بخصوص ملاحظتك للشيخ :
قول الشيخ : سمحلي بالتحاور ....
مازال المقطع الثالث ناقص تفعيله في كل الابيات
مثلا : وفي قولي تمعن لو اضفت : لي لاستقام الوزن يعني تصبح
وفي قولي تمعن لي


انت اشرت انه لو اضاف كلمة ( لي ) لاستقام الوزن >>>> معك في هذا الجانب لكن سيستقيم الوزن وتخرب القافية .
خصوصا واننا نلتزم بنفس القافية للبيت او اشتقاقها الاصل ( تمعن - تمعان )
عندها ستصبح ( تمعن لي - تمعان ) >>> مكسوره.
اقترح للتعديل :
نظر في القول وتمعّن ... ( عوضاً عن ) ... وفي قولي تمعّن .

بخصوص :
قول الشعف : سبب نظره من اكحل رمش ساحر
من اكحل : النون مفتوحة والالف لاتنطق و الوزن تام
الابيات الباقية موزونة

اذا كان هناك قصور في الوزن بسبب ادغام بعض الحروف اليك التعديل :

قريب الشهر ساهر *** سبب نظرة كحيل الرمش ساحر

ولاتحرمنا من ملاحظاتك القيّمة ,,,
كذلك اتوقّع انه من الضروري طالما وانك ملم بالاوزان .. ينبغي ان تكون من قائلي الشعر
ان كنت كذلك .. رجاءً لا تحرمنا من مشاركاتك الشعرية .

قبل لا انسى .. اذا ترون الفصل ملان حد يفصل والا باننتظر مشاركات اخرى ليومين لاحقه وبعدها سنأتي بفصل جديد ان شاء الله .

تحياتي للجميع ,,
الشعف

[ثابت بن ماضي]

حيا وسهلا ومرحبا بالاخوين المقدام والفراهيدي

وفي الباديه كل عام وانتم بخير والمعذره يارجاجيل ان تاخرنا في الترحيب

الحقيقه دخلتو ا وانا والشعف نشل من الناضب للرافع الله يهديه دخل

نحنا في ضيق. ولكن لايعني هذا انحن شوي في نفسنا. بس يمكن

مادققنا ولكن مادام دخلوا المتخصصين ( كالفراهيدي) حول الله بانحط

بين الحبتين دجره. بس بغينا واحد منكم يحط الهدف وبانخليها تقرح

عليه من كل جهه . والا ايه بابو الشعووووووووف

:D :D

[الفراهيدي]

شكرا لك يا الشعف وماشاءالله اوزانك مضبوطة , وتصحيحك الاخير مضبوط
وانا شاعر مقل وان اذا جات الحليلة بايقع على قول الشيخ : واحد منكم يحط الهدف وبانخليها تقرح :D :D

هذه تقاطيع الوزن الاخير :


سالتك بالامانه## تردالماء قدا شجرة ظمانه
تباها بالثمر تبذر## وهي كذها على معداه

د - - - د - - ## د - - - د - - -د - -
د - - - د - - - ## د - - - د - - -0

مفاعيلن فعولن ## مفاعيلن مفاعيلن فعول
مفاعيلن مفاعيلن ## مفاعيلن مفاعيلات

طبع هذا اجتهاد مني( ارجو ان اكون مصيبا )
د: ركزه يعني حرف متحرك ينطق لحاله
-: خطيط يعني حرفين ينطقان معا اولهما متحرك والاخر ساكن
0: سكون : حرف ساكن قبله حرف ساكن

وانا لااعتمد على التقاطيع وهذه الرموز ةلكن اعتمد على الايقاع الموسيقى للبيت وهذه التقطيع فقط للعلم

[الرعد]

السلام عليكم ورحمة الله وبركاته
مشكور يالشعف على هذه المشاركات المميزه صوت الدان ونتمنى الاستمرار واعطى الفصل فتره حتى يشارك الكل فلا تتعجل في الفصل
واتمنى قبول هذه المشاركه وكلي امل بالتوجيه منكم والاخ الفراهيدي
هلا بالشعف جاهر = وصوت الدان كلنا بانجاهر
وغن بالدان وتدندن = على اصواته وقل يادان

وحاور كل خاطر = بصوت الدان تزدان الخواطر
وبااكتب وبااوزن = عسى تثقل لنااوزان

اذا ضاقت حناجر = لكل جاحد مكابر اومتاجر
بدين الله يتحسن = وهو ما قد عرف احسان


حسافتة المخابر = على العيفه اذا جانا يخابر
وعاداته بها يفتن = ويفرح فرحة الفتان

اذاالحاسد يفاخر = على الكذبه وصدقهامفاخر
ويظهر لك ويتلون = وكانه ماعرف الوان

الرعد

[جمال العطاس]

كل عام والجميع بخير !! ومن العايدين .
المعذرة للغالي أبو شعفان ولسائر الاخوان على التأخير
انشغلنا عن مشاركتكم شوي . ولايشغلنا عنكم إلا
على ماقالوا اخواننا المصريين ( الشديد أوي )

وأهلا وسهلا بالخليل بن أحمد !! لا تنسانا من ملاحظاتك
شفك ماشاء الله شغّال على الستة عشر :D :D


وعتم الوِد سابر = لبحر العشق انا ماخر وسابر
وفي عشقتي بتفنن = ولايعشق سوى الفنان

وكاس الحب داير= ولو دارت علي بعض الدوائر
أحبه حب مايوزن = ولابايوسعه ميزان

[الفراهيدي]

اليوم بانوزن بالميزان الحساس الديجتال ابو ارقام :D :D

قول الرعد : هلا بالشعف .....
وصوت الدان كلنا بانجاهر : لام (كلنا) ساكنة والوزن سليم
على اصواته وقل دان : ناقص ويمكن تصليحة هكذا
على اصواته وقل يا دان
وهو ماعرف احسان :ناقص تفعيلة ويمكن نضيف خطيط ويستقيم الوزن هكذا
وهو ما قد عرف احسان
وكانه ماعرف الوان : (وكانه) الالف لاينطق والوزن تام
باقي الابيات سليمة ;)
:)
قول جمال العطاس : وعــتـم الــوِد ... الى اخر الابيات
الوزن الموسيقي : تام

وغير ماحد فزع من الوزن حقي شونا قصدي الا خير
;)

[الشعف]

يسعد صباحكم كلكم ..
واعذروني بسبب تقطعي في الدخول .. لانه وبصراحه لا اجد متسع من الوقت الا كما ذا الوقت ;)
المهم ياهلا وسهلا بالجميع وعالخصوص ابو هاني والرعد نرحب بانضمامهم مجددا .. ولبقية الشعار ارق التسليم .

يابو شيخ ;) >>> لا تفزّع الخلق خلهم يدخلون ولا بانقرّح شي :D:D
شف الفراهيدي فزع من كلامك وماذحين عانك الله بايتمي ماسك ميزانه و بس ;) .. بس نحن طمعانين في مشاركاته برضه .. والا كيف يالخليل ؟!! ;).. والضيق يابو شيخ كلنا دخلناه ;) ويكفيني حضورك هنا شرفاً .. حاشا لله مانت شوي يابو شيخ .

على ذكر اوزان الخليل اقول يابن احمد شف ماحد بايقارعك في علمك :D لانه وبصراحه عن نفسي مالي في علم العروض ولا في بحوره الستّعشريّه .. لكن والله شي طيب وجميل ان نجد من يقيم المشاركات ويزنها بميزان التفعيله .. بالعكس يثري الموضوع ويفيد الكاتب والقارئ ويحث الجميع على التركيز .. رجاء خاص استمر على نفس المنوال وياحبذا تغمز علينا من عندك بكم بيت من باب التشجيع ;).. واسمح لي واذا مافيها كلافه عليك نخليك انت الموجّه هنا والمقيّم للاوزان من بعد اذنك طبعاً .. نظرا لإلمامك بهذا الجانب .. واذا حضر الماء بطل التّيمم ;).

اخي الرعد الحنّان ;) .. عودا محمودا وكل سنه وانت طيب .. سررنا بمشاركتك يالغالي .. وماقاله الفراهيدي ونوّه اليه يحتاج من سيادتكم اعادة نظر اضافه الى هذا المقطع من البيت : حسافة المخابر >> ناقصه حرف واحد ويستقيم :
حسافته المخابر >>> تضيف تاء قبل التاء المربوطه وتنطق التاء المربوطه ( هاء ) .. والبقيه بالفعل تامّه الاوزان .. نرجوا استمرارك .

استاذي الفاضل ( ابو هاني ) .. عن جد غيابك عننا ولّد فجوه وفراغ كبيرين .. وقد كنت اتحيّن ظهورك بين الفينة والاخرى .. لكن مادام ظهرت جات البشاير .. والحمدلله انها ماهي جفوه ;) مادامها المشاغل السبب في غيبتك عاذرينك .. عموما سعدت كثيراً بعودتك والعفو والسموحه اذا جات مننا قصره او زلّ القلم .. واذا زل >>>> بانكسره ;):D

ولا زلنا نفتقد للكثير من الاخوه الافاضل امثال شيخنا ( شيخ القبايل ) و سبعنا الهمام ( سبع الليل ) .. كما لا انسى شاعرنا ( ابو راضي ) والذي نتمنى له قضاء اجازة سعيده وفي سهون عودته ... و ملك الفصاحه ( باجرش ) .. وبصراحه الكثير من الاقلام المضيئه لا نريدهم ان يبخلوا علينا بحبر القلم >>>> حتى ولو نقطه تكفي :D;) .....
وسامحونا شونا ملقلق :D
والان ماشي هاجس والا باحط كم بيت .. خلوها بالسهاله يمكن بعدين يجي الهاجس ;)
واتوقع الفصل بلغ حدّه .. بانطرّف فصل جديد للصفحه الجديده ..
الى الملتقى,,,,


طلب خاص من الفراهيدي :
ياحبذا لو تضيف تقاطيع الاوزان بالتفعيله تباعاً مع كل فصل جديد من باب الفائده .. لطفاً لا امراً ;) .. ممنونينك سلفاً,,,,

[جمال العطاس]

أولاً : أشكر الخليل على متابعته لأوزان مايقال !!
متابعته مشكورا لها أثر إيجابي بلاشك على الجميع .
طالما أنه أظهر قدرة وتمكُّن . خصوصاً في الأوزان
وأنا شخصياً أعتبر ذلك شئ ( مثري ومفيد ) .
والنقد أو ملاحظات ( الفراهيدي ) ممتازه جداً ويمكن
للشاعر مناقشته والحوار معه طالما ان النتيجة هي
الخروج بالفائدة :) :)
أتمنى من الفراهيدي الإستمرار . وكما قال حبيبنا الشعف
نتمنى أن يُسهب في بحوره الستة عشر إذا أمكن !!

أخي الشعف : أنت من أهل التكميل ولاتجي منك زله
وحاشاك والله من ذلك . وأنت كماتعلم أنني قد أنشغل
أحياناً بالمواضيع اللي قلت لك عليها سابقا ;) ;)
لكن حضور جلسات الدان شئ مميز ولا بد منه
أشكرك !!!

[الشعف]

جات الحليله ;) .. بس على عجل وتواير:D .. المهم اتن شي قصور لا تبخلوا بالتوجيه..

بسيد الحور حاير=وراضي بالحكم لو كان جاير
على حكمه انا باذعن=وما هو عيب مالاذعان
***
احبه حب طاهر=بكل مافيه من خافي وظاهر
بغيته يوم يتليّن=ولكنّه غلب ما لان
***
وربّ العرش ساتر=وهو عالم بلي وسط السراير
واذا الواشي بدا يعلن=وانا مالي من الاعلان
***
بغينا الدار عامر=بأهل الخير دايم دوب عامر
وباهل القبوله والفن=وكل حاسد مصيره فان


وودت ان اعقب .. خصوصا وانني كتبت الرد قبل ان اشاهد رد ابو هاني ;)
والحمدلله طيّبت خاطري الله يطيّب خاطرك .. الحمدلله مادام القلوب صافيه على الدنيا السلام :D
والله يعينك يابوهاني ويعين الجميع
خالص الود والتقدير
الشعف:)

[الرعد]

الشكر كل الشكر للاخوين الشعف المبدع والمدندن دوما والفراهيدي اللي كل واحد يهابه على هذا الاثراء المبدع للسقيفه ونقدم لهم كل الشكر والثناء وظهور الفراهيدي كان مفاجاه لنا خاصه في هذا النتدى المتواضع
فنرحب مجددا بالفراهيدي اشد ترحيب ونتمنى تواصله معنا واستمراره في تقطيع الابيات ونقده البناء الى جانب الشعف وارجو قبول هذه المشاركه
وهي اهداء لهما من الرعد
انا شعري تناثر = لصوت الدان في الاوراق ناثر
وباندلي00 وفي كل فن = ومعنا الشعف هو فنان

وبو لوزان حاضر = تشيّخ في السقيفه ولمحاظر
ولولاهم ولابدرن = ولا من الرعد بدران

ومعكم يالزواهر = هنا طبتم وطابت الجواهر
وكم شاعر عليكم ثن = كماهم الرعد هو ثان
الرعد

[حاتم الطائي]

السلام عليكم ورحمة الله وبركاته
اجمل التحايا وارق التهاني للجميع
بمناسبة عيد الفطر المجيد
كل عام وانتم بخير وجميع اهل سقيفه بصحة وسلام
المعذرة على التاخر في الحضور , كنا معيدين عند الاهل
وعدنا وانتم كما انتم على نفس الحبوه مجتعين ياليت تنفسون لنا شوي
بانحتبي معكم
آسف اذا اطلت ابياتي ارجوا تقبلها تعرفون شوق المسافر ;)
اذا كان فيه ملاحظات على الاوزان انا كلي اذان صاغيه
وياريت تفصلون لان القافيه بدأت تتكرر وشحّت


هلا بهل المحاضر=وبهل الدان لي غايب وحاضر
وكل عازف هنا لحّن=ورنّم باعذب الالحان

انا كنته مسافر=غصيبه كان ماودّي اسافر
على ظهري حمولة طن=فضيله ثقلت الاطنان

معي صاحب مقاور=ولا يرضى علي دايم يقاور
وفي عشقته بتجنّن=وفي مبسمه و الاوجان

برمي السهم شاطر=وياريته يقاسمنا يشاطر
بوسط القلب مستوطن=وهو غربتي والاوطان

لسيفه دوم شاهر=وفي رمضان ماجانا يشاهر
ويوم العيد ما تلفن=وخلاّ خافقي تلفان

رفض حتى يباخر=وانا اللي كنت عوده في المباخر
وهو بالعود يتدخّن=وانا قسمي جمر ودْخان

لذا شونا مخاير=نويت الهجر بس قلبي يخاير!!
عقدت العزم لا لندن=ولا سيبي اذا حد دان

واذا هو حكم قادر=على ردّه انا مانا بقادر
اذا مالقلب به أدمن=مصيره يترك الادمان


لكم كل الحب والاحترام
وكل عام وانتم بخير

[الشعف]

سلام ياشعب:)
حياكم الله
مشكور يالرعد على شعورك النبيل وهديتك واصله
ارحب كذلك بالشيخ حاتم .. والعفو نسيناه وما انذكر;)
وماشاء الله السيل مايبطي الا من كبره.. اهلا بكم مجددا
كذلك نسينا الزعيم ;) له فتره منقطع عن السقيفه علّ المانع خير
عموما للاسف لم اتمكن من جلب فصل جديد .. لكن بانحاول وقت لاحق ان شاء الله .. اعذرونا على كل حال .

[الفراهيدي]

عفوا ياجماعة على التاخير كنت مشغول شوي

ولنا عودة بس صبروا علي قليل.. بكرة ان شاء الله

[الفراهيدي]

شوكوم خليتونا انتفخ من المدح حقكم, المهم مايخالف بانستمر نقطع ونوزن اما قول الشعر فاعذرونا
وبعدين تعلم الاوزان والتفاعيل لا يعلمك كيف تشعر , شوذي موهبة من عند الرحمن وانا احسدكم عليها ,وطلبك يالشعف بتقطيع كل فصل جديد عروضيا على العين والراس , ولكن لا احبذ الاعتماد على الاوزان العروضية لانها تجعل الشاعر يحسب ويجرد البيت والافضل الاعتماد على الوزن الموسيقى او الايقاع الموسيقي للبيت هوذا الاساس شوه ,
اما تقطيع البيت عروضيا ينفع اذا شكيت في وزن البيت او حسيت بخلل موسيقي او بهدف التعلم,
:)
اما قولك بخصوص البيت : حسافة المخابر
في البداية كنت مثلك حسيت بالخلل الموسيقي لكن يمكن تلافيه بتحريك التا المربوطة

ويصبح التقطيع:

حسافة المخابر
د-د- د--

تقطيع تعديلك :
حسافته المخابر
د-د- د--
وهم متساويان واعتقد يمكن نطق اي منها بدون خلل موسيقي
:)
قول الشعف : بسيد الحور... الى اخر الابيات
الوزن الموسيقي :تام
:)
قول الرعد : انا شعري تناثر...
(ومعنا الشعف فنان) ناقص موسيقيا (مازال الرعد على وزنه الاولي)
يمكن تصليحة هكذا :
ومعنا الشعف هو فنان
باقي البيات موزونه
:)
قول حاتم الطائي : هلا بهل المحاظر.... الى اخر الابيات
الوزن الموسيقي :تام

والعفو منكم

[الرعد]

شكرا للشيخ الفراهيدي كل الشكر والتقدير على هذا المجهود الطيب والذي ان دل على شي انما يدل على حبه للشعر والادب ولا اظنك الاشاعر ومتمكن
من يتقن هذه الموهبه الدقيقه -الحس الموسيقي -بالاضافة الى الملكه الوزنيه ماهي الانتائج من موهبه كبيره تعمقت في وجدان شاعر
على العموم الرعد يكن لك كل احترام وامتنان ياشيخ على تفاعلك معنا في هذه السقيفه وميزانك على الراس ونن العين
والاخ الشعف نناديه طول الفصل الرجا لا تتاخر علينا قط

اخوكم الرعد

[ابوالمنصب]

يامرحبا بابيات يا بو شيخ اسمعنا ابيات من شاعراتت له ذوق له معنى
يكتب كلامه بالذهب مورون بالميزآن

[ابوالمنصب]

يا جما عه كيف نستخدم الصوت

[الفراهيدي]

شكرا اخي الرعد بس انا مانا شاعر يمكن تقول هاوي او محب الشعر , واعتقد قول الشعر الجيد موهبة من الرحمن قبل كل شي, وشاكر لك احترامك
معي راي للاخ الشعف وهو ان يكون كل فصل في موضوع جديد حتى يسهل تتبعها ولا تتكاثر علينا الصفحات
هذا رايي ولاادري هل سيكون له سلبيات او شي اخر
في انتظار رايكم..

[الرعد]

مشكور يالشيخ الفراهيدي ورايك ممتاز بس الغقبه بتكون في تضييق المجال عند البعض وبالتالي سوف تنحصر المشاركات وتقل اكثرمما هي عليه
والراي راي الجماعه

الــــــــرعـــــــــــــد

[الشعف]

بادئ ذي بدء
ارحّب اولا باخينا ( ابو المنصب ) .. حللت اهلا ووطئت سهلا
وشاكرين مشاركتك ولو انها جاءت على وزن اول فصل لكن لابأس بها ;)
بالنسبة لتساؤلك حول كيفية تشغيل الصوت ؟!!
اعتقد اخي الفاضل انك لاتحتاج لاي مشغّل خارجي .. وانما فقط لسماعه وكرت صوت .. فالصوت المرفق بالفلاش يعمل تلقائياً ( لمره واحده ) عند فتح الصفحه .. واذا اردت تكرار المقطع والاستماع اليه مجددا كل ماعليك فعله سوى النقر على زر ( تشغيل الصوت ) الموجود في الفلاش المرفق ... اتمنى ان ان اكون قد افدتك بهذا الخصوص .. وعلى الرحب والسعه .


بالنسبة لميزاننا الحسّاس ( ماشاء الله ;))
اقول للفراهيدي بأنه لا يوجد لدي اعتراض حول ذلك المقترح .. ولكن في اعتقادي ان وجود موضوع مثبّت يشمل جميع الفصول يساعد على ارشفة المواضيع بدل ان تضيع في زحام الرفع والانخفاض للمواضيع ويعصب ملاحقتها وتقل نسبة قارئيها والمطلعين عليها .. ارى ان لايشتت الجهد بالتقسيم ;) وفي الاتحاد قوّه على مايقولون ( وخلّ البيض في طبق واحد ) لعاد يتفقّشن :D
كما ان الزيادة في صفحات الموضوع لا تؤدي الى ثقل التصفح !!
وبإمكانك متابعة المشاركات والردود فور ورودها عن طريق النقر على الزر الذي يأتي الى جوار آخر مشاركه .. حيث ينقلك مباشرة الى آخر رد متخطياً جميع الصفحات وزحمتها ;) ... انظر الصورة المرفقه ادناه :
واللي يروه الاغلبيه نمشي عليه وماعندي اي مانع ..


الشكل التالي يوضّح كيفية الانتقال الى آخر مشاركة مباشرة :

[الشعف]

مساء الخير والاحساس والطيبه .. مساءٍ ما يليق الا بأحبابي

كيفكم ياشعارنا .. إكسكيوز إمْوَا :D:D اعذرونا تأخرنا في الفصل شوي
لاني بصراحة احترت في موضوعه ؟!!
عموماً اليوم جبنا فصل جديد وفكره متجدّده بعيده عن الغزل و دروبه ;)
فكرة الفصل تناقش قضية سياسيه معاصره .. الا وهي بغداد ومايدور فيها
سنتناول الاوضاع منذ بداية الغزو وماقبله ومابعده ومايدور في هذه الاثناء اذا أمكن..
ارجوا ممن يريد المشاركة ان يتقيد بفكرة الفصل وقافيته
علماً بأن القافية مفتوحة ولا تعتمد على الاشتقاق او التقيد بنفس اللفظ
وانما على نفس الحرف ( حرف اللام ) وماقبله مفتوح - في البيت الاوّل - مثال : ( يشتَل )..
وفي البيت الثاني مسبوقاً بياء مثال: ( الليل ) والعفو يمكن تكون القافيه عسيسة شوي
لكن ممكن تناول لبّ الموضوع بإيجاز وبجرعه مركّزه على فحواه ..
ارجوا الاّ تزيد عن ثلاثة ابيات;) لإفساح المجال للغير كي يشاركوا ;).
اتمنى ان ينال الفصل استحسانكم ورضاكم .. وفي ترقب لمشاركاتكم
مع تحياتي للجمييييع,,


** فصل على صوت **


جزاتي يومنا حبّك وخلّيتك مزيّد=وكلّ النّاس في ما قد لقيته فيك تشهد
اذا ناديتنا لبّيت لك عيني وياسيد
( توقّع ياحبيبي لا تغرّك شبعة العيد )


** واليكم التسبوره **


خرج ذا فصل والثاني وصوت الدان يشتل=مع السمّار في السمره ابد مايوم يمتل
كذا معنا القمر ساهر ينوّر عتمة الليل
( وشبّوا جمرة القهوه وزيدوا وسطها هيل )
***
بغينا نكشف الساتر ندوّر له على حل=قدا بغداد والبصره عقدنا العزم نرحل
نردّ الصّاع لَصْحابه ونردف كيلهم كيل
***
بعد ماكان متنعّم صبح ماليوم محتل=وضاعت منّه العزّه وفي ساعه تبهذل
كلامي مختصر واضح وما يحتاج تأويل

http://members.lycos.co.uk/shouof/for_all/jazaty.swf
مساهنينكم ,,,
;););););)

[الفراهيدي]

شكرا للاخ الشعف وبالنسبة لموضوع (تقسيم كل فصل في موضوع )رايك سليم وسوا الي هو افضل

هذه تقطيع الفصل :
اولا يتم كتابة البيت كما هو ثم يتم كتابتة عروضيا (ماينطق يكتب ويحذف مالا ينطق)
ثم يتم تقطيع البيت حسب الشفرة حق الخليل
ثم يتم مطابقة التفاعيل
( بعض اشياء اجتهاد مني ولكن لاتوثر على الخلل الوزني للبيت )

جـزاتي يـومنا حـبّك وخلّيتك مزيّد
جزاتي يو # منا حببك # وخلليتك # مزييد
د - - - # د - - - # د - - - # د - -
مفاعيلن # مفاعيلن # مفاعيلن # مفاعي

وكلّ النّاس في ما قد لقيته فيك تشهد
وكللن نا # س في ما قد# لقيته في # ك تشهد
د - - - # د - - - # د - - - # د - -
مفاعيلن # مفاعيلن # مفاعيلن # مفاعي

اذا نـاديتنا لـبّيت لـك عيني وياسيد
اذا نادي # تنا لببي # ت لك عيني # وياسيد
د - - - # د - - - # د - - - # د - - 0
مفاعيلن # مفاعيلن # مفاعيلن # مفاعيل


كما هو واضح الفصل متناسق ومتناغم في كل اجزاءة الثلاثة ماعدا الجز ء الثالث تم اضافة سكون (0) في اخرة وهذا غالب على اكثر قصائد الدان

:)
قول الشعف : خرج ذا فصل.. الخ الابيات
الوزن الموسيقي : تام

[حاتم الطائي]

كما لفلام عالشّاشه وحلقات المسلسل=على مَرْأَ من الحضّار كلّه كان يحصل
قوافل غازيه تزحف وتمشي في اساطيل
***
مشاهد مفزعه ترهب تخلّي العقل يذهل=برغم الجور والعدوان ما واحد تدخّل
ووقفوا في صفوف الظلم واعطوهم تساهيل
***
وطاح الفاس فوق الراس والحاكم توكّل=ومرشوا منّه السلطه وقالوا له تسهّل
ونسيوا انّ ذاك الراس له يدّات ورجيل

قويتوا
حاولت جهدي وان شاء الله يكون عالوزن والمضمون
بإنتظار انتقادكم

[الشعف]

كيفكم ياشعارنا ؟!!
ووينكم ؟؟
عندين الفصل ماقال قش
ان شفتوه سقيم والا غيرناه
المهم انا كنت ناوي تأجيل الفصل كي لا نمل من الدان ولكن بناء على الطلب فصلنا .. ويبدو انكم مشغولين او غير لاهيين .. لذا عندي مقترح ان نضع فصل جديد كل اسبوعين او شهر على الاكثر
عشان مايقع الغداء رز والعشاء رز والصبوح رز :D
بعدين الكبد تحوش منه ;)

انتهزها فرصه لكي اشكر الخليل بن احمد ;) على جهده الواضح في وضع الميازين وتقطيع الفصول .. وبراعته في ذلك .. خالص الشكر والتقدير والاحترام للفراهيدي ... ربنا لايحرمنا منك على الدوام

العزيز الغالي حاتم الطائي .. مشكور ياسيدي على مشاركتك ومضمونها وذي غلاق لها .. المهم لاتخلينا كلّم نفسي وحدي ;) واستمر معنا .


يمين الله ود لحمر فيِ الغبّه تغلغل=وحط رجله على مجمر وسطه النار تشعل
ولا با ينفعه باسه اذا الذّرّه كَلَت فيل
***
وكذه اليوم يتباكا على قوّات تُقْتل=وفرّت منّه الحيله وسبّر شوه يوحل
عور عينه بيدّاته وباقي يقطب الذيل
***
ولازم سترة الباطل يجيها يوم تِهْتَل=وكل من كان مستقوي يقع له يوم يِعْتَل
وكل ظالم ومتجبّر يذوق المرّ والويل


وووييييييييييييييييييييييينكم كم كم كم كم كم >>>> صدى :D:D:D;)

[الفراهيدي]

كيفكم اليوم

:)
قول حاتم : كما لفلام ..
الوزن : تام
:)
قول الشعف :
يمين الله ود لحمـر فـيِ الغبّـه تغلغـل : اعتقد فيه خلل بسيط
باقي الابيات تمام

وين الشعار !

شو ذي قهوة تفور على الجمر :D :D

( وشبّوا جمرة القهوه وزيدوا وسطها هيل )

[الفراهيدي]

كيفكم اليوم

:)
قول حاتم : كما لفلام ..
الوزن : تام
:)
قول الشعف :
يمين الله ود لحمـر فـيِ الغبّـه تغلغـل : اعتقد فيه خلل بسيط
باقي الابيات تمام

[شبامي اصلي]

تحية إكبار لكل الشعراء المتواجدين في هذه الجلسات واخص مقدّم السمره اخي الشعف على مدى اربعه شهور لا ادخل السقيفه الا لحظات معدوده لمشاغل خاصه كان الله في عون الجميع واسمحولي ان اتطفل عليكم بمشاركتي لعلها تستمر شهورا عديده وانها لبضاعة مزجاه امام ماقدمتموه من عطاء جزيل وعلى نف الموضوع :



ويفرض من زمن سابق تشل عفشك وترحل = ولا تجلس لذي الدوخه وذا يومك مبدل
حسبت إنك إذا ناديت في صفّك رجاجيل
***
تذكر زام ماكنت تجيب الربط والحل = ولا جاء قط في بالك يقع مطلع ومنزل
وقع لك مثل من حامت على راسه الابابيل
***
أراد الله من هونك لكل مغرور يعقل = رويد أرويد يامن هو في حكمه مبجّل
مانته في محل موسى ولا في حكم جبريل

[الشعف]

بسألك ياعاشور عن حال البلد !!
بالله خابر عاد حد من بعد حد ؟!

كيفكم يارجال..
المعذرة للانقطاع الاجباري تعرفون آخر السنه وضواحيها :D
وانا كذ نفخت علجمره لمّان انطفت وشنّنت القهوه .. لكن ويومه بانحرّرها وعليكم الهيل ;)
المهم ذي لك يالفراهيدي ;) ومشكور عالملاحظة القيّمه ..
وان شاء الله التعديل يكون تمام :

يمين الله ود لحمر وسط غبّه تغلغل=وحط رجله على مجمر وسطه النّار تشعل
ولا باينفعه باسه اذا الذّرّه كَلَت فيل===================================

الغالي ( شبامي اصلي ) .. عوداً محموداً بعد طول غياب؟!!
وحاشاك من التطفل وشفه الا نحنا المتطفلين ;) .. اشكرك من الصميم على المشاركه
ونطمع في استمرارها .. وحاوشنا في الفصل ;)


من الاعماق بارحّب بمن جانا توصّل=كريم الاصل ( يالاصلي ) .. وذا دارك تفضّل
طربنا وانطرب معنا وخبّر بالتفاصيل
***
اذا بَتْلوم ياصاحب على ( واحد )!!تمهّل=ضروري اللوم بالجمله على (العشرات) يشمل
على كل من ظلم شعبه و عيّشهم بتنكيل
***
وشف ( عامر ) فتح داره وذا يومه مغفّل=و يا خوفي من ( الغشمان ) بعده و ( المشلّل )
لان السيل له قدمه وتتبعها تحاويل

[الرعد]

السلام عليكم


نسي صدام ايه لقى بجيرانه وبهذل = غدر بالعرف والقانون هو والشرع عطل
وطن مسلم غزاها الحرامي بالأباطيل
*****
تنصب للعرب قائد بمرسوم تاسرل = تغطرس بالدعاية ما عرف انه مغفل
وعجل في زمن ساعة حصد انفس بلا كيل
*****
نهج قانون ما يرضه لنفسه لو يصمل = يطبقه على شعب الكويت الحر وسهل
لأمريكا ذهب اسود ملايين البراميل
*****





الـــــــــــرعـــــــــــد

[الفراهيدي]

قول شبامي اصلي : ويفرض من زمن ..
الوزن تام

:)
بالنسبة للشعف البيت السابق : يمين الله ود لحمر وسـط غبّـه تغلغـل
الخلل يبدا من ( ود لحمر) ومازال الوزن فيه خلل بسيط على ماعتقد
:)
قول الشعف : من الاعمـاق ..
الوزن تام
:)
قول الرعد : نسي صدام ..
وطن مسلم غزاهـا الحرامـي بالأباطيـل : خلل بسيط يمكن تعديلة :
وطن مسلم غزاهـا ذا الحرامـي بالأباطيـل
يطبقه على شعب الكويت الحـر وسهـل : البداية (يطبقه) خلل بسيط
باقي الابيات موزونة

;)

[الرعد]

الاستاذ الفراهيدي السلام عليكم
شكرا جزيلا لك على الملاحظة 00ولكن للاسف لم استطع تعديلها لطول المده المحدده
واتمنى ان نستغل وجودك معنا بعد موافقة المشرفين باتيس وباذيب وسعادة المشرف العام بوضع دروس في علم العروض وناخذ البحور اول باول مع جوازاتها ووضع امثله عليه وفتح باب المشاركه للتطبيق على كل بحر مع جوازاته فمثلا ناخذ البحر الطويل لفترة اسبوعين لادراج اشعار من اقوال الاخوان في السقيفه بعد وضعك تفعيلاته وجوازاته حتى نستفيد ويستفيد الكل ويكون الموضوع مثبت في السقيفه

ارفع اقتراحي اولا للاخوان الشعراء باتيس وباذيب والىسعادة المشرف العام وذلك طبعا بعد موافقة الاستاذ الفراهيدي
واهيب بالاخوان الشعراء الشعف وجمال العطاس واحمد العطاس والطائي وشبامي اصلي وفرتوت وبن ماضي وسبع الليل وجمال الروح والطاغيه وباعمران والحضرمي وبن هاشم والزعيم وشيخ القبائل والشيخ وباجرش والمقدام وكل الشعراء الذين اثروا هذه السقيفه الطيبه الذين خانتني ذاكرتي من استحضارهم الان بتزكية هذه الفكره ولقد ترددت كثيرا في طرحها ولكن حتى نتعلم ونستفيد من الفراهيدي وميزانه الديجيتال اللي يكسر الراس وكلنا امل ان الاستاذ الفراهيدي لن يخذل اخوانه من هذا الطلب;) ;)

ويظل هذا الموضوع مثبت في السقيفه ليستفيد منه الاعضاء القادمين والاعضاء الذين يحبون الشعر من مدرسين وشعراء متمكنين وشباب كالرعد يحبون ان يتعلموا الشعر00اكرر اعتذاري ان سقط اسم شاعر سهواء من القائمه اعلاه واكرر النداء للاستاذ الفراهيدي
والمؤازره من المشرفين وسعادة المشرف العام واهيب مرة اخرى باخواني كل الشعراء
والله من وراء القصد;

[الشبامي]

اقتراح مفيد وجميل لن يفوقه فائده وجمالا الا موافقة استاذنا الفراهيدي عليه
نحيل الأقتراح اليه ونأمل موافقته عليه

[الرعد]

الحمد لله ان المشرف العام اكد فايدة الاقتراح
شكرا سعادة المشرف العام ونامل متابعة الموضوع مع الاخوان الفراهيدي وباتيس وباذيب

واهيب بباقي الاعضاء الذين لم يردوا ولو بالاعتراض حتى على الموضوع برغم اني توقعت المعارضين كسائر المواضيع في السقيفه
صدقوني اخواني الموضوع الكل بايستفيد منه وسيظل موضوعا متميزا تنفرد به سقيفة الشبامي
فهل من مجيب

[الفراهيدي]

شكرا اخي الرعد و المشرف العام واوامركم على الراس والعين

اما بخصوص دروس العروض انا موافق بس اصبروا قليل حتى احضر نفسي واجهز الدروس

[الشبامي]

في الأنتظار اخي الفراهيدي

[طالب النعماني]

فكره رائعه اخي الفراهيد نرجوا منك الاهتمام بالموضوع وفي الانتظار
مثل ماقال اخي المشرف واشكر الرعد على الاهتمام والى الامام

[جمال العطاس]

السلام عليكم ورحمة الله وبركاته !!

أولاً المعذرة على التأخير . والفكرة أكثر من رائعة طالما أخينا ( الفراهيدي ) . سيفيد الجميع فلذا يجب علينا إستغلال تواجده الكريم .
ويقول المثل : اللي يفيدك خير من اللي تفيده :D :D
فلذلك أدعم هذه الفكرة جداً ونرجوا من الفراهيدي ان لايبخل علينا وحاشاه من البخل !!!:D :D

[شيخ القبايل.]

ما زلنا نمضغ الفكرة .. ونسينا الاستمرار في سمر الدان !!

[طالب النعماني]

اعجبتنا الفكره اخي محمد ومنتظرين صاحبها ولكن اذا عندك فكره ثانيه او تريد تسمر على الدان سمعنا ماعندك وهت من افكارك لاتبخل علينا

[شيخ القبايل.]

اقصد ان الفكرة جيدة .. وموافقين عليها فلنستمر بالدان . وليبدا الخ الفراهيدي .

اعتقد ان كل من يريد افادتنا بشي لعاد يشاور

حد يكره الاستفادة ؟

[طالب النعماني]

الاخ محمد نودي نسمر على الدان ولكن ماحد مغني معنى
ومنتظرين للشعف يضع لحن للشعار او حد من اهل الخبره يتفضل فينا

[fahtoot2000]

السلام عليكم جميعا واعذروني لغيابي وتاخيري واعتبرو اني انضميت اليكم الليله بس لما يجي الفصل وسلامي للجميع وكل عام وانتم بخير

[سبع الليل]

ذا خرج فصل والثاني على الصوت بانحضر= لجلكم ياعرب باحيي الدار وحضوره
صيم من امس لكن اليوم بفطر= والذي هم معي صاموا غداً بايفطرون
اسمحوا لي وانا حضر على الصوت باسبر= قال سبع الليالي عذر مادلي بتسبوره
هكذا عادت اهل الدان تسمر= جيت لاجل السمر ياهل السلاءلي تسمرون





نرجو المعذره على هذا التطاول بحيث اننا اول مره نشارك معكم في هذه الجلسات الجديده
هذا الصوت على وزن صوت قديم يقول/ يامحمد نشوف الناس في المذهب العاشر ___ كل واحد بغاء الا بايصحح بعرقوبه__
لا ثلاثه ولا هم خمس تعشر ____ ياجميلي ومعروفي مع كلب عرقوب

[سبع الليل]

ذا خرج فصل والثاني علىالصوت بانحضر=لجلكم ياعرب باحيي الدار وحضوره
صيم من امس لكن اليوم بفطر= والذي هم معي صاموا غداً بايفطرون
اسمحوا لي وانا حضر على الصوت باسبر= قال سبع الليالي عذر مادلي بتسبوره
هكذا عادت اهل الدان تسمر= جيت لاجل السمر ياهل السلاءلي تسمرون




نرجو المعذره على هذا التطاول بحيث اننا اول مره نشارك معكم في هذه الجلسات الجديده
هذا الصوت على وزن صوت قديم يقول/ يامحمد نشوف الناس في المذهب العاشر ___ كل واحد بغاء الا بايصحح بعرقوبه__
لا ثلاثه ولا هم خمس تعشر ____ ياجميلي وقع جودي مع كلب عرقوب

[الفراهيدي]

السلام عليكم
وعيد مبارك وكل عام والجميع بخير

عفوا عن الانقطاع واعذرونا على التاخير
اما بخصوص الدروس فستكون في موضوع جديد ومساجلات الدان تبقى على ماهي عليه ( لكنكم بردتم الايام الاخيرة , وين المقدم الشعف)
في البداية باتكون درورس في التقطيع ووضع ميزان الشعر ثم بعد ذلك نبدا في البحور ( شوها بحور ماهي سيول, الله يعين نحنا :D ) ثم نتفق على القافية ونبدا والله يوفق الجميع

وفي انتظار رايكم واقتراحاتكم

[الشعف]

السلام عليكم ورحمة الله وبركاته

اولاً اتقدم بخالص الشكر والامتنان للجميع فردا فردا فردا فردا>>>> حلوة فردا :D

وعلى الخصوص من سأل عني

واقول لسبع الليل ( السموحة منك ) ومشكور على الفصل بانحاول نجاريك فيه عما قريب >>> على حسب الهاجس
والا بانجيب فصل جديد;)

كما اتقدم بخالص الشكر للفراهيدي على مجهوده في شرح علم العروض .. ( مرينا عليه ) لكن مرور الكرام .. ان شاء الله نحاول نستفيد ... وبانتظار المزيد من الحلقات بذلك الخصوص.

ان شاء الله لنا عودة .. وعليك التحكيم والوزن .

سلامي لكم كاااااااااااافة

والى الملتقى .

[طالب النعماني]

اهلا وسهلا بك يااخي الشعف
والله طولت الغيبه وكم افتقدناك اخي العزيز
نرجوا المواصله معنا دايم واحياء سمرات الدان
وفي انتظار الجديد
واعذرني لعدم المشاركه لسبب تعرفه انته
هههههههههههههههههه
ولكن فيك الخير وانته مطرح الكفايه

[الشعف]

يامية هلا ومرحبا بك ياطالب
واحنا افتقدناكم بالاكثر

لاعدمتكم اخوة >>>> حقوق الاقتباس محفوظة للحضرمية ;):D

[الصقرالجريح]

مرحبا بابيات جت عالصــــوب مثل المــرهم
جعلت العاشق التعبان بعد سكوته يعود يتكلم
نسنسوا بالدان هذا دواءالعاشق يلي تداوون

[القسورة]

اود امشاركة مع الا خوة
كما احب ان اسجل اعجابي بالا خوة وخا صة الشعف لهذة الفكرة وسنحا ول نتطفل على كلمات الدان واعذرونا يا هل وادي عمر

ذا شعف من قدا الوديان يأتينا
بالمزن يا شاعريغسلنا ويروينا
عسى رحمة من الرحمان تدا وينا
وتجمع شمل كل مشتاق لوا دينا

[باسالم]

ترفع للاستفاده

هكذا كان الشعف في مدرسته الفنيه النموذجيه الاخلاقيه وكم استفاد الكثير من النقد الهادف

نتمنى ان يعود ذاك الزمن بنفس الروح ويتعلم الجميع ونرتقي بدل الي حاصل هذه الايام !!!

علمته الرمي ولما اشتد ساعده نساني ؟! هوكذا يالشف ولاغلطان

[الشعف]

طلعت منت هين ياباسالم وتعرف تبحث في الاكوام المتراكمة ;)

منين نبشتها ذي الصفحة ...

الا ليت الشباب يعود يوماً ... لاخبره بما فعل المشيب

تحياتي لك لجميع من مر من هنا

وياراد ياعواااد

[علي بن طالب الحامد]

طلعت منت هين ياباسالم وتعرف تبحث في الاكوام المتراكمة ;)

منين نبشتها ذي الصفحة ...

الا ليت الشباب يعود يوماً ... لاخبره بما فعل المشيب

تحياتي لك لجميع من مر من هنا

وياراد ياعواااد
وينك يالشعف ايه من رياح شلتك انت وجمال العطاس بعيد عننا اما رجعوا وهاتو اصوات الدان والا با ارسل لكم عصــــــــــــــــــار يردكم

[الشعف]

وينك يالشعف ايه من رياح شلتك انت وجمال العطاس بعيد عننا اما رجعوا وهاتو اصوات الدان والا با ارسل لكم عصــــــــــــــــــار يردكم


الرياح شماليه جنوبيه >>> ذهن بايقولون انفصالي بعدين :) .. خليها شرقية غربية احسن

وبالفعل بوهاني كذلك له وحشة مثلما انتم لكم وحشة كذلك .. وغيابنا ادى الى انقطاع التواصل .. لكن الذكريات الجميلة خير عزاء لنا ..

دمت بود ,,

[باسالم]

طلعت منت هين ياباسالم وتعرف تبحث في الاكوام المتراكمة ;)

منين نبشتها ذي الصفحة ...

الا ليت الشباب يعود يوماً ... لاخبره بما فعل المشيب

تحياتي لك لجميع من مر من هنا

وياراد ياعواااد

ياخي لما عدت اصبح الموضع سهل ضغط على الشعف وبيقول كل شي هههه

يعني اضغط على اسم الشعف بتلطع كل مواضيعه ومشاركاته التي تقارب 11صفحه

قال مشيب وشباب دعينا منك بغينا قصيد

انا لجل السمر حاضر
ظهرارجوك يامولاسعاد
ياراد ياعود

[عيظه مبارك بن بشر]

شكرا علي ذلك