ياخالق الاكوان وياخالق بن أدم من عدم=بامرك وتقدير يعم الامن كله والثبات
انت الذي تقدر تجلي حزن في قلبي وهم=وتفرج الاحوال وتزيل الكروب المعسرات
صلو على الهادي عدد ماخط في ورقه قلم= تعداد ما قمري ترنم عالغصون الراويات
سلام من شاعر الى ارض الضيافه والكرم=ارض الشهامه والمعزه والقصور العاليات
والله مابنساش يابلسم جروحي والالم=ذكرش وعنوانش على بالي سنين مكدسات
مهما حصل مهما جرى من تفرقه او من ظلم=او من تقلاب العصور الماضيه والفانيات
ماعزش الا القدر والناموس يافخرالامم=ياذخر للصحراء وللوادي على كل الجهات
حبيت فيش الخير وحبيت الشوامخ والقمم=وترابش الذهبي دواء لاهل القلوب الساليات
انتي امانه في عنوق اهلش الى اليوم الاهم=من يوم ما قمتي الى يوم القيامه والممات
عدى بها التاريخ وتفقد زمنها وابتسم=ومسى يحاورها ويثبت ماورد من شائعات
واظهر حقايقها القديمه لي اختفت منذ القدم=ايام كانت ملتقى القادات واصحاب السمات
ياما غزوها ناس واحتالوا عليها بالوهم= لكنهم فشلوا وكاموها فشايل مزريات
ياما وياما تسلطوا عالعاليه قله وجم= فيهم قلال الخير و اصحاب الشروع القاصرات
لكن شبام العاليه فيها رجاجيل الحكم= الانس هم والجان فيها والاسود الضاريات
نصبوا لهم من كل جهه وسقوهم المعلوم سم= وبيتوهم في خلاء خالي خبيثين النيات
واليوم جوها ناس مدغومه عديمين الذمم= لي مالهم اول ولا تالي ولا حسن الصفات
ناموا عليها بالكوافي والرذايل والشتم=وبالفعال المنكريه والدلول الخايسات
وتميحوا وتمددوا فيها وقسموها قسم = صبحت غنيهم مثمنه يتبادلوها خذ وهات
وانتشرت الفوضى وزاد السيسباني والسنم=واشياء غريبة ديحت بين الحنايا مثقلات
يالله عساها تنجلي وتجي المكاوي عالعلم= وتنذلح سيلين من بين الموازع مسقفات