قصيدة الشاعر طالب بن حسن باتيس النعماني ابوراضي

اهداء الى شباب التغيير في المكلاء خاصه واليمن عامه

لاصوت يعلو فوق صوت الثوره

من قلب ثاير ثوّر ابحور القصيد=بقدم وباحيي شباب الثوره
ذي للكرامه قدموا كمن شهيد=في ساحة التغيير والمنصوره
في كل ساحه من حرض لما زبيد=للمهره إللي بالوفاء مشهوره
ثوّار وقفوا في الشدايد ايد بيد=كلن في الميدان يلعب دوره
احرار ماهم للدراهم شي عبيد=امثال شله بايعه ماجوره
باعوا في السبعين والبيعه اكيد=سهنوا الهديه من علي مصروره
باعوا ضمايرهم وطمعوا بالرصيد=ذي مايسدد قيمة الفاتوره
بيعه بلا دلال والمبلغ زهيد=ياخس بيعه باطله منكوره
وإللي اشتراء بالمكر مابايستفيد=المكر والحيله ضوت في كوره
ماذي في الساحات واقف كالفريد=بايكتب التاريخ له واسطوره
يامنبع الثوار ياليمن السعيد=اقسمت عالاايات في كل سوره
بإني فداء تربتك في ساحل ونيد=لما سراج النصر يشرق نوره
ويعود لك مجدك وعزك من جديد=مابانخلي عزتك مقبوره
لوبايكلفني الثمن دم الوريد=بروي ترابك من دماء مقهوره
بندر مع الشجعان في الوقت الشديد=ذي صوّروا صورتك باحسن صوره
يكفي كفى من ظلم يكفي ماوعيد=طالت سنين البلطجي واشهوره
لمى متى والظلم كل ليله يزيد=عالشعب من زمرة علي وصهوره
كل من بلغ رشده مسك رتبة عميد=يامر وينهي والعرب ماموره
يامر على كيفه ويعمل مايريد=وان حد رفع صوته رفع صاطوره
شله خبيثه صفروا كل الرصيد=حتى المنيحه منهم معقوره
بيداتهم لرزاق والعيش الرغيد=والشعب من جوعه يبس حنجوره
لكن حان الكسر للقيد الحديد=مثل القيود اللي مست مكسوره
والختم باردد وباكرر وعيد=لاصوت يعلو فوق صوت الثوره