من صفحة عمر كشميم بن هلابي قصائد للشعراء المبدعين المحضار وحداد وباجعاله: ( بعد كارثة الامطار والسيول التي أجتاحت حضرموت في الثمانينيات ) قصيدة للشاعر حسين أبوبكر المحضار قل للجماعة وراكم طالت النومـــــــــــــــه = مرت أسابيع ونحن مساهنين الخيـــــــر وين المعونات هل راحت كومــــــــــــــــه = ولّا يضحكون أهل الخير عا أهل الخير نحن السكن بس لي نطلبه ولزومــــــــــــه = محد بغى شي منكم زاد ولا ميـــــــــــر خلوا الخشب والاسمنت كومه وراء كومه = والطوب واجد والحديد أسبيــــــــــــــــر حلولكم كلها جات معقومــــــــــــــــــــــه = لا ما سرع هادي البقار وبلخيــــــــــــــر حداد ويش بايصلح هو ومقسومـــــــــــه = وعوض عبولان ما يقدر يريش طيـــــــر نا نحمد الله داري فلك منظومـــــــــــــــه = لكن راثي إلا ثابت صاحبي وهبيــــــــــر وعاد مثلهم آلاف مرقومــــــــــــــــــــــه = لا ما لهم شي وسع حدفوا بهم في خضير والناس تبغي مساكن صدق محكومــــــه = شلوا خيمكم عطوها المعينه والمريـــــــر والصوب لقد كبر باتجيبه البومــــــــــــه = بغا بروفسور متخصص وماجستيـــــــــــر محد يلقي حكومه داخل حكومـــــــــــــه = ولعاد شي وقت للبلصه ودهن السيــــــــر |
اقتباس:
للشاعر باجعاله ردا على الشاعر المحضار قال الفتى بأبدي بأبيات منظومــــــــــــــــه = بغيت كلين يسمع قولي المنظـــــــــــــــوم الآدمي إذا تلسن ينذكر لومــــــــــــــــــــــه = ولعاد حاجه لهرج المشتمه واللــــــــــــــوم لا بارك الله في صرخة ديك رومــــــــــــه = تصرخ بلا وقت دياك الــــــــــــــــــــــروم أنت تدوّر سبب حيلتك مفهومــــــــــــــــــه = تكفي الحليم الأشاره والغرض مفهـــــــــوم قل الثقة في ولاة الأمر معدومـــــــــــــــــه = ماهو الخشب والأسمنت والطوب لي معـدوم الحصن ما يبتني في يومـــــــــــــــــــــــــه = ولابدا آدمي كسر جبل في يـــــــــــــــــــوم إلا مع الصبر والأيام باتقومــــــــــــــــــــه = حتى الذي في المهد قبل السنه ما يقــــــــوم والصدق أهل المحط دفنوه في كومـــــــــه = وكل ما يملكه قع ورث لأهل الكــــــــــــــوم ما قلت شي في خلوفة سعاد صمصومــــه = لكن شداد أبنها ما وقع صمصــــــــــــــــــوم هو اللي فرق فضل بن عباس من قومــــه = ودّاه للخور ما يبغاه خلاط القــــــــــــــــــــوم ما هو مداري بشي قانون وحكومـــــــــــه = ورجال تحت الطلب با ينفذوا المحكــــــــــوم الكلب لمّا يعض بيعض في خصومـــــــــه = لكن ذا الكلب يعض في الأصدقاء والخصوم تطوعوا له بوصلة صيد مسمومـــــــــــــه = والّا حبه رصاصه قذفها مسمـــــــــــــــــــوم أن قلت مظلوم بالحق ياما ناس مظلومــــه = سالف الوقت حد عاقل وحد مغـــــــــــــــــروم محد يؤكل رزق حد أرزاق مقسومـــــــــه = ربك ييسر لخلقه ، رزقهم مقســــــــــــــــــوم نفسي عزيزه ولا بفطر على دومـــــــــــه = عزيز رمضان عندي ما با بفطر عا الــــــدوم كل من رأى الشهر في رمضان بيصومه = لكن ذا ناس ما تعرف شروط الصـــــــــــــــــوم |
للشاعر المحضار ردا على قصيدة الشاعر باجعاله الناس شدّوا وحط صاحبك بصرومـــــــــه = وهو متى صاحبك لقى غنم وصــــــروم نا عارفه اللّي يهدم حامل قدومــــــــــــــــه = وجدار عبدان ما يبغي صبر وقــــــــدوم في يوم لاقد هم يهدمه في يومــــــــــــــــــه =وان جات شي مشكله يقعد لها ويقــــوم دياك رومه خير من صورة البومـــــــــــه = والديك صرخته الطف من نعي الــــبوم والصبر عندنا له أوقات معلومــــــــــــــــه *** والمشكله لاتعدى حدها المعلـــــــــــــوم أما الثقة باقيه والنفس ملزومـــــــــــــــــــه *** ولا يمكن في الذي ماهو ملــــــــــــــزوم والنقد بنتقد خلي وبالومــــــــــــــــــــــــــه *** ان شفت شي واضح يستحق اللـــــــــــوم ومن حنق ريت له فالح وملطومـــــــــــــه = وباضحك لاتعوج خده الملطـــــــــــــــوم كم عرب يطلبوا الاسمنت بالكــــــومــــــه = والبعض مابايهمه لا انبطح في الكــــــوم وكل من لاعرى داره غدت شومـــــــــــه = يابيعت الروضه في الدنيا وعيب الشــــوم الكلب ما با يعض إلا الغبي الزومـــــــــه = أما الذكي منتبه يا صاحبي ويــــــــــــروم مالك والكلب لي ينبح في الحومــــــــــــه = يصحاء من الصقر لي فوق العريش يحوم والشيخ في الخور با خباره وبعلومـــــــه = من حل وحده يلقي له خبر وعلـــــــــــــوم ولعا با ينصرف ملساء وملحومـــــــــــه = البنك ما يقبل لا ملس ولا ملـــحــــــــــــوم ومن معه حق با يوقف على قسومـــــــه = ولعاد با يبيع بالباطل ولابالقســــــــــــــوم هذا كلامي وهذا كل ما رومـــــــــــــــــه = ونشوف عشي أحسن من قصور الــــروم وأن عادنا عدت قصها من الدومــــــه = أو قطعوا العلب الاخضر لي يلقي الـــــدوم |
للشاعر حداد ردا على الشاعر باجعاله: قال الفتى الواحد يرجع الى قومــــــــه = ويكون دايم صلاحه من صلاح القــــوم ومن يفعل الخير محد طول بيلومـــــــه = ومن ببدأ بالعيافه يستحق اللـــــــــــــوم والظفر لاطال واجبك تقلومـــــــــــــه = وانت اظافرك متروكه بـــــلا تقلـــــــــــوم تجرح بها اللناس بعبارات مدمومـــــه = ومن يجرح الناس يصبح عندهم مدمـوم ان كنت مسموم ومراشقك مسمومــــه = بعض العرب عندهم رقوه من السمـــوم ما با تلاقي الذي تقصده وترومـــــــه = الا اذا الصين قربت من بلاد الـــــــــروم خليك عادي كما سلو;م وسلومــــــــــه = وبا تحصل نصيبك ساعة التقســــــــــوم وان جاك مفتي ترك فتوته وعلومـــه = شف كل شي با يقع في يومه المعلـــــوم الناس يمشون على خطوات مرسومه = كل خطـــه تجي يصــدر بها مرســـــــــوم نحن نريدك تقيم الدار بريومـــــــــــه = ونســــاعدك في ما تقصده وتــــــــــــــروم تسرّح سليمان بعباره وقدومـــــــــــه = من غير عربون با يسرح ولاتقـــــــــدوم كم قد تمنيت في قعدتك والقومـــــــه = ولعا نفعوك اللّي تجلس لهم وتقـــــــــــوم ان كنت محروم مثلك ناس محرومه = لكن يقولوا التماني مهرة المحــــــــــــروم وان كنت مغروم يا ما ناس مغرومه = ذا سالف الوقت حد عاقل وحد مغــــــروم يا كم وكم ناس بين الناس مظلومـــه = ولا أعرف من هو الظالم من المظلــــــوم يتألم الذي بلغته مدرومـــــــــــــــــه = ولا تذر ملحك وكفي عا الجرح لي مدروم |
اقتباس:
والصبر عندنا له أوقات معلومــــــــــــــــه = والمشكله لاتعدى حدها المعلـــــــــــــوم .......... والظفر لاطال واجبك تقلومـــــــــــــه = وانت اظافرك متروكه بـــــلا تقلـــــــــــوم |
السلام عليكم ورحمة الله وبركاته . وأسعد الله صباحكم جميعا . وجمعه طيبه مُباركه على الجميع إن شاء الله . |
اقتباس:
وعليكم السلام ورحمة الله وبركاته وصبح الله الجميع بالنور والسرور . وجمعه مُباركه على الجميع إن شاء الله . |
السلام عليكم ورحمة الله وبركاته . ومساكم الله جميعا بالنور والسرور . وجمعه مُباركه على الجميع إن شاء الله . ونسال الله أن يتقبل منا ومنكم صالح الأعمال . |
الساعة الآن 03:00 AM. |
Powered by vBulletin® Version 3.8.9, Copyright ©2000 - 2024, Jelsoft Enterprises Ltd. TranZ By Almuhajir