طيور الريف حني وازجلي عا الطبل والمزمار = وردي الصوت من قلبي وبهديها بطيب نيات
هلا بامرحبا ترحيب مني بالميه واعشار = تراحيب المطر لا رخا وسبل به وجاء شلات
وحيا باقديم حسن وحيا ذي وصل مليار = وحيابه عدد ماسبح المؤمن في الركعات
الا يانسل بن سيبان ذي مذكور في الاغمار = جيوش المغمره تعجب ملاقيهم في الهدات
وبا يشهد لكم تاريخ سابق من زمن قد سار = على الجودات قد سرتوا من الماضي بخير صفات
نهار الذاىْبي ظلى غباره مرتكزفي الدار = صمدتوا في مواقعكم وعانيتوا من الشدات
وجاكم حزب لعنه من بلاد الكفر والفجار = وحط اذناب تحكمكم في الموطن وقليات
تخلوا من مباديهم ولا شي همهم بالعار = وخلوا الوالدة تبكي وتشكيهم الى العمات
ترى العمات حد راضي وحد يوقد لهيب النار = وحد مغلوب على امره ولا له شي في الهدرات
وناصر بن عمر جاثم عليكم ليلها ونهار = وحالف ما يفاركم ولاشي منكم فكات

بساط الريح شل مني رساله عا الجناح الفار = وصبح عا دبي ميناء تجاري عالي الهامات
وزاده علو ربي يوم حلوا به طوال اعمار = رجال الجود ذي ميزانهم راجح من الحسنات
ويهناهم بلوغ المجد والعزه في الاقطار = وذي خدموا وطنهم يستحقوا ارفع الدرجات
ونحنا عندنا الفرحه كبيره للمحب والجار = بكون الدين مافيه التباغض والحزازيات
ولافيه الحسد لون الذهب نوزنه بالقنطار = مرد الناس لا الطين الغبر ماتنفع الهياهات
عسى حسن العمل وختام طيب في وطاء وعسار = ومخرج زين من دنيا الندم يفرج الكربات
ربينا عا تراحم نطبق اليمنه على اليساار = جسد لا جاء الالم في الراس تداعا له اليدات
نشوف الشارقه والعين شوفة حجر بن دغار = وفي ميزاننا ماباتجي هفوه من الهفوات
مخوه من على الاسلام مسلم هاجره وانصار = وعادت اهلنا واجدادنا من احسن العادات
وفقر المال ماهو عيب لي قدوه بمولى الغار = وذي عصبوا حجر عا البطن وقضوا اليل في الطرقات
وصبري ما نفذ والقلب حبان الوطن والدار = برغم ان كل سنه تظهر لنا اّفه من الافات
وحتى الحزب ذي تذكره خذ وقته وراح انهار = ولادايم خلاف الله ربك واسع المدات
وحتى في غزير البحر هب الريح عا البحار = ورد الساعيه والنوخذه من حيث يسرح بات
ووادي قد سلكه ايوب باتابعه في الاثار = ومن بعده الظفر والصبر طيب يجلب الرحمات
ولا يموت المطر والغيث في الدنيا قضاء واقدار = له الحمد الجزيل المكتمل في العد والحسبات
وشي موعود به اخر زمان الناس في صرار = فتن وحروب تعصف والخلاق في تعب وشتات
وهذا باب قـفـلناه بالكيلون والمسمار = وثاني باب بارحب بشاعر سرح الابيات
مبارك بن علي نسل الهلالي عالي المقدار = وعلي صيت عالحقاف حوم رفرف الرايات
فله مني تحيه صادره باالورد والازهار = ودعوه بالقاء والملتقاء في اسعد الاوقات
بساعة صفوا فيها ملتقاء للاهل والشعار = نمد كف الدعاء يالله عسى نفحه من النفحات