أبديت بسم الله سبحانه وهو مُنشي القمر=والكوكب الدُري وسُبحان المُهيمن والكبير=
يا خالق الدُنيا ومن فيها الصوَالح والبوّر=وكلاً على مهله وكل حاجه وهي بأمرك تسير=
وألفي صلاتي عد ماهبت تناسيم السحَر=وأعداد ما زخ المطر وفاحت وروده بالعبير=
عالمصطفى الهاشمي الميمون وأله من مُضر=شفيعنا في يوم أهواله صعيبه ما تسير=
ثم قال بن شحبل بدع ببيات من بعد السمر=الناس ناموا دون أنا بيّت للهاجس سمير=
وجابها من بلدة البصرة إلمّا حد قطر=وباب اليمن زاره وزار الهند لمّا با نشير=
وقال المراكب والبوارج في بحوره تعتكر=والميج والميراج لي يهبط ولي منها يطير=
كدّر مزاجي حط في الصافي ذي عندي غشر=يا آه يالوماه من لي شل مالي بالنشير=
كله من القاده على العاده تؤخينا الحذر=وزرعو الخوف الحفي دايم يحذر لي حذير=
وسببوها مُعدية أمراض مع ضعف النظر=ويضربونا بالحديد الصاج ماحد له نظير=
وين الخِلافة والصحابة وين سيدنا عُمر=خلاء ذيول الشِرك تخضع بالبواتِر له تسير=
والقصد با نصبر وما مؤمن خلف لاقد صبر=وعاد المصائب مقبلة عسى برحمة ياخبير=
أحراق من داخل في الخاطر تأثر بي أثر=حُجه غريبه عالعرب لرهاب لي قالوا مُثير=
هذا خرج ذا فصل لول جاك عالمُورد هدر=بابه في ألآم العرب والدم با يهدر هدير=
وبعد قم يا مُعتني في ظهر بيكب له خبر=من مصدره من عند بازرعه وكيله والمدير=
يعجب ويسحَر صدق يصلح للمعاني والسفر=دبر وشل الخط من عندي إلى واحد سفير=
صل لي إلى الدمام في سكيكو من قبل السمر=سِلم على العُربان عالحُذاق لمّان الصغير=
وأسئل على راشد مبارك بايرد لو هو ستر=قله قطفنا الورد والريحان من حوش الوزير=
كله على شأنك وفي شأنك سرينا بالقمر=وجبنا سمَاك القرش والآساد لي تنفر نفير=
شوف الذي حاصل وعجّل في جوابك والخبر=الكير راشِن وسط قلبي والدِماء تقطير قطير=
ماليوم قد باعوا الصحاري والمُدن هي والجُزر=كله على طوني وفي شأنك يا بوش الصغير=
كماً وكماً راح عاد الوضع باقي ما أستقر=وكماً شنب داسه وكمّ أشناب في وجه النظير=
جابوا بلاوي مُتعبه وكذوب عُبّاد البقر=من يوم شافوا عندنا ضعف المكانه والضمير=
لاكن با يجي يوم بانعكس مسارات الوضر=وبا نوطي الخوذات وبا نكسر لهُم ظهر البعير=
وبا نجوب الأراضي والمُدن هي والقفر=حِل الفتوحات يوم العيد والنصر الكبير=
با نرفع الرايه وبا نقتِل وكم لي في ألأسر=با نكسر التمثال لي ألقوه حريه حرير=
هذا حصل والقصد والمقصود منك بالنظر=من بعد مالسعدي مع الدُوري ودموعه غزير=
والختم صلو عالنبي أعداد ما صقره صَقر=وأعداد ما قامت سيوف الحق تصقرهُم صقير=
جواب الاخ/ راشد مبارك بن شحبل=
يا ناعس الطرفين يا نور الكواكب والقمر=يا باهي الخدين بو حدين يالنور النوير=
يا بارز النهدين في ميدان صحراء قفر=يا صاحب الجود السخي يالابس الثوب الحرير=
يا بوحبيشي دافن العرضين لمان العقر=وأقدام حُور العِين لي تمشي على وادي خضير=
إنته ضنيني وإنته أغلى إنسان شفته فالبشر=مرضى بغيرك لو عطوني مال جابر والبشير=
حُبك تخلد في نوى قلبي ولا منه مفر=وفرّت ما جاني وباقي عندي الخير الوفير=
أخلصت لمّا يدفنوني تحت رصات المدر=أنا الموظف وإنت من فوقي في المكتب مدير=
با ضلي أتعقبك في كل حين با شمّ الأثر=وإن صحت با ناديك يا لبيه من عبر الأثير=
با عيش من دونك فقيد الوعي وضعيف النظر=يامن تربعت الصداره دوب في رأس النظير=
أهواك مره والهواء غيّر نظامي والسيّر=ولعاد شي مهنه سوى مرقّد عالسرير=
رحِب بعبد الخالق إلى جاء مِشرف لسمر=وجاب قوله لي رعش سامر وبا يرعش سمير=
أهلاً وسهلاً عد ما البرنو ترنم وأعتكر=وأسقط غراب البين لي يعكر بجناحنه عكير=
سلام من راشد ملاء الدمام لـ وادي عمر=واعداد ما سميتان يعوي لا عوى جنبه عمير=
إنته صديقي والصداقه ساسها كله حجر=مبني على صبات مخلوطه مع نوره وجير=
جات القوافي كنها كرعي تسر القلب سر=وأمسيت في راحه وأنا ياناس عالرجلين سير=
والوقت ذا غدار ياكم ناس فيهم قد غدر=ما يستقر ساعة عطش مُهلك وفي ساعه غدير=
ساعات يكرم بالقنوف السود يرويك المطر=وأحيان من جور الضماء با تمطر الدُنيا مطير=
وشي لي جراء للناس طاح الوهن فيهم والكبر=كلاً على مبداه غض الطرف ما خاف الكبير=
طاحت قمم سكنوا بها العربان في بحراً وبر=وإترفعت خس الخلائق بوش والفاسق بلير=
لي ماحسب للتاليه ولا يزر الحبل زر=لابد ما يبيع المبادي والثمن جوبه وزير=
وإنته تحذر من خراب الدزق وأسلاك الكوّر=لا قد خرب بابور وده للمُهندس بن كوير=
لا تحسب إنك قد تجاوزت المراحل والخطر=عاد المراحل باقيه والوضع في الساحه خطير=
مقبل علينا يوم فيه النوب يجني عالعشر=وأيام سوداء باتجي لا غاب عنك با عشير=
يا حُرق جوفي ساعدي الأيمن من الجسم أنبتر=كلاً يهدّف عالنصع لمّا وقع للعرم تير=
يا ضيق حالي ياسواد الوجه وأبياض الشعر=قلبي تقطع من عبيد الرز وأكياس الشعير=
كلاً على قرصة من العُذال فالخافي جمَر=وأكليب يتنهّد من الرمضاء ومن هجر الهجير=
ياريت فالدُنيا كما الفاروق ستعشر نفر=والفين خالد با يردون المدراج والضمير=
يا يلملمون الجُرح المرهم وحقنات الإبر=ومن خرج عن نهج بوالقاسم مصيره عين بير=
حكمو بحكم الشرع والسنه ولا هابو العسر=وشيّدو دوله تحن من فاس لـ وادي عسير=
هذا خطابي والتحية عد مالبارق عطر=سلام لك ياخادم الحرمين يالبدر المُنير=
إنته أبونا وإنته القدوة عسى ما شفت شر=عساك تسعد كلها إيامك بنفحات العبير=
مؤمن وفارس والوفاء والعدل عندك والبصر=والأمن والإيمان حققته وحققت المصير=
والعفو يالجواد لا شي زاد ولا شي قصر=مزاج خو ناصر ترى حبله في الدُنيا قصير=
والختم صلو عالنبي لي فالجنان المستقر=عليه صلو عد ما الضمّر تزاحم فالقطير=
صلاة عالمختار مالطالع في القمة ندر=يامن قراء شِعري يصلي على المُبشر والنذير=