عرض حال

للشاعرالمرحوم الشيخ عوض صالح باشراحيل

رفاقي في العمل أيش القضيه= وليش الحل حتى الآن ما بان
مدير المكتبة في الشحر زيه = وزي أنسان ما له في العمل شان
بلا تعريف نعمل أو هويه = ولا أنا منكم أنسي ولا جان
مضت أشهر علي واليد خليه= نعاني الفقر أشكالاً وألوان
طويله في ضحاها والعشيه= وفي الغثيان تشبه عصر رمضان
على القدمه القليله والشوية= وبالسلفه نمشي الحال أحيان
مراح الشهر عندي زي مجيئه= وصل ايلول أو غادر حزيران
وأزمه في الكمر عندي قويه = بغت دينار كبسوله واحقان
ويمكن منها نصبح ضحيه = إذا ما شي إغاثه منكم الآن
ولا لي دخل آخر أو خبيه = ولا مصدر لقرضه من محل ثان
وقصدي اليوم إثبات الماهيه= على منشور أو في صورة إعلان
بلاش السهو وبلاش النسيه= وذا مارس هلاله فوقنا بان
ومارس فيه إقفال الماليه = وإرجاع الغلط والسهو بالشان
ولي فيكم أمل بل حسن نيه= بتقدير العمل شوكه وميزان
ولا قصدي زياده ع البقيه = وآخر من يفكر فيه إنسان
فقط قصدي العداله والسويه= كما غيري بلا زايد ونقصان
شرحت الحال دون أدنى خفيه= لأني أعتبركم لي كأخوان
دعوا الإهمال فضلاً في الوصيه= بذمتكم لأني شبه زعلان
ختاماً أيها الأخـوة تحيـه= من الشاعر عوض في الشحر طفران

ختامـاً أيهـا الأخـوة تحيـه = من الشاعر عوض في الشحر طفران

يا طست الظاهر حمار أبليس في كورك نهق= عيبه بدت منك ولا شيْ عيب مني لك سبــق
ما حد يلقي قط في رمضان من هذي الســوق= خليـت بو خالد يلفِــخ ما تهــنى له فطور
العشر في رمضان و الوقت المغارب والشفق= والشـاعر المسـكين شرغان القطيبه والمرق
و مساهن المغرب على الأعصاب جالس والقلق=الأ وانا بالصوت من المطبخ ينادينا الحضور
انــذار من اهلي بان الطست روح واخـترق=حتى الذي داخــله حصـلناه كلـــه احــترق
و الله ذا مــشـكل لان الأمر بالمفتوح شـق = لو كان قع في الظهر ما هميت لكنه الصفور
مــا كـان في قاعتـك لافغصه ولادقك مدق= متعنيين الاهل في غسـلك ونومك عالطوق
غسلتــك بالصـابـون والتنشيف في أحسـن خرق= واليوم في لحظه وحل حاجتك تقطع لك مرور
يشـــهد علي الله ان الرأس حســيته أفتلق =قد كان عندي قبـض لكنه من القهر انطلـق
نهمر غــلاق الشـهر يوم الشهر حقينه بحق=عبَرتها ليلـه مـن الهمرات بطني عاتـفور
فكرت فيما بعد و تنازلت من بعض الحنق= ما دام ماشي عذر ما ينفع تلهله او تنق
قل كان معنا طســت لكنه علينا اسـترق=والا خذوه السكن والغاوي الى يوم النشور
غالطت نفسي بالكلام الكذب هذا و الوهق=واليوم مايمشي كلام الدجل وكلام السرق
السـكن مخلوقين الا الرزق لقوا له طرق= حد شعوذه رزقه وحد بالغش يبني له قصور