نامت سواليف قلبي واهتنى نومه=وارتاح بعد العنى واسقيت ضاميها
ياريحه الورد والله الورد ما الومه=دامه يضم الملاك وحاضن ايديها
يتوه في عالمك ويشاطرك نومه=والبرد لا صار بخدودك يدفيها
ياحظ هالورد حقق اجمل حلومه=وانا وقلبي مع الأشواق في تيها
تدرون وشصار ياسعده بمغرومه=والغيره في خافقي بانت مواريها
زهر النفل والخزاما وريح يشمومه=امس احتفل بين شفتها وكفيها
حتى غدى ثغرها والشهد مختومه=جنه من العطر والغرة تفييها
الله ياعطرها اللي فاح مشمومه=ارتاح في كفها وعناق خديها
الفل في جيدها والعقد منظومه=لا سولفت زيزفونه في حكاويها
يصغى لسولافها ويثرثر اعلومه=يذوب بأنفاسها ومهامس اذنيها
تخيلوا الورد من حبه لمحرومه=غطاها من راسها لأسفل مواطيها
وكل من شافها يضيّع اسلومه=تصبح امانيه لو كلمه يحاكيها
ملاك في زينها بالناس معدومه=الغيد من حسنها ضاعت حلاويها
فيها شموخ الثريا والمع انجومه=تامر وتنهي وتزعلنا ونرضيها
حتى لها بالدلع بصمات موشومه=خطوة وضحكه ومعزوفه تغنيها
جو يسألوا قلبها عن سر مكتومه=منهو سكن مهجته واحتل عاليها.؟
ردت بجمله عذوبه حيل محشومه=يالبا منطوقها /ولبا مباديها
خلي فديته عسى يومي قبل يومه=الروح قمة غلاها في مهنيها
هذا حبيبي وفيه الروح مغرومه=روحه وفيه وروحي عند وافيها
لاشفته انسى عذاب العمر وهمومه=واعيش معنى السعاده لأجل معطيها
يفز قلبي وله ويذوب بحلومه=اذا ذكر غيبته واشلون يقضيها
نامت سواليف قلبه واهتنى نومه=لأنه بعيني بهالدنيا ومافيها