ابديت بك يالله يامنشي الغمايم والسحب=بامرك وتقديرك تسير الشمس من فوق السحاب
يامصلح الاحوال تصلحنا وتصلح ماخرب=وتنجي الامه من التدمير واسباب الخراب
صلو على طه عدد ماريح عالوادي يهب=وعد ما هبت رياح البحر جم ماهي هباب
سلام من شاعر لكم ياهل المعاني والنسب=للمخلصين الاوفياء اهل الاصاله والنساب
وسلام للصفراء بلادي لي لها واجب وجب=ياأم القصور العاليه داعيش عندي مستجاب
يقول سبع الليل بانكتب كما ذي هو كتب=اربع ليالي بانجد العزم في هذا الكتاب
حذرتكم مليون مره من عصابة بولهب=لي يزرع البسباس ذي منه المرض والالتهاب
لي خان أرضه والامانه ماتفقد اوحسب=يلقي الذي يبغاه ويلخبط بنا في كل حساب
كذب وصدقناه وايدناه لكنه أنقلب =عسى لبوه بندق يقع له في المكلاء وانقلاب
كل مادخل قريه غنيه من مواردها نهب=وعياله الكشفان قالوا له تقدم لا تهاب
الارض ارضك لا تسيبها لمن هب ودب=بانغتني منها وبانشبع غنمنا والدواب
زرزر على بقعه وقفل عالجواهر والذهب=ومن مصدر البترول يغرف في مجييه والذهاب
ولا يحب السلم بين الخلق يفرح بالنشب=يافرحت الخاطر اذا شاف الفتن بين الشباب
مكار بن مكار يتفرعن ويمدح في الخطب=ولايطبق شي لنا من لي يقوله في الخطاب
ياسامعين الصوت شو نحن أبتلينا بالجرب=حنشان مسمومات شي ظاهر وشي وسط الجراب
لما متى نشكي من اصحاب الكراسي والرتب=يهوين يوم الديك ماعدل قوانينه وتاب
بهذ بخلق الله كم من شاب من ارضه أغترب=من لي يشوفه قال مابقعد وقرر الاغتراب
وان جيت تفكر ياابن أدم باتقول ايش السبب=اعمالنا عيفه وهذا جزؤ من ذيك السباب
عافت الاخلاق بين الناس ولعاد شي ادب=والتربيه ياناس والتعليم رذله والاداب
تقاربت الاحداث والمبعد يفزع اذا قرب=وعلامة الساعه تلوح بالمجي والاقتراب
كثر السيول المردفه واحد قفاء الثاني عجب=حتى الزلازل قد بدت في ذا الزمن ياللعجاب
فرحت بالموسم ولكنه حميمه مانصرب=ياخس مواسم ذي السنه ماباتعني للصراب
باناتجي لله ينصرنا ويحقق كل طلب=بدعيه طول الليل من المغرب الى وقت الطلاب
يفرج علينا من وجع الاجسام وصنوك الركب=الحمل لا قد زاد عاحده ينوخ بالركاب
هذا كلام الصدق ياالاخوان ويكفي من عتب=سنين عدت مااستفدنا منها غير العتاب