ياهاجسي ليل سمرني وهات السمان=ولاتورّد هزيله نافشه عالغدير
هت من جواهرك لي كنّيتها فالثبان=لي مالها في كنوز الارض عندي نضير
نسّم على حال بالغثوه يبيت ملان=سقاه وقته من العلقم وقاطع مرير
خلّك على ماجرا حاضر وشاهد عيان=شف صاحبك ماهو الاول ولاهو بخير
يحس نفسه تغيّر واصبح انسان ثان=نقصت عزومه وقل صبره وله طبع غير
في حين ظن ان حظّه ابتسمله وزان=سباه في وسط حفره عمقها عمق بير
قيده مردّف ورجله ماكنه فالرصان=مابايزل فتر من موقعه لو بايطير
حتى المحب لي بقلبه حاز اعلى مكان=اليوم هوياه في كدره وهجر وهجير
صكّات بقعى حديد الهند خلته لان=وادمتك ياقلبي الحر الصبور الكبير
والهيج لي كان يتهدّر ويلهي زمان=اليوم بارك وناسي كيف كان الهدير
ثمان ياصاحبي عدّت ولحقت ثمان=والدلو لازال والزانه وسط عين بير
والناس خذها الضمأ والبعض خذه الزمان=حد مات قاعد وحد ديّف وهو فالمسير
لاشمس شرقت ولاحتى سدا فجر بان=ولا قمر نور الليل البهيم الغدير
راهنت لكن خساره ماكسبت الرهان=ياخير خنجر ولكن البلا فالجفير
خلو رفيقك في الريد البريد البيان=واصبح مجنّد وهو عندك برتبة وزير
اذّن وصلّى ولامخلوق لبّى لذان=ياحسف ذيك المساجد والقبب والمنير
ياحسف لآمال ياحسف التعب والدمان=في مال مافوقه اهله سلّموه النشير
مديت حبل الرضا واعطيت خصمي لمان=واليوم برّاق سيفه يلتهب فالحجير
اسعفت بايقول لي لاحل نجم الزبان=وبايذكّي ومعه الحق في مايصير
والختم ياصاحبي الآن آن الاوان=والعمر ينقص ومهما طال يبقى قصير
ردلي خبر قبل صرفق او يجينا الجنان=شعره ولكنها قصمته ظهر البعير