الشاعر يسلم بن عكعوك بن غانم

يا عيون المكـلا كيـف حـال المكـلا=عبر عينيـك باسجـل تحيـات لديـس
يا عيون المكـلا بيـن روكـب وحـلا=قلب يسلم تضيع بيـن عبلـه وبلقيـس
يا عيـون المكـلا يـم عينيـن كحـلا=ذوبني رموشـك والعيـون النواعيـس
خبريني صراحـه ايـه البنـت الاحـلا=شكلهن ماعترفلي ماعرفـت المقاييـس
اعمليلي جماله والقطي ذي هـي اشـلا=وافحصيها بدقه من جميـع الاحاسيـس
ون لقطي لي الحلوه هلا فيـش واهـلا=يا عيون المكلا بمنحش مرتبـة رئيـس
وابشري بالوظيفه بين الاسفل والاعـلا=ومن حقول المسيله بانمليلـش الكيـس
وعمري لش في الليله وافرشيها بـزلا=والبسيلش مشجر مثل ريش الطواويـس
فيش عندي ثقه وانتي رويـده ومهـلا=لاتخلين بـو صالـح لشلـه مناحيـس
واحفضيلـي عناقيـد العنـب لا تــدلا=يقطفنه ثعالب والسـرق والجواسيـس
نـا وياكـم صداقـه والنبـي ماتخـلا=منكـم يالحبيبـه لـو بدربـي دبابيـس
الصراحه صراحه كنـت مغـرم بهبـلا=لاتذكرتهـا ليلـي يبـيـت كوابـيـس
هي جميلـه ولكـن طبـع فيهـا تسـلا=بنت مزواج ماقنعـت بستـت معاريـس
وان تبى ولد بن عكعـوك لـول تخـلا=عن محبينها ذي في الغبـا والدهاليـس
لاتفقنا مع اهلـك بدفـع المهـر دبـلا=بالريال السعودي خل القروش المفاليس
وياضبى الديس والبقرين اهلا وسهـلا=ماضبى الجرش والكوده تقود الجواميس
يا عيـون المكـلا قـول حاشـا وكـلا=بانشلش علوجه قبل يوخـذش باتيـس
واعرف ان صاحب الدكوه وقفلش بمحلا=بو حسن قده من سابق يدق النواقيـس
هو نسيبي وجاري ومشكلـه لـو تـولا=خاف يرمي سميره في الحفا والتضاريس
ينتقم منهـا فـي عهـد ماضـي وولا=يوم كانت غشيمه غازلوهـا المتاعيـس
خافها اليوم تابت عرفت الـرب الاعـلا=عودت لي شريفه ماتشط في الخنافيـس

الشاعره المؤهوبه عيون المكلا

مرحبـا بالـذي افـرح وسـدد وابـلـى=بالحسن مثل اصحاب الشرف والنواميس
باح بالشعـر مقصـوده بشعـره تجـلا=رص كلمات مصدرها بطـون القواميـس
نـور الحـي بقدومـه وشعـره تـغـلا=بيننا وانتشر عبقه كمـا عطـر باريـس
وانتقـل فـي دهاليـز المكـلا وظــلا=وسط حلا وتارك شرجنـا دون تأسيـس
حال اهـل المكـلا زيـن يسعـد ويسـلا=قلب شاعـر اذا دقـات قلبـه نواقيـس
الهجـوم الـذي منـه ضحأيـا واشـلا=قام به انتحـاري بعـد كذبـه وتدليـس
كم مصوب مـن الهجمـه وكميـن قتـلا=من تواطي ضعيف النفس هو والجواسيس
في السقيفه احتـارت ماعيـون المكـلا=بين راهب يحاول كسب ود الف قسيـس
بسألك كيف من فكره نبـض واضمحلـى=هل تعـده معلـم باستطاعتـه تدريـس
ون حصل ماحصل نبقى صداقه وزمـلاء=نخدم الفكر والكلمة ومن غيـر تسيـس.

الشاعر طالب باتيس ابوراضي

مرحباء بالقوافـي الـف حيـاء وسهـلا=قل يسلم يوضح وايش خلـف الكواليـس
المحبـه بليـه وايـش ذي جـاك تبـلا=من عشق في الغواني بات نومه كوابيـس
كنت في العشق عاشق عشق عنتر لعبـلا=للغناء والطـرب ملقـي ثلاثـه قنابيـس
كنت قانص عزير الصيد في شعب محـلا=وانت تشهد على ذالـك ودلالـك ارويـس
لكـن الوقـت عيفـه وقتـنـاء راح ولا=عشقة الناس في الدولار لو شي في الكيس
من لقاء له وكالـه فـي المكـلا ووكـلا=يابجونه من البقريـن والشـرج والديـس
والحذر تحسـب انـي عاشـق ام المكـلا=تـرك الشـك يايسلـم وكثرالوساويـس
شف بنـات المكـلا مـن عشقهـن تبـلا=رد علوجه وانا برجع الى صـاط باتيـس
ماعيـون المكـلا صيتهـا صيـت يعـلا=من عشقها ضوى محبوس بين المحابيس
زوجوهـا فـي السابـق لمـولا المعـلا=عطروها بعطر الفل مـن صنـع باريـس
كـن يالـلاسـف روّح ومنـهـا تـخـلا=جالها ولد بن علـوان شيطـان وابليـس
قبلة العقـد ماتلتـام فـي الغشـم هبـلا=لكن اللوام بايضوي على الشيـخ باقيـس

الشاعر جمال العطاس

شفت ( يسلم ) تنشّد عن حوال المكـلا=ماقرأ ذي كتبنا في بطـون الكراريـس
ماتنشّد علـى ماصـار وسـط المعـلاّ=ماثبت كل من قد .. كان خلف المتاريس
جاهم اللـي قمرهـم بالكـلام المحلّـى=وأعلنوا عِرسُهم بالطبل هو والمراويس
زوّجوه البنيّة ( هنـد ) ساعـة تولّـى=زوّجوها وقدها اليوم في عصمة أبليـس
وأصبحت بنتهم ماليوم ياخـوي حبلـى=مايفيد البكـاء ماليـوم وإلاّ التناهيـس
لو تجرّأ أحد منهـم .. إذا قـال لـه لا=سلّط الوغد له عربان تشبعـه تدعيـس
مامع أهلها حيلة سوى الصبـر أولـى=عل من بعد ذاك الصبر فرجه وتنفيـس

الشاعر رعد حضرموت

خاضها تجربه مابين ايوه والا = قيسوا نظمكم حسب النطم والمقاييس
دبوس باليمنى وباليسرى مسلا = باتصافح وفي يدك تشل الدباببيـس
شفت غيم السحب على السقيفه تدلا = يامزارع حصادك حسب نوع التغاريـس
هب شرقي وغثيك عن سباله تخلا =موقع الغيت ترصده البـداوه بالتخاريـس
المحطات نسمع في الجزيره تجلا = ليت تبعد مسارك عن وعور التضاريس
شل حمله وهو طامح وبالقلب املا = بعد كل التعب عاد الحصيلـه تناهيـس
يا اّمل الخير يوم الخير يحتاج بذلا = من بخل مابذل في المال بايجيه تفليس
البشرمكرهم عالخير دايم تعتلا = والسبب قلة الحيله وكثر الوساويس

المشاركة الأصلية كتبت بواسطة طالب باتيس النعماني الاخت عيون المكلا شكرا لك على مرورك الكريم والحمدلله ان الموضوع نال رضاك واستحسانك وفكرتك ان شالله تنال رضانا واعجابنا الى الامام

المشاركة الأصلية كتبت بواسطة عيون المكلا مشكور استاذي وماقصرت وماعليش رأيت الفكره ولكن وضعتها في عذب الكلام وليتك تتابعها هناك عنوانها تضامنا مع الشعب العراقي واسفه استاذي واذا اردت نقلها هنا مسموح لك وفي امكانك نقلها لك حرية التصرف واسفه على الاستعجال !