أبديت بك يا رافع السبع الخيم = تعلم بأسراري وتعلم كل خيم
اغفر لنا في الضيق من بعد النسم = يا قابل التوبة في الوقت النسيم
الحمد لك يا يارب عاكل النعم = الرزق والأرزاق عندك والنعيم
ذا فصل با ندخل في أخبار الحرم = يوم الجهالة كلها قسم الحريم
ولعاد حاجه قالوا الشاعر ظلم = بصدق ويومه خاطري مليان ضيم
با ساير الميزان ما با جور جم = ولعاد نبغا سين لي يتبعه جيم
حد منهن حرمه ترد الكعب تم = مثل الذي يسعى على مال اليتيم
والبعض تعرف للمطابخ واللقم = يا بختهم لي هم يحبون اللقيم
ما بعضهن أفعالهن مثل شوك السلم = مثل المسلة تخرق القلب السليم
والبعض منهن ترفق ألا بالغنم = والزوج لا جاها تنشه بالشريم
وأن كان شي واجب نسم ولا دسم = تلبس وتتشيك على شان الحريم
والبعض ألا ساكته تشوفها مثل الصنم = ونته تعلّم لغةالإشارة يا غريم
والباقيات فيهن كسل مطروح جم = جثة وأما العظم لي فيها رميم
والبعض لأقد شافتك مليان هم = ترجع حكيمة مثل لقمان الحكيم
وتقول لك يا صاحبي با الله سم = يجلي همومك صاحب الوجه الكريم
وتصير لك مثل الحواشي والخدم = وتلاطفك وانته فهمها يا فهيم
وتطيع لك لا قلت شي قالت نعم = في قولها في فعلها سكر وليم
وان جيت في أخلاقها زايد كرم = وتكون لك مثل المراهم والكريم
وان حد لقا ثنتين يبغاله نسم = في تاربه بالخفوا عرّس أو تريم
و يزيد فيه الضغط ولاّ نقص دم = ويعيش يشبه صاحب الخلق الذميم
بعد القصور العالية صار يسكن خيم = ويكون وسط المجتمع مكشوف خيم
ويندمونه و هو ولا عنده ندم = ولعاد شي صاحب يحصّل أو نديم
وحده تقول يا خاينه ما فيش دم = والثانية تبغا تقضمها قضيم
يبغا سعادة باترجع ألا هم وغم = ويضيع كل اللي بنيته يا سليم
با تكثر الطلبات في الرزهو و اللخم = والشهر يرجع نص والله العظيم
والكلمة الوحدة حسبها أربع كلم = إما لبن دانو بغوا ولا كليم
تتكدر أيامك ويحصل ذا وطم = واسأل مجرب له تجارب في الحريم
المجتمع مسموم يا صالح بسم = سم التخلف فيه با قي من قديم
ضاعت مفاهيم الشريعة والقيم = أيام كانت ظاهرة والحق عميم
حط القدم يا صاحبي فوق القدم = والقبر في الحوطه يقع ولا في القديم
وان كنت زليت أناالاّ لحمه ودم = وعظام غبرا يابسه مثناة ديم
ذا لي حصل من هاجسي كمّـل وتم = والعفوا عند المقدرة يابن تميم
والقي صلاتي عا النبي خير الأمم = والله خص الآدمي بربع حريم