ابديت بالمولى وبه كل مبتداء=وكل شي بامره وبيده منتهاه
هو يعلم الظاهر ويعلم ماختفى=والسر يعلم به اذا ابن ادم خفاه
يسمع دبيب النمل لو مر على الحصى=وقد سمع تسبيح يونس ذي دعاه
سبحان رب الكون والاه السماء=ذي حكم اياته وعرشه في سماه
والفي صلاتي عالحبيب المصطفى=ذي حطم اهل الكفر واصنام الطغاه
وبعد يالهاجس توكل بالرجاء=وسم بسم الله ذي هو في علاه
ورتب افكارك وعجل يافتى=واحذر تاخر واعط كل شير مداه
ودع بلاد المجد وابلاد الرخاء =وقلهم مرجاعنا محنا دراه
قالوا لنا بترول في وادي سناء=وفي المسيله نوع ماشي في صفاه
ونبة البترول تنفح في الهواء=مثل الدخون الزين ذي ماشي كماه
والغاز واجد في الحواضر والقرى=وفي الصحاري من عتق لما رماه
والنفط في ضبه وفي ميناء قناء=واجد وقد كثروا البيع هم والشراه
ولعاد قدروا عافواتير الشراء=وللعقودالقادمه يبغوا قراه
والدفع كله كاش ماشي لامتى=بالين والدولار كلن من قداه
خلوا البواخر والمراكب في سراء=بالصبح حد سرحوا وحد باتوا سراه
والبنك بالعملات لاحد الفناء=ماحصلوا من بايشل كيسه ملاه
ولالقوا حد ذي يعاني من شقاء=ولعاد حد فقري يدور عادواه
والشعب كله في التجاره والغناء=وعايشين العز كله والرفاه
حد في الفلل ساكن وحد لما السماء=في قصر عالي حكم الباني بناه
والقوا شبح للدار واخر للخلاء=والجيب والصالون يقضي به مساه
والجو قد وصلوا الكواكب والنواء=وقسموا الذره وبلغوا للنواه
حتى الدعاوي لم تجد عند القضاء=ولاقضيه واحده بيد القضاه
ذا ذي سمعته عبر شاشات الفضاء=وعبر موجات الاذاعه والقناه
وعاد عينك بالحقيقه باترى =والوصف ماهو مثل ماعينك تراه
والختم صلى الله على خير والوراء=واله وصحبه عد ماخط بالدواه