[قمران]

بسم الله الرحمن الرحيم

اولا :

لا ادري هل هذا القسم هو المكان المناسب لكتابة هذا الموضوع ام لا

ثانيا :

ودي اقول لكم هالسالفه اللي حصلت لي قبل كم ليله
.................................................. ..................................

كنت قبل كم ليله من ليالي رمضان في كافيه انترنت

مسكين في العمل قطعوا الانترنت علينا بسببي لأني لاعن أم الشبكة

كل يوم اجيب فايروس للشبكة حق العمل ويجي ابو هنود يبحث ويسوي (( سكان ))

يطلع أنا ويقوم يخرب علي البروكسي وماعاد اقدر اشوف العالم

وفي البيت مافيه أمل تخليني امي أسحب سيلك التلفون

(( اجل وين النصاب )) اللي يقول قبل كم شهر اني بأركب دي اس ال

يعني طلعت كذاب

والل مو مني من موظف الهاتف اللي قال لي (( أبشر بسعدك ))

.................................................. .....

المهم اني دخلت مقهى ونفسي طالعه مالي نفس لأني جائع ونعسان

وكانت الساعه 2.30 فجرا

المفروض اننا نصلي او نتعبد
لكن وش نسوي (( عاشقين ولازم نسير على بنت النور ))

الله يهدينا

كان فيه واحد قدامي فاتح الماسنجر

وأنا أكبر ملقوف عين في الشاشة حقي وعين في شاشة الرجال اللي قدامي

العين اللي في شاشة الرجال اللي قدامي زايغه الى اليوم

ومدري وش بلاها

كنت فاتح 5 منتديات امامي ومن ضمنها الحلوه حبيبة القلب السقيفه ولا منتدى رديت فيه او شاركت بسبب ذاك اللي قدامي الله يشله

(( فاتح اثمي )) وصارت عيوني الثنتين ذلحين في شاشة (( الراعه )) اللي امامي

تدرون وش كان في شاشته ؟

الاهبل كان يدردش مع حرمه

مدري هو يعرفها او تقرب له او من حارتهم

بس واضح انها عربيه من شكل الغرفه والتسريحه

(( والله استحي أكمل ))

شكلي بأهون

وش رأيكم أكمل أولا ؟

ياملقوف ياعليان

انت بس اللي تبيني اكمل

هاه اكمل

يالله بأكمل السالفه لعل وعسى نشوف حل لها

كان الرجال يدردش مع وحده زقره يمكن عمرها 25 او اكثر

كانت لابسه ملابس محتشمه وما يظهر منها الا راسها وشعرها

و (( جللللليييلة الحياء )) كل شوي تشيل شي

يعني الكوت او البلوزه (( شكله كان عندهم برد ))

المهم باختصار عشان ما نخدش الحياء

ما بقى إلا شي علاقي

وأنا اقول اعوذ بالله

رحت لراعي المحل والله لقيته يدردش مع وحده أخدش حياء من ذيك

يعني قلت المقهى ذا رايح فيها

ناظرت يمين يسار ابي اغير محلي إلا كلهم يدخنون ومافيه محل كل المحل دخان

ظليت فاتح اثمي فقررت اني اروح بيتنا احسن لي

الزبدة في الموضوع

اني تركت النت شغال وطلعت (( حتى الاشتراك ماقفلته )) وراحت علي 50 ساعه

(( تكفى يالحضرمي ))

وتشجعت قبل ما اروح وقلت باشوف شكل (( الخجمه )) اللي حاط لنا صور بنات

يوم ناظرت فيه طلع شيبه ولابس ثوب مغربي او تونسي

ونظارات مثل حق المطرب اليمني ذاك اللي له واسطه في التلفزيون

وكل يوم راكزينه بعد صلاة العصر
وأصابعه قدها ناشفه مرة مدري وشلون يقدر يضغط على الكيبورد


يعني شيبه في آخر عمره وتلعب عليه البنية الله يشلها

بس مو هو بس اللي ينلعب عليه

حتى أنا (( فتحت اثمي )) وضيعت كم ساعه ولا استفدت شي

يعني ادخل من المكتب أحسن لي

ما عندي الا هنود 24 ساعه وهم يناظرون افلام هنديه

وتوبه من الكافيهات

خلاص خلصت سالفة الشيبه المغربي