السلام عليكم ورحمة الله وبركاته
تحية مليئة بالاشواق للجميع
واذا سمح لي ابو هاني اضيف كم بيت ولو انها خارجة شوي عن الموضوع .. لكن تصب في نفس المجرى .. لان اساس الفساد والخراب من النشأة السيئة والخاطئة .. الرّك على الترباه
وان كان يرى فيها خروج عن المضمون مستعد احذفها .. ذلا حليلة قربعت في كوري ذلحين وقلت بانحطها .. والعفو مقدما ومؤخرا .
وتحياتي للجميع
تالي الزمن ياناس ماتعرف ضحاه ومغربه=والخلق غير الخلق كل ساعة وهم يتغرّبون
لو قلت شو ذا ثور ؟! قالو لك ويومه نحلبه=ماقد سمعنا ياجماعة .. ثور منّه يحلبون!!
والمشكلة طبع القوارة عندهم والشقلبه=في كل صغيره او كبيره دايما يتشقلبون
ذاجيل ياخس جيل حبّه في النشب والمنشبه=ياريتهم يفصون حاجة .. بالعكس هم ينشبون
شيبانهم تعبوا .. وهم عقّوا حقوق المشيبه=والبر قالوا دين .. بايدفعوه لمّا يشيّبون
الرّك على الترباه .. ادّب سقلتك لا (تحربه)=شفهم يذوقوا المر لي كانوا سقلهم يحربون
إتّبّع اخباره .. سأل وينه؟ ومنهو صاحبه ؟=إحذر يساير ناس ياخس ناس ما يتصاحبون
ان كانهم اشرار حاول تبعده وتجنّبه=حاول بقدر الاستطاعة .. خلّهم يتجنّبون
وان كانهم اخيار خلّ الخير معهم يجذبه=من عادة اهل الخير فيما بينهم يتجاذبون
اسّس اصول الدين فيهم ع المكارم رغّبه=في الصدق والاخلاص لازم انّهم يترغّبون
واحذر تمد ايدك على الهفوات والا تضربه=كم ناس قد ندموا على الهفوات كانوا يضربون
راجعه عالغلطات بالحسنى .. برقّه إنّبه=بايعرفون الصح لو هم عالخطأ يتأنّبون
مادام عاد الخيط ليّن .. انتبه لا تقطبه=ربّخ وزرزر بالسياسة لجل ما يتقطّبون
والحاصل ان الفصل يالشعار وقّع مندبه=والخير في ما اختاره الباري وقدّر له يكون
( تحربه ) = تدلّعه .