بدع وجواب على الدان
بين الشاعرسعيد بن مهدي بالحمان المشجري
والشاعر طالب بن حسن باتيس ابوراضي
******************سعيد المشجري ********************
خرج ذا فصل ياطالب حسن لي نفس محسوره=على ماضي مضى في حد باقطمي وباكردوس
تخزن وانطبع فعله معي بالصوت والصوره=ومن ذكره تعلمنا في الدنياء حكم وادروس
حلمت انه معي صوط القثم والعبر والشوره=ولكن الحقيقه عكس طلعت ياصلاب الروس
*********************طالب باتيس******************
وانا شفني مثيلك في الهوى لي نفس مقهوره=يون قلبي على زام الوفاء والعز والناموس
حلمت القدس في نومي على إسرائيل منصوره=ولكن الاسف زايد علن ثوره على قابوس
**************سعيد المشجري****************
بدون العزم والتشجيع مابا تصمد الثوره=ولا بايصلح المغنى بدون العود والقمبوس
واناء شوف الجماعه كلهم ماحد تقن دوره=وذي مبعد شمله العفؤ بايبطي وهو محبوس
********************طالب باتيس********************
واناء زرت الحرم هذا السنه والقدس بازوره=وكل من قد رضاء ربه دخل في جنة الفردوس
وفي هذا الزمن ياكم وكم حاجات منكوره=وسط الهند ماتنكر فعال السيك والهندوس
****************سعيد المشجري*****************
اذا زرت الحرم عادك قراء ايات في السوره=وحاسب من غلط لاتقول ذا حظه شقي منحوس
كما ماخذت من غيرك عطه قدره ومحذوره=وتبقى لك جماله داخل الديوان والقاموس
****************طالب باتيس********************
وكل من قد غلط شفني قبض حلقه وحنجوره=وعارف كل مابيدور بين الصقر والطاؤس
اناء راسي غلب ماباتبع كل من يباء شوره=وباوفي لكم من حب صافي مادخله السوس
ديار العز بالجودات قل لسعيد معموره=وكل من يوفي الكلمه نعد هرجه ذهب وافلوس
*******************سعيد المشجري******************
قفول الحصن بيدك قم عمد في راس معصوره=وعالواقع ضحك مادام ملقي لك حنك واضروس
وخل غيرك ينقب عالذهب في راس تنوره=لاني شوف ياطالب حسن جؤ السماء معكوس
*****************طالب باتيس******************
حبال الود قل لسعيد بين الناس مزروره=ومن جور الزمن شوف العرب تمشي بدون احسوس
رفيقك ولد عمك محترف في التنس والكوره=وشل الكأس في الريد على الكندي وبامسدوس
ولكن النهايه قد خسر واخسره جمهوره=في الشعبه خسر من ولد بن دحمان والمهجوس
********************سعيد المشجري*****************
رفيقي لافطر في القطن يتغداء وسط حوره=ويتغذا لحاله قل لطالب في بلد لمعوس
دحق برجل داخل منطقه خطره ومحضوره=وفي هذا الزمن من هو مع السلطه ومن جاسوس
معه عاده امل في الشعب ذي يحكمه دستوره=تنعشر يوم يقضيها بأب واسبوع في لبعوس
*********************طالب باتيس********************
دق برجل لكنه ضوى بالرجل مكسوره=حراسه عند باقطمي ودايم حدهم محروس
مراقب كل شي يطلع قبل عينه وناظوره=وحتى الطير لا ميح على راسه ضوى منكوس
******************سعيد المشجري****************
رجع بي لليمن ذي بالصفاء والانس مشهوره=تركة المدفعيه بارجع للرمح هو والقوس
فصل جديد
************************سعيد المشجري***************************
ذا فصل والثاني سمعت الرعد في المنشي يحن=وامست سيول الخرف تعزف بعد حنات الرعود
والليل إلا انس جاك الدور ياطالب حسن=لاقلت نودي يالشوامخ من كلامك باتنود
هت لي وخذ في جون ميجر بعد مازار اليمن=والقى مساعي صلح مابين الشوافع والزيود
************************طالب باتيس*************************
لاقد سمعت الدان والمدروف بالهاجس تمن=في سعف بالحمان بالبلغ مرادك والقصود
واسميت لي في جون ميجر ذي وصل بندر عدن=ماقلل الميزان قل لسعيد عالقيم العمود
من بعد مازار اليمن خلا العرب في مرجحن=حط الف ثغره في الوثيقه قبل ترسيم الحدود
**********************سعيد المشجري***************************
في قسم واحد مابغيناء السمن كله واللبن=لبغاء تكاتف قبل تتفرق عرب كانوا سدود
والعيب فيناء لاتقول العيب في تالي زمن =لو شارنا وحد معد شي عود بايصقيه عود
نحن عرب مالفهم اللي بالفرنسيه رطن=من طبعنا كل من عطانا جود بالرده بجود
**************************طالب باتيس***************************
واحنا كماكم قل لبالحمان معنا حسن ضن=لجل الوفاء مابا لخالف درب لاباء والجدود
بكلف على شل الثقل لو بايقع عشرين طن=مابعتذر لو باتحملني الشوامخ والحيود
من بايخرس قال بوراضي يخرّس عالوثن=يحفظ حقوق الناس لايزيد محمد عالحمود
***************************سعيد المشجري*********************
الزود ماشي زود في قسمتي يانايم ذهن=اعطيتك المشقاص والساحل مع صحراء ثمود
وان قد دخلت السوق قبل المشترى شوف الثمن=واحسب حساب البيع قبل المشترى تكسب فيود
مالي في الدوفه ولا لي في رباط الباعشن=العين حمرا قل لطالب عالنصارى واليهود
*******************************طالب باتيس*********************
طبع العرب ياسعيد حد يرضى وحد بايشتحن=وانته حكم لاقد نظرت البينه هي والشهود
شف وقتنا غدار فيه الناس في تالي زمن=دعوى وتقوى قال طاالب بالدراهم والنقود
*****************************سعيد المشجري********************
كل من ذراء الحيله صربها غدر في ساحل بين=هذا مثل معروف تعرفه العرب هم والهنود
واعبود متكلف بحل المشكله ياهل الوطن=مش عيب لا جا حلها هذا السنه عايد عبود
*****************************طالب باتيس*********************
اعبود مابيقع كما التبع ولا بن ذي يزن=اعبود حط اللحم مابين النماره والاسود
والحاصل ان الهيج ذي يهدر يقطبها ركن=لازم نرصه قال شاعر بالسلاسل والقيود
*****************************سعيد المشجري**********************
حنكه سياسيه وخبره في العمل تبغا شحن=حرام يحكمها ملازم يرفضوا امره جنود
شلوا الحديد الزين ذي حده يطلعه المسن=جمال عبدالناصر المصري وفيصل بن سعود
****************************طالب باتيس****************************
يرعاء زمانه ذي على كل بير يرسيها زون=وان قد قسم بالعهد والميثاق مايخون العهود
ومحمد السادس في المغرب حكم بعد الحسن=يوعدك بالبكره ونصف الليل يخلفها وعود
******************************سعيد المشجري***********************
شوف الزمن والوقت يتقلب على عدة عين=ساعه يحر جوه وماساعه يجي منه برود
كنا وكانوا فعل ماضي قبل يوخذك السهن=مابا يقوم البيت ياباتيس لا ماله عمود
*************************طالب باتيس********************************
الادمي بيضيع لاضيع فروضه واسنن=من بعد مايغلط ويسهى في ركوعه والسجود
قبص العقارب سهل والحنبه يقع قبص الدفن=كل من قبص منه ضوى يالمشجري بين اللحود