[سالم السقاف]

سكتّ وكنت أظن اني بسكوتي أجبر المكسور=بعدت وما دريت ان البعاد وصال يجمعنا
أشوفك كل ما غرد على غصن الوله عصفور=وكل ما ناظرت عيني بقايا من مرابعنا
وأخطّك كل ما سال القلم دمعات بين سطور=رموشك قافيه والعين صدر وعجز(ن) ومعنا
وأضمك كل ما هب النسيم وسرمد الديجور=وماكنا نظن بيوم تتفارق أصابعنا
كأن السعد بأبواب اللقاء في اخر الطابور=كأنا دون ماندري على الأحزان وقّعنا
لمحتك ليلة البارح بحلمي والزمان يدور=قمر يمشي وبسماته تزين ليل شارعنا
وقفتي يوم شفتيني وقلتي لي بدون شعور=عساك بخير يا عمري .. فراقك ما توقعنا
عرفت ان الحكي أسلم من الصدّه ولعب الدور=حكى صمتي كأن الصمت يروي عن مواجعنا
تعالي مابقا عندي دموع(ن) تكشف المستور=تعالي مابقا بأرض المحبه صبر يوسعنا
تعالي وارحمي قلب(ن) يعد اليوم ست شهور=تعالي جافي عناد(ن) سقيناه بمدامعنا
من اللي يجبر الأحباب يطفوا شمعهم والنور=مـدام النوم ودّع ليلنا والطيف يتبعنا
تعالي نلتقي ما دام كلٍ مننا معذور=هلا بالوصل دام الشوق من داخل يقطّعنا

اعتذر عن انقطاعي عنكم لظروف خاصة
واتمنى أن يحوز النص على اعجابكم
أخوكم المحب : سالم السقاف