[سبع الليل]

هذا الشعر للشاعر محمد بالناصر القعيطي ( بوناصر )
والشاعر عايض بالوعل ( بومنصور )
في الطايف ولكن للاسف لا ذكر العام
___________________________________________

يقول بوناصر

ذا خرج فصل والثاني على راس الجبل
راعد قوي والبرق فاطراف السحاب
حيا منا مبداه ياعز وجل
اليوم فضلك يافضيل
ياحيها ذيك الطهوب المرمدات
___________________________
قال بومنصور
قال الفتى المهجوس بانضرب مثل
في بنت حره مالها حتى الثياب
الاهل قالوا مابها والله بدل
ومننا ما باتميل
وتمثلت في لوله والتاليات
___________________________
قال له بوناصر
تنعى سوالف سابقه ذا لي حصل
وزادها ربك مهونه وانقلاب
الا ان وقع عالبنت ياصاحب جدل
قل باتقع قيمه قليل
لا كانوا التجار دايم في شتات
__________________________
قال له بومنصور
كل من ترك سربه وخلها همل
ماعذر ماترجع غنومه للذياب
اهلكتها غصبان رجعت في الفلل
عارضتها لاهل السبيل
اما المصيبه باتجي في المقبلات
_________________________
وهذا الشعر لعايض وحده
قال
ذا خرج فصل والثاني على حيد النشم
اغصان شاميه دواني مثمره
ماحد لحق من تحتها طرح القدم
والله ماهذا كلام
حتى نبديها على البيدى رياح
مرسومة الجانب بلاسمها بسم
في مصر مابين الغبب والقاهره
عليهن التسليم ما خط القلم
وماقراء القاري ختام
وما سجع قمري على سانق وناح
ايش السبب بين العرب هم والعجم
الدين واحد والعوايد عاثره
كل من لغب مابايحصل له نسم
الخيل في المرصن قيام
قالوا ركوب الخيل لك مابايباح
________________________
وهذا الشعر لعايض وبوناصر
يقول بوناصر
فوق البخاري ولعوا عالمشعبي
في قصر متعلي وساسه عالجبل
مولاه عالجوده يهد مايعتكي
اهل الشرف قد جاوروه
البرق بايلمع لحق طاهف شنين
قال له بومنصور
عيني على معوزسعيدي مسكتي
مولاه قد شطف حموله عالوكل
وين الذي بايع انا لي بشتري
ياغالي القيمه هبوك
وديت انا صيح بصوت الغافلين
قال له بوناصر
مابكرت القمصي بشدي تنطوي
بكره عمانيه ولا جاها العقل
يابخت راعيها من الدره روي
كل من عبر سايل عطوه يامن بغاء
صاحبه يسقيه الشنين