السلام عليكم ورحمة الله وبركاته
قصيدة تتكلم عن واقعنا الأليم
يقول من بات ساهر في خلا خالي = في راس مزموم نايف فوق لجبالي
اجبال صعبه على ابن اللاش ياصلها = فيها الوحوش الضواري هن ولشبالي
ع العز بسمر معاهن حيث ماسمرن = مادام عندي برت وابني على جالي
اتعبت لجله وربيّته ودرّسته = علّمته المرجله وصار رجّالي
لاهو محبب ولاكاذب ولاسارق = ويكرم الضيف ع الهلبى وع الحالي
وبعد ذا يالقلم مبعد كمل حبرك = عادك معبى وفيك ألوان واشكالي
اخضر و وردي ولحمر لادعت حاجه = مابيك تحجبه خلّه سيل سيّالي
قدني مخليك للحاجه إلى حصْلت = اترد بمكيال ضدّي ميت مكيالي
والدي قد قال لي باحذّرك تصمت = كل من صمت ع الخطا تسطاه لنذالي
مابيك ترضى على اخوانك مع اصحابك = شفهم كنانك إلى امسى الغيث هطّالي
ولاتفكّر ف واحد من نطل ينطل = ماكل خيّال ف الازمات خيّالي
الخيل شف قد لها واحد يباريها = عارف بغاراتها مطلع ومنزالي
ماهي لواحد غبي لاشافها خايف = مبعد تغيّب عن امه خثع سنقالي
ياشوق يسلم لحصن الجد بو يسلم = جدي عمر لي رحل والناس رحّالي
وديّت ازور الوطن واسمر مع اصحابي = واشوف مول المعالي هم ولسفالي
واسمر برخيه لها في خافقي مسكن = وازور يسلم مع اعمامه ولعيالي
واعبر على المصنعه في دار بو فايز = من قبل ماموت بتسمر مع خالي
حب الوطن في فوادي له محل ثاني = حتى ولو فيه شلة غدر عذّالي
اهل الرشاوي مع المسؤول يا ساتر = قد باعو المرجله من دون دّلالي
شبّان ماشي لهم نخوه ولاشيمه = والمشكله ورطّو لك ناس عقّالي
ياعيبت الشوم قد بعتم ضمايركم = وش بايقولون عنكم بعد لجيالي
قد بعتم الآخره بحطام دنياكم = ماحد يظل حي عاده موت واسوالي
بيّاعة الصدق بالرشوات قد نجحو = لا قلت هذا محرّم قال شوّالي
واصبح كلامه صراحه وانته الكاذب = قد كلمة الصدق معصوبه في الشالي
كنّا بشله خبيثه في زمن عنتر = و بعد جانا علي في ثوب سركالي
قلنا هلابه ومرحب بايحررنا = هذا علي بو حمد كسّار لقفالي
من ظلم ذولاك لي عملو بنا المنكر = قلنا هلابه ومرحب في تعجّالي
من دون مانفهم المقصود وش قصده = من ظلم ذولاك شفنا الويل يالوالي
ليلة اتانا من الفرحه تزملنا = في عام تسعين بتنا ياتزمّالي
واهديته اشعار بن عكعوك واهداني = صوره كبيره انا واثنين عمّالي
وألفين درهم وجمبيه بلا محزم = قالو هديتك من قايد وفي غالي
عكعوك يسلم سرى مبسوط يتنهجر = صورته قدها بيده هو ولبطالي
ماقول به شك علي حرر حرايرنا = لكن وضّف عرب قشران جهّالي
مثل الذياب السرافه وسط لغنامي = اذياب ما وفّرت لوّل ولا التالي
قد قالو ابشر حقول النفط قد نتجت = والنفط ماجود في لشعاب وارمالي
الفقر ولّى وشعب الخير باينهض = ماتمشي الا بلكزس بين لدغالي
وان عاد لك شف ف الحلوات لاتبخل = شل مهرها ميت بوزه نفط يالغالي
قلناله النفط له شركة وماليه = ماحد يقسم بوْز شو ذا تختّالي
قد قال: انته غبي ماتعرف المغزى = خلّك مع اهل الحيْل سارق ومحتالي
منته من الناس لي تاكل ولاتشبع = املي ثبانك ورح مالك ولقوالي
من ما وقع ذيب ماله عندنا موقع = خل التعفف وخل شعرك ولمثالي
فالنفط شل قسم لك من قبل مايصدر = ما لا صدر قده للمسؤول طوّالي
ياضيم عكعوك من ماشافته عينه = شاف المرض والنكد و اوجاع وانكالي
قد شاف ليتام لي ماحد لهم عايل = في وسط لسواق تمشي ياتسوّالي
الفقر والبوس والحرمان يطحنهم = واهل الرتب في قصور الفخر نزّالي
بالله هذي عداله ياعلي عندك = والا تخاذل وقلّة ذوق واهمالي
اردع بطانتك قبل الشعب ماينهض = وان قد نهض بايسيل الدم شّلالي
وباتفجر وباتصعب على اعوانك = اخماد نار الغضب في روس لجبالي
وباتقع كارثه ربي بها يعلم = ماباتفيد الخطب ولا التحيّالي
من كل موقع ومن كل صوب باتشعل = من خلف صعده إلمّا حوف شعّالي
والامر متروك لك يا رمز وحدتنا = فصّل رقاب السرق بالسيّف فصّالي
سبّر بسلك القضى لي مص دما شعبك = وبعدهم حاسب اهل القيل والقالي
وارجع لضبّاطك اللصان حاسبهم = هم بهذلو شعب فيه الجوع بهذالي
وعنصروهم وقالو ذا ولد فارس = وذا فئه رابعه من اصل صومالي
وختمها فاطمه ماشي لها موقع = صارت فريسه لرحمة بنت هشّالي
يسلم بن صالح بن عكعوك بن غانم
22 / 4 / 2009 م
11:00 ص