هذه القصيده للشاعر ( عبدالله بروم ) من الالف الى الياء
أ- ألفته في العشقه كثير= والقماش الزين جبته والحرير
والصدف ذي هو في البحر الغزير= والذهب هو والقروش الفليات
ب- بدع ياهاجسي فوق الفصول= واستقل فوق القدم هي والرجول
وافتح ابواب الهويه بالقفول=لا تخلي شي بواب مقفلات
ت- تمن كل مابغيته من بروم=لي قسومه زايده فوق القسوم
حاط عاكتفه في العشقه نجوم=مايجيب الا قوافي شافيات
ث- ثله والديس والغار الحمر=حط فيها الساس والقاء له مقر
والمحله في وسط بندر عمر=ترتغب بين القلوب الساليات
ج- جد فيها وزد في الاجتهاد=ياعلي صالح وطور في البلاد
واقض عا اهل الرشاوي والفساد=والذي معهم خبيثين النيات
ح- حكم بالعدل في كل الامور=لا بغيت الارض تصبح في سرور
بعد ماضلت تخر عاقرن ثور=من تقلاب السنين الماضيات
خ- خلوفه عاخلوفه تختلف=في صيغها والسياسه والهدف
والمخباء لازماً باينكشف=في الليالي والسنين المقبلات
د- دام الله كل خيٌر وبار=ورد لبلاده وشعبه اعتبار
والوفاء مابينهم والازدهار=والرخاء والامن في كل الجهات
ذ- ذل في الناس ماتقول الحقيق=لا انزلوا عقالها من عالطريق
ايش لي خلاء العدو يرجع صديق=من غلط قل له يشوف الصايبات
ر- رحمك الله يالريس جمال=وتشهد الاقوال لك هي والفعال
والتواريخ القديمه والنضال=والمعارك والحروب الحاميات
ز- زمنا كلنا بالاتفاق=بين باجابر وبن عمه سحاق
والوساطه بينهم هي والوفاق=كننا شفنا الامور معكسات
س- سر مابينهم امره عجيب=مايجي من بعد والا من قريب
سر مابين المداوي والطبيب=مايعلم به غير رب الكائنات
ش- شرح الشعمليه والسموح=مايطابق شرح سالم باصلوح
والزوامل والبنادق والقروح=والميازر والسلاب الغاليات
ص- صافينا الخواطر والقلوب=وكننا الى الان ماشفنا هبوب
والعليم الله بالي في الغيوب=والمخباء والسرار الخافيات
ض-ضاهرها يبشر بالسرور=والفلك عالناس مره بايدور
والكدر والوسوسه ذي في الصدور=وبايفرجها رفيع المنزلات
ط- طلع يالبحر من قاعك صدف=شف دموعي سيل جارف لا عزف
يسقي الوديان مره والعطف=والخطم هي والشعاب المزمنات
ظ- ظلمنا الوقت نمشي في ظلام=والسماء يخلي وتملي بالجهام
مانشوف الشمس من كثر الغيام=والكواكب والنجوم الزاهرات
ع- عقل الباعمر وال باسعيد=حنب المعصاد في وسط العصيد
والوثائق في صناديق الحديد=والامور معكسه ومشعبكات
غ- غزه تشتكي هي والخليل=صوبها والجرح من سابق دويل
ساعدوها عالخفيفه والثقيل=لا تخلوها تشل المثقلات
ف- فين العدل وفين السلام=بالقصص ماشي عداله والكلام
لي يقصوها علينا من العام=في الجرايد والصحف والموجزات
ق- قل للديني وبالحباك=سوس مابين المطاحن والحناك
منها بالشان شي عاده فكاك= لوبغيتوني حلف بالعاديات
ك- كل واحد يحافظ من قداه=شو الزمن والوقت يبغاء انتباه
لا تخلون العدو يلحق عشاه=او يحصل له طرق ومناسبات
ل- لموا جرحكم والصوب لم=واستعيدوا عزمكم هي والهمم
وارفعوا راياتكم هي والعلم=وانصبوها بالحصون المانعات
م- ميزان الهواء ماهو بتي=كل ساعه فيه كفه تصطعي
حد يشل زايد وحد يوخذ شوي=الكذب من قال الكفف متساويات
ن- نامي يادفوفي والعيون=واشبعي لش قال بن هاشم سكون
وانت ليه ياقلب وايش لك بالشطون=منته حلال العقد والمشكلات
و- وين الناس منك وانت وين=لا غلط واحد ولا غلطوا اثنين
في الزمن هذا بكت كمين عين=والخواطر والقلوب مكدرات
ه- هداك الله عافعل الصواب=والطريق الزين وخيار الصحاب
لجل تكسب اجر ربك والثواب=في تهار الحشر ونهار الممات
ي- يدور الفكر في حاجات جم=كن حرف الالف ذا غلق وتم
ماسمحي ازيد واخطي عالعلم=قال قف لا تجيب شي عادك بيات
كنني بخطي على حده قليل=ان بغاء بالطيب والا بالصميل
من حقب منه يحط الزنجبيل=لجل يلقي له خبر والمواصغات
كل شي موجود في راس الحبيب=ذي يحط الساس عالحيد الصليب
مايحطه عارمل والا كثيب= يوم يبني والحجار الهاملات
كم وكم شيد في العشقه قصور=من ثنعشر دور لا عشرسن دور
من حضر قسمه يشل روعه بدور=لا يناظر للقسوم التاليات