[صالح العفاري]

قصيدة الوعود

يارب الارباب عبدك بدعها يسأل = يا من دعاء العبد عنده لا دعاه مقبول
اغفر له الذنب والزلات لا قد زل = انت الرجاء والعطا والقصد والمأمول
وازكا صلاتي على خيرة نبي مرسل= صلوا على النور ذي خلا الظلام يزول
بعد الصلاه ياحكومتنا الرشيده هل = عندش خبر كيف حالة شعبنا المعلول
هل تعلمي ان قد الاسعار لا تشعل = قد زاد سعر السلع عن حده المعقول
وصابح الشعب من كل الجهات معتل = ماعد درا الشعب كيف يعمل بمن بيعول
ان سار يشقى فما به شي عمل يعمل = ولا شقي ما كفاشي حقه المدخول
من قبل ماينتخب قلتوا له اتعقل = واوبه تغير وتعمل للدواء محلول
مابش جرع لا تصدق شي ولا تفشل = انته بتسمع مرشح حزبنا بيقول
حرام لا اصنع حرام لا اترك حرام لا افعل= حرام لا بزكم ياشعب في هندول
بدي لكم كهرباء وارخص ال وال وال = ولازد اغلي عليكم قرش مش معقول
لا ما طلع وان قد حول وقد بدل = واتضاعف السعر بعد الانتخاب مدبول
وليش هذا العمل يكذب ويتحول = اين سار ذاك الخطاب الحالي المعسول
هذا جزاء الشعب حين صفق وحين طبل= وكم يصيح دمي من اجلكم مبذول
هذا جزاء من سهر ياخيل واتبهذل= هذا جزاء من سعي في عرضها والطول
لا ما تورم حفاه واتقطع الصندل = وسار حافي بيلوي فالقرى ويجول
هذا جزاه حين ما كبر وما هلل = وصاح لاما تسدد حقه الحلول
صيح وليح ولكن خاب ما امل= خلوا له البقبقة والبيض للمسئول
اشتيه يأمل له المشرب مع المأكل = وان حين بقي فالنهاية شعبنا المأكول
في كل يوم الغلاء اجور فوقنا واثقل = والاقتصاد متجه للوادي المجهول
حنين قلب المواطن كم قد اتحمل= يروه ساكت وقاموا زادوا التحمول
ساع ذي لقي شخص مقتول فالخلاء مهمل= مشع ابوها وقام يطعن المقتول
قلنا وليش قال اقع ساع عنتره وابطل= والسيف حقي يقع سيف الله المسلول
واحنا نقل للحكومه قالت ايش افعل = هذا غلاء عالمي مابش لنا مدخول
مره تقول المطر في سنغافوره قل= ومره تقول الجراد قد كمل المحصول
قلدكم الله هل هذا السبب يعقل = هل عذرهم عندكم يااهل العقول مقبول
هذه دعايات واستهزاء وعذر اهبل = ايش من غلاء عالمي ياحضرة المسئول
على اليمن بس جاء هذا القرار منزل = قرار دولي علينا ساري المفعول
مادام وهو عالمي فليش ما يشمل = عمان والقاهرة والصين واسطنبول
لاهو غلاء عالمي ويش دخل الديزل = وهو من انتاجنا ويش دخل البترول
وليش ما يجلس الصابون مثل اول = والسمن والبيض والفاصوليا والفول
ماعاد هوش خارجي هذا قده مدخل= هذا قده من خيول الشعب ذي بتصول
الاقتصاد قد تدهوروالنظام اختل = والدين مهمل وقانون اليمن مشلول
والصحة اتدهورت والعلم قد هرول= والعدل لا رحمة الله فاليمن منقول
واكتوبر افلح ومايو بعدها اتكفل = ومات سبتمبر الثورة ومات ايلول
نصف اليمن فالخليج يشقى ويتسول = والنصف الآخر مجانيين عقلهم مخلول
ماعاد بلا العظام والجلد والهيكل= قدك تشوفة مثيل العودي المنحول
ذلحين بسم الجميع جينا نطالب حل= تفكوا القيد ذي خلا اليمن مغلول
ان استجبتوا لنا والا ولو نزعل = مابا نخرب ولا با اسير افجر كول
باضل اناضل نضال سلمي وبااتحمل = وبيننا ياذره حين ينضج المحصول
والعفو لاشي قصر هو شعر مستعجل = والعذر لاهو سوى قال المثل مقبول
والختم اصلي على خيرة نبي مرسل = صلوا على النور ذي خلا الظلام يزول