الاخ يسلم هذه مداخلتي المتواضعه
على قصيدتك الرائعه عيون المكلا اتمنى ان تنال اعجابك واعجاب القراء الكرام ولكم كل التحيه
عمر الذيب
مرحبا بالكلام الزين ما غصن نوش=وعد ماحن في جبح الابو حوله الريش
وعد ما حنة ارعوده وما دلهم الطش=وعد ماخط مداده بالقلم في قوافيش
ولد عكعوك لي جاني كلامه منعنش=صم راسي وصم كل راس فيه التنا غيش
ير هلباء معه يصرب ويقظم ويجهش=ما يجب الذي به سوس مولا المغابيش
ياعيون المكلا صاحبي قد قصدلش=هز قلبي بما قاله وحاول يعزيش
في المصاب الجلل لي هو من اول حصلش=حاول انه بما قاله يهون بلاويش
وحاول انه على درب المعزه يدلش=وانتخالش بحلان المقد والقراميش
واهل كنده وسيبان الذي هم من اهلش=والقثم والمشاجر لي يحبون طاريش
وكلنا يا عيون اليوم من تحت امرش=كلنا الشاب والشيبه على الصوت بن جيش
وان تشكين في حد هو سبب ما وقعلش=الندم خذه واصبح لولي بينا يديش
جاب لش كسوه اجديده وفي الحلق رشرش=وقال كل ما تبينه جيت به با نراضيش
انتي الام واحنا اليوم حراس عرشش=مستعدين كل لحظه وكل حين نفديش
ويل يا ويل من صابش بعمده ومسش=مننا فوق راسه با تحن الشواكيش
لو يكون الذي من سمح سلم وبقش=الف مليون مهرش يوم ماكان هاويش
خذش فرحان لكن بعد مده زقلبش=حاسب انش معد لش حد من الظلم يحميش
غصب عنه يطلق بعد ما دق عظمش=غصب واحنا علينا واجب انا نربيش
وان رفض ما يطلق كلنا لش ومنش=با يقع شل وحط يا عيون مابانخليش
با نحاول لوالدنا ولازم نردش=بالرضاء او بقوه مثل ما رجعت احنيش
ذاك بونا ونعرف انه اللي يحبش=حب من صدق ما هو حب مصالح وتفنيش
حب باين في اعيونه ومن ذكر اسمش=صب دمعه من اعيونه على ذكر طاريش
با نرجع ملا محش القديمه وشكلش=بعد ما سارلش من كل مرض با نداويش
وانتي احني علينا واقلبي شوي دلش=ما نبا بعض لشياء فيش الله يهديش
راجعي حساب مصروفش مع حساب دخلش=وافقهي حد علينا مثل لول يغريش
عمر الذيب