[عبدالله الجعيدي]

اقتباس : المشاركة الأصلية كتبت بواسطة علي فدعق الهاشمي [ مشاهدة المشاركة ]

((يالحضــرمي)) بدع /علي فدعق الهاشمي يالحضرمي سرت في درب الوفاء والخير = واجيال ساروا على دربك بنفس السير =ميّزك رب البشر عن سائر الأجناس = (عالعين يالحضرمي قدرك وفوق الراس) بالعطف ينبض فؤادك والكرم والجود = من حيث ما تطرح أقدامك يهب النود =واصبحت للطيّب في هذا الزمن نبراس = (عالعين يالحضرمي قدرك وفوق الراس) كل من يجالسك لك يرتاح من جلسه = واللي استأمنك يستأمن على فلسه =تاريخ لك فالامانه يعرفوه الناس = (عالعين يالحضرمي قدرك وفوق الراس) واللي سمع عزف عودك حس بالراحه = والدان أصله معك قفله ومفتاحه =وان غصت جبت الدرر واللّول والألماس = (عالعين يالحضرمي قدرك وفوق الراس) طيفك إذا مرّ بي نسم على حالي = واسمك قصيدي ترنّم به وموالي =في كل ورقة كتبت اسمك وكل كراس = (عالعين يالحضرمي قدرك وفوق الراس) في الأصل والفصل من يرجع لبو حضرم = عند الشدائد قليله غصب يرجع جم =كل من يشوفه يقول أنت الخضر واليأس = (عالعين يالحضرمي قدرك وفوق الراس) اسمع قصص عنه زينه حيث مابتيت =وان غبت عنّه قدر يومين له حنيت =واشتاق للعود والمدروف والمرواس = (عالعين يالحضرمي قدرك وفوق الراس) جواب الشاعر الكبير /حامد بن عبدالقادر البار الهاشمي قال حيا بالكلام الزين = كلام فيه المراهم والدواء للعين = من عند شاعر وفي مكّن حجار الساس = (حنيت يانوب عالمجنى وناد الراس) صوتك تردد في الوادي وفاح العـود = جبت الحقيقة وقتّلت الحناش السود =والبار يشكرك والمحضار والعطاس = (حنيت يانوب عالمجنى وناد الراس) الحضرمي في بقاع الأرض له تاريخ = بالصدق والصبر جاوز كوكب المريخ = لا الزير سالم عمل مثله ولا جساس = (حنيت يانوب عالمجنى وناد الراس) والعلم له دار في الغناء وفي سيئون = وفي الخريبة وفي الحوطه وفي قيدون = وكل كلمه لها في شرعنا مقياس = (حنيت يانوب عالمجنى وناد الراس) والفن في حضرموت الخير له بنه = واللي يكذّب كلامي ماعليّ منه =مسكين لا ذوق في راسه ولا إحساس = (حنيت يانوب عالمجنى وناد الراس) لكن بعض العرب مايذكر المعروف = يرمون عالحضرمي بالميزر الشاخوف =ويحمّسون الكبد والقلب في المحماس = (حنيت يانوب عالمجنى وناد الراس) واليوم يالطيب الأصلي نظمت أبيات = والناس سمعوك من دوعن إلى عينات =قدمت للحضرمي مرهم يزيل البأس = (حنيت يانوب عالمجنى وناد الراس) ياليت ياليت كل من قال شي يصدق = ليخلي النار في وسط الحشا تحرق =ولايزيّد لا أكل الحضرمي بسباس = (حنيت يانوب عالمجنى وناد الراس) وان كان زليت ردودني إذا زليت = القلب مفتوح للقاصد وباب البيت =هارون يعرف مقاطيني وبانواس = (حنيت يانوب عالمجنى وناد الراس) وختمها كلكم صلوا على الهادي = ماحط ماطر وسال السيل في الوادي =واله وصحبه وأتباعه خيار الناس = (حنيت يانوب عالمجنى وناد الراس)

يشرفني ان اكون اول من يمر بهذه الدرر الرائعة من شاعرين لهم صولات وجولات في مضمار الشعر العذب بدع رائع وجواب لايقل روعة
اثبات مرور ولي عودة . تحياتي