هذه القصيدة للشاعر الكبير / عوض بن مبارك بن عوض شريم
وهو شاعر معروف لا يشق له غبار من سكان مدينة المخارم باسفل رخية والله يشفيه آمين ولا يحرمنا من قديمة وجديدة
وهذه القصيدة كتبها على ما آلت له الاوضاع باليمن السعيد وهو يتمنى بالرقي والرفعة لبلده وهو الان متواجد بالسعودية
اليكم القصيدة
يقول بن شرمان يا ما بحالي=غنيت من ضيق أنعدم لتساع
ما شي بنا خصه ولا قل مالي=ما نحسب الدنيا هي إلا متاع
ذلا ذكرت الوقت ذي قد مضى لي=يوم الغنم والذئب مره رتاع
واليوم لا راحة ولا قلب سالي=ولعاد شي هيبه ولا طول باع
قد خربت الدعوة مع ماجراء لي=بعد الكهارب ذيك جتنا الشماع
وإلي يجيب الصدق قالو مغالي=كرامة بن آدم رخيصة تباع
ذا قول من شاعر يجيد المقالي=نظرته ما تخطي قوي لطلاع
من جور ذه ليام هي والليالي=ترى أحشائي ممروسه وكبدي مياع
ساعة نظرت الغول ذي فالجبالي=تحته عرب يرمي عليهم قلاع
ويحكم العالم بقوه وفيتو=قد خالفوه الرأي كماً شجاع
ما بنت بلكديش تحتاج صالي=فكت فالمنعة غنمها شباع
وبحجة المنقود ذه ما تبالي=بركت على الجوّان وأرض المناع
قد لبست البرقع وبراس شالي=لا كن بفضل الله طاح القناع
لانا مع الوحده ولا نا بنفصالي=مقصودنا العزه نبا لرتفاع
وإن كان فالوحده لنا شان عالي=با قول وحداوي إلما النخاع
وحده بدون العدل هذا محالي=شطري مع شطرك تنذا وضاع
ذا لونه أسود وذا برتقالي=وذا جذع سنه وهذا رباع
با قولها بصدق برغم المراره=نحنا توحدنا بدون انتفاع
ومن هنا يا ناس يبقى سؤالي=هل با يعيش الحر بين الرعاع
هم نهبو الثروات ذي في وطنا=وأصحابها فالأصل ضلو جياع
أصحابها تركوها مثل بني هلالي=من ضمنهم هيثم وزير الدفاع
ذا ذي حصل معنا بواقع وصورة=لما متى واحنا نعيش الضياع
شف با جبع قالو ذا الوقت تكبر=قصده يطفى على بلقفاع
يستاهل القوه معه ضغط عالي=والنفس معتاده على لبتلاع
عنده عمى بالقلب واعمى بصيره=حتى ولو بانت عيونه وساع
وبلقفاع يقول ما دن راسي=ما عمرها الآساد تخشى الضباع
ترى حمير الوحش ذي فالبراري=حاشا وكلا تخيف السباع
والصلح يستدعي لا شخص ثالث=لابد من لجنه لحل النزاع
قلنا بلا لجنه ولا حكي فاضي=نعرف مخارمنا ونعرف مباع
والامر واضح به الكل يدري=ليس التجاهل ذا وهذا الخداع
إلى متى الوضع ذا طول وطالي=ذا يشتري فينا وهذاك باع
شعب الجنوب يقول يهل الشمالي=عن مركب الوحده طوينا الشراع
التسع هي والعشر لعوام يكفي=بعد العناق الآن حان الوداع
ذا راينا فالامر اول وتالي=وذه مشاعرنا مع الانطباع
شف حبة البندول ضد الحراره=والراس منه يزول الصداع
إن حد حكم بالصدق ولا حكمنا=ما لكم في الارض طرح الذراع
بختم بذكر الله ومولى بلالي=ذي قد سكن طيبه بخير البقاع
والآل واصحابه عداد الرمالي=ذي هم على السنه بالامر المطاع