شبر شبر ,,, ودار دار ,,, وزنقة زنقة ,,, وبيت بيت = وش بقى يثبت جنونك وإرتباكك يا ( عقيد )
وش بقى خليت يامن قمة الجهل إعتليت = في الخطاب الي فصوله ما بها شيٍ جـديد
وهي عوايدك القديمة يا (معمِر) من وليت = عرش في أرضٍ ثراهـا يشهد بمجد تليـــد
ديرة (المختار) الي جرت فيها وما أرتويت = وقدتها نحو التدني وأنت بس المستفيد
وسدتها أربع عقودٍ بالجهالة وإمتطيت = صهوة التنظير حتى صار منطوقك زهيــد
وعثت فيها لجل تبني مجدك الي به طغيت = ولين ما صارت أسيرة ظلمك القاسي العتيد
سجنها قسوة (كتابك) والذي فيه أفتريت = محـدثٍ دستــورك الـي تافــه خبــاله فريد
يا (عقيد) البؤس يامن ضاع لُبك وأعتميت = عن طريق الحـق حتـى صرت متعجرف بليـد
أسألك بالله قلي بس لو تسمح ياريت = تبعــــد التكرار لنـــك تقعــــد تلت وتعيــــد
هل نسى التاريخ فاسد لو تقول إنك قريت = أو تكون نهاية الي ظالم لشعبــــه سعيد
وهل يكون الموت حق ولو في العمر أهتنيت = أو تروح الروح بأمـــر الأقرب لحبــــل الوريد
أو يكون القبر جنّة ساعة في بطنه ضويت = وشفت فيه ذنوبك الي تشعل النار وتقيد
أو يكون الموقف الي من جنونك له نسيت = بين يدين (المهيمن) ساعة الحر الشديد
وش تقول لأم تبكي طفلٍ لحلمه نهيت = وايش ردك أو دفاعك لو طلب حقه شهيد
وماهي بنود الإجابة عاليتامى وما هقيت = كافل حقوق اليتامى يجعلك عنها تحيد
يا (عقيد الشر ) بعدك من غرورك ما أكتفيت = كف عن عظمة جنونك وإرحل بظلمك بعيد
إرحل وفارق بذلة يامن أذنبت وخطيت = بإستباحة دم شعبك مستغل حفنة عبيد
يعبدون المال الي به تعنجهت وسخيت = وجدت به لأوغاد لجل تدوم ولشعبك تبيد
بس للظالم نهاية ولو تجبرت وطغيت = وأبشر بيومٍ تطارد فيه مهزوم ووحيد
ذاك هو يوم التقاضي يوصلك لو أختفيت = جند حق ويطلبونك وانت متخفي شريد
عندها دور مكان وشبر شبر ,,, وبيت بيت = ودار دار ,,, وفرد فرد ,,,وزنقة زنقة يا(عقيد)
مع خالص الدعاء للشعب الليبي الشقيق بالخلاص من براثن هذا السلطان الجائر
مع جل امتناني وتحياتي للجميع
حسين الشاطري