[عيبون]

بالرضاء صبّحه ربي حصن متعلّي وعامر=وان غدر ليلي طلبت الفرد يسعدلي مساه
والتحيه جات من عاشق خلطها عطر فاخر=من صميم القلب توصل له وتعبق له فناه
ماسخابه وازعل الا لاعبر زاخي وعاكر=لجل ماشي طين يدخل فيه او يعبر قداه
كن هذا اليوم جاه الزخي من صاعد وحادر=وابتدت لرباع ترقل ياعساله بالنجاه
عينة السنبوك لي هو فالغبب طالع ونادر=لاوصل للبر جاله شعف فالغبه سباه
والخلل ماهو في السنبوك فالربان ظاهر=ماعرف يمشي سوا كل يوم يمشي باتجاه
والخبر هذا طرح نيران في جوف المسافر=يومه يحب الوطن مزروع عشقه في حشاه
من فعال البعد لا ياصحاب بي فالقلب نافر=قد عجز كمين دختر مافتاني في دواه
كنني عارف علاجي حيث حنّات الميازر=قوتها باروت لي تحميك من بطش الغزاه
والحيود السود فيها كم وياكم وعل كابر=لادخلك الجوع لحمه يارفيقي ماكماه
وان يبس ريقك تحصّل كم وياكم نبع سابر=ذوق له مثل الكرع ماشي مثيله فالمياه
والزمن هذا بليّه جار عاكمّين شاطر=حد يحطّه ارض والثاني يبزّه لا سماه
غصب ماهوبالرضاء فارقت.. هذا امر قاهر=والمفارق مبتلي الله يعينه عا بلاه
والعذيبي هكذا دايم وهو فالجو طاير=من شروق الشمس يصبح عايدوّر عاجناه
بنصبر مادام رب الكون بشّر كل صابر=من صبر لازم يحصّل ماصباء له وابتغاه
ختمها خايف يميل الحمل يوم الحمل جاير=والجمل لاجار حمله من على ظهره جفاه