للواقعي برسل رساله عاجله فيها قضّيه=ملفها شايك وصفحاته من الحجم الكبير
ومعقده ودروبها يالجودي صارت عكيّه=زي لعبة الشطرنج لعابينها ماهم كثير
اثنين بس دولي واقليمي ولكن البقيّه=جمهور ماله شغل لا ف العير ولّا ف النفير
ون قلت عنها سوق ياكثر البيع والمشترّيه=فنته بما قلته موفق لكن الفارق خطير
تجارة الاسواق مشروعه ولكن البليّه=تجارة الانسان بالانسان هو لي مايصير
يابو وليد انته لها تبقي كففها مستوّيه=ونته وسيع العرف يذكى الناس يافاهم بصير
عقود مرت وانقضت فيها الخلافه عائليّه=ومقدرات الشعب في يد الافندم والمشير
وذيولهم واتباعهم يتقاسموا قرص البغيّه=والشعب ماشي جاه من حقه سوى النذر اليسير
والمشكله ف اصحابها بميولهم والتابعيّه=كلن تبع عمه على نهجه وعاخطه يسير
في ساحة التغيير كّمن ذيب تتسمع عويّه=اصوات وشعارات مرفوعه من الجمع الغفير
لكن لي ضاري على ظلم البشر والعنجهيّه=ماطاع يفهم والسياسه بحرها واسع غزير
يجرون خلف المال والمنصب مصالح دنيويّه=والكارثه عا الكل حلّت عا الغني هو والفقير
حال البلد واقف تشوف الناس في حاله زريّه=مبروك ياشعب اليمن مبروك عا المركز لخير
دايم بذيل القايمه ترتيبنا يالباطليّه=الله ينصف لليمن فيكم وهي تبقى بخير
صادرتوا الثوره وزاودتوا بها يالبلطجيّه=حد عالجزيره مملي الشاشه وحد عبر الاثير
تصريح في تصريح كله كذب في روحه وجيّه=والكذب مابيدوم لنّه دايماُ حبله قصير