ضاقت عسيله
ضاقت عسيله بأهلها والكيل يالخائن طفح=لما متى واحنا نعّشم فيك يالوجه القبيح
بعد الزمل والمرزحه الى اليوم هرجك ماتضح=يالبرمكي قدها مقاله مايصح غير الصحيح
كًنا نصدقكم ونسمع في الغلط ونقول صح=ياما وياما ناس قد قالوا لنا القول المليح
لو فيك ذرّة خير شل حلّيك من الجربه سرح=الجرب مضّايق وطين الجرب من حلّيك يصيح
والطير لي يسرح ويضوي قل رزقه وأنفضح=لا حسب في الجربه ولا له في المدومه والذليح
لا شرقت البيضاء غيش يفرد بريشه والجنح=من سوم ألما سوم مثل المنتحر قلبيه جريح
وأن راح بايشكي يباء حقه دعوا له بالكسح=حطّوا عليك العين يالطير المنافس يالصريح
وأيش عادنا باقول لا شفت النيازك عالقرح=ترهب قلوب الناس في هجر الهجيره وتستبيح
دم لبرياء من غير لا حجه ولا طاري سمح=شلّه تشلك ياغريب اللون في عيّه وريح
والمشكله في الدار لا ساسه ولا ريمه صلح=البرمكي يرزح وجيرانه يشبعونه رزيح
ما غير شوها معّكفه بين السواري والتيّح=الذل فيها والمهانه فيك يالطير الذبيح
ياخيرها دوله عظيمه كلها لعبً ومرح=والمجلس الأعلى مدح فيها وكثّر في المديح
الأمن فيها والعداله والمسّره والفرح=ومن لحمها ورزازها يكفي تعبنا من قديح
طبخات دسمه وسطها البسباس والثوم أنطرح=حوجاتها الباروت والسم من معالقها يسيح
ولعاد باطوّل عليكم راس محفوظ أنتقح=تالي زمن نوكل ونشرب بالمداعه والصفيح