البنت:
يمه الى المدرسة بسرح وبضوي
العلم للبنت يرفع مستواها
ومن الحطب والقصب تعبت يكفي
والنفس تعبت ولا صادت مناها
واليوم شادوا مدارس لي ولختي
وخوي له مدرسه يسرح قداها
الأم:
العلم ما هو لكن يابنت قعدي
شوفي غنمنا ومأكلها وماها
وشلي الفاس للمحطاب حطبي
وتركي ذي السوالف مانباها
البنت:
يا والده للأسف ما كان قصدي
واسْرتي حبها روحي فداها
با انفع الناس يوم اكتب واقري
با انشر العلم باعلم قراها
باخرج اجيال تفعل مثل فعلي
في الطب والهندسة وخرى سواها
الأم:
يا بنت قومي وكل البيت جحشي
وبعد شوفي الغنم سرحي قفاها
وعودي سمح قبل الضيف يضوي
ومهرة الدار شي ماشي كماها
البنت:
اسألش بالله وش قصدش بعندي
الجهل كل عين يا يمه عماها
شوفي بنات العرب وبعد حكمي
بالعلم وصلن لغاية منتهاها
وانتي وزرب الغنم والدار بعدي
شي زوج كل جاهله بدري رماها
لو كان متعلمه والناس تدري
يصبح لها كنز بايبقى معاها
عساه من بعد ذا مقبول عذري
ياكم وكم جاهله ربي هداها
واصبحت عالمه للناس تفتي
ولا طبيبه وبا ينفع دواها
الأم :
في قولش الصدق هذا صدق قلتي
الجهل دمر امم عيني تراها
روحي الى المدرسه يا بنت درسي
وكملي الجامعه وان شي وراها
ماشي كما العلم يوم العلم يعلي
ويشيد اركان توصل لا سماها
الأم والبنت:
الحمد لله مولى الفضل ربي
وصل حنا لاقناعه لي نباها
يا طالب العلم قم للعلم بدري
شف كلمة العلم بايوصل صداها
شعر الأساتذة:
مبارك بوشندل
و
سعيد بلعيش