[حنطبه]

رقم 175.

ماشيء يجي بالسهل .

بعض كلمات تلامس الروح ,ولو الحقتها بعمل جاد وصادق تخرجها من صمتها , وهكذا قرأت هنا :

قال سالم البدوي بلحمر :

ماشي يجي بالسهل من غير العمل = ولكل شي اسلوب وافهم يافهيم
خمسه على الانسان لو فيها امتثل = واخلص في النيه للرب الحكيم
برحمته ورضاه بيحصل محل = ومستقر ابدي بجنات النعيم
هذا كلامي فيه ماقل ودل = والعلم عنده الواحد الفرد العليم

قال سعيد المشجري ابورائد:
يا الأدمي لازم قفل باب الكسل= وأسرح من البكره على باب الكريم
لاماقنصت الوعل بتخطم جمل= رزقك من الرحمن ممعك حد قسيم
ون طرب المحراب خل بقعاء وصل= فرضك في البكره وفي الليل الظليم
الذنب لوزنه كما وزن الجبل= برحمته مر (ع) الصراط المستقيم

قال عبدالله الحامدي :
ياسارح البكره على باب الوكل = عوذ من الشيطان وبليس الرجيم
والرزق عالرحمن كله والأمل = سبحانه المولى وهووحده رحيم
والقصد والمقصود بأمره إكتمل = لاحد يحاول يلقي الطارف غريم
إلا الذي هو مايحب طعن القبل = ماحسب ظني يقلب الملعب شريم

قال عمر العكبري :

خمسه ركان الدين مافيها بدل =يعمل بها من كان ياسالم حليم
ودونها تقصير يحسب ماحصل =وعقاب كل تقصير نيران الجحيم
الا بعفو الله هو عزه وجل = ودون عفوه كل شي عقابه وخيم
لو بالعمل وحده تجازي مايصل=كلماعملته ند نعمه من كريم
المال يرجع والعمل عندك دخل =يهرج ويتكلم وهو ماهو كليم
اما فرح وسرور قع وإلازعل =يحطم على لحمك وعظمانك حطيم
ولعاد شي مخرج ولاتلحق وشل =عند الملك كل سين يبغي منك جيم
يالله عسى مخرج لنا يوقع وحل= وعسى بعفوه العمل يطلع سليم

قال سالم البدوي بلحمر :
دنيا ريا ومجامله مهما حصل = الجيد بين الناس له في القدر قيم
والفسل ماله غير اسقاطه وذل =مثله خبيث النفس والشخص اللئيم
والحمد له بالجود اني في محل = بين الخوه ماحد في اللمه خصيم
نؤخذ ونعطي وان قصر عندي كمل = غيري يكمل مارفض غلطة غشيم

قال عبدالله الحامدي :
جاني الكلام الزين لي مثل العسل= طعمه ولونه يشفي القلب السقيم
من عند شاعر هام بكلام الجزل = شربه كرع من قدمة السيل الهميم
ذكرني البدوان حلان العجل = وأهلي وربعي بالقراقر والنظيم
كل من خرم يسقيه من صافي جفل = يوم القناصه جاب له قشعه وديم

قال عمر العكبري :
حيا بذي هرجه يجينا عاحلل =ولا يفرق في المواطن والمقيم
كلمته موزونه لها عنده ثقل =وعلى معاني واضحه هرجه يقيم
شاعر كلامه مايطفش او يمل =تقرأ وتستمتع مع الشعر العظيم
ومن المواعظ والحكم ماقد بخل =يشهد له الوادي وتشهد له تريم.