أبـــدي وأشهــــد لا إله إلا إلاهي لـــــي انفرد
باسم الألوهيه ولاحـــــــد رب غيــــر الله فريد
من وحيه القرآن ســــــــورة قل هو الله أحــــد
جلا جلالــــه قال عبدونا وأنا الرب الوحيـــــد
ربي غفــــر ذنبي وزلاتي ومامنــــــــي ورد
عبدك غفرلـــــه قبل عزرائيل يقبض عالوريد
وصلاه عالمختار مامثله على ذي الارض حد
تعداد مـــا طرحت سحـــاب المزن في بقعه و حيد
وآله وأصحابه ومن بالدين يحكم مرتشد
قهراه وينك يازمن يحكمه هارون الرشيد
وسلام عابيت العرس شميت له عودي وند
وبخور ريحه يجدب الزوار من ساحل ونيد
نعم المعرس بومبارك الأسد إبن الأسد
لو هي بيدي نصبه حاكم على أرضي وسيد
لجله غصون الورد تنبت حيث ما صبري قعد
ون ناظرت نجم الثرياء باترى صبري قعيد
إبحث ودور في بقاع الأرض ماضني تجد
إلا قليله مثل صبري والنعـــم ياخيــــــر جيد
وسلام عالوالد مبارك لي يشد العزم شد
وقت السلا سالي وهو في حلها الصلد الشديد
وسلام عاعــــــــــده تهز القاع وصداها يرد
ياباحبوكـــــــــــر قلها تمني وعطها ما تريد
نعـــــــم المقدم باحبوكـــر شهم وعليه العمد
عمي عوض في ساحة العده معه رتبة عميد
غن يالمغني موّج بوصوتك ولق جزه ومد
وادعي لنا ربك يمد مابيننا العمر المديد
غن بارك الله فيك شف هاجسي كيره مابرد
وحليلتي رسلت رسايل لي فصندوق البريد
دا فصل والثاني خبر عاجل وصل من بو حمد
لي جاء على التلفاز وفرقزلك عيونه ياحميد
شكله على الشاشه كما الطلاب من سفعه شرد
الخزي جالك ياعلي واصبحت من صنعاء شريد
ويقول بو حسان باب العز عاده مانقلد
مهما يحاول آل بالأحمر يقلدونه قليد
دوري الكرة يمشي وحارسنا على لكرين صد
ماعذرانه ومن معه ينزف من جروحه صديد
ضحكوا علينا جابوا المنقه وبسكت بو ولد
نحنا فرحنا قد حسبنا الفجر بايظهر وليد
ناولدت في يوم الشمالي بالجنوبي اتحد
وتفاخروبي أهل بيتي دون إخواني الوحيد
هم مادروبي إننا مولود ومعاي النكد
مدفون في صدري انكتبلي عيش في الدنياء نكيد
أرض السعيده كذب ماحد في السعيده استعد
كذاب من بيقول نا فأرض اليمن عايش سعيد
أم الخباثة حدت السكين عالمسكين حد
تقسي ولاترحم وفيها قلب من صلد الحديد
دي بنت مغرومه ومفيوعه ترشخ بالعقد
ون جيت بطردها زعق فوقي الملازم والعقيد
ماباستسلم باوقف في حلقها حاجز وسد
من شان ماتشرب على نفطي وذالراي السديد
لابد نوقف ضدها ونحط يداً فوق يد
قدها مقاله ماتصفق وحدها ياناس ايد
بنت الحضارة حضرموت الخير جلدوها الجلد
خلو الجميلة ترتجف وكأنها وسط الجليد
من دون أية ذنب هزوا جدعها يبغوا النقد
نهبوا وسرقوا خيرها والحضرمي مقيّد بقيد
النفط في ضبّه بقربي وين لاكنه ابتعد
يتقاسمونه بينهم والحضرمي غافل بعيد
جابولنا بترول ايراني وعاده مااتجد
خلونا اطوابوير فرضوا الذل للشعب المجيد
والحضرمي ياناس غير الله عاده ماعبد
ماباتوطي روسنا مادامنا مانا عبيد
يالحضرمي كم لك تجارب ليت منها تستفد
مكتوب عابوك الشقاء والغير منك مستفيد
قل دان شفنا ودعت نومي وطرفي مارقد
من قد همر همرات قومة كيف يهنى بالرقيد
قنعان في الوحدة ولي موطن ولاكنه افتقد
بفديه روحي لجل يرجع باصبح بعده فقيد
لا لا تقولوا بانني سالي معي هاجس نشد
من قهر نا غني واسكب دمع في وسط النشيد
ياحضرموت الفاتنه ظلموش والهاجس قصد
تبكين يا أمي ونا تبكي حروفي والقصيد
والليل قم ياخليل ناجبت الحطب وانته وقد
باندهر الغودة وبانسمر على ضوء الوقيد
وإن شاء الله تكون قد نالت إعجابكم