قال شاعر بني مره وانا نسل مره=لي حدودي ولي حجه سندها براهين
كل حاسد وكل حاقد عسى طول عمره=يندفن في لهب من قبل ندفنه في الطين
كل واحد وبانعطيه في الناس قدره=والعقول الكبيره فعلها بالميازين
من كبار العرب ماحسبت وهمرت همره=كيف لاعاد رخله... باذبحها بسكين
كن معي دوب متواضع ولتشل كبره=من يشوفك يضنك باتحرر فلسطين
لنت طيّب فنا اطيب يجي بالف مره=لنت شيطان شفني من كبار الشياطين
من مجانين نوخذ كنت حكمه وعبره=لكن اليوم يامكثر خراط المجانين
كل ماتجيه من علوى يردك لحدرى=شخص حاقد وحقده مثل حقد البعارين
هاجسي خلنا في العشق نكتب ونقراء=لاتثوّر وسط جوفي لواهب براكين
والشجر دايمأ لي غصنها فيه ثمره=يرجموها ويرجون العطيه مساكين
اسمعوا قول من شاعر تفرّد بشعره=قد قروله وسمعوا له قصائد ملايين
مايطارد ورى الشهره وقد حاز شهره=ماطلع قمة الابداع باليسر واللين
ماطلع غير في عقبه عسيره ووعره=صم عظمه ودحّق فوق رؤس الثعابين
والسقيفه وسط قلبي تظل مستقره=ماتزعزع ولو ثارت حمم من براكين
او تهاوت على راسي نجوم المجره=فوق صفحاتها اسمي مأمنه تامين
حضرمي من كبار الروس واهرج بنبره=ماتغير مع الاخدام ولا السلاطين
ماتربيت الا وسط وديان خضراء=ماتربيت في حله وحارة تكارين
جنبي اجواد كل واحد نعده بعشره=لاتعصر يعزه مسبته فيه ستين
واعرف الناس واعرف من ترنم بذكره=ساعة الموجبه لاثار زلزال بكين
يد مش سارقه ماتحسب القطع واخرى=سارقه في قلق والقطع ذلحين ذلحين
رد ملعبك لاماشي معك سيف كسرى=ذا كلامي ولاهو دوب لقّنك تلقين
واعذرك لو حفيت الجلد ياشوك سمره= ايش بيرجعك مثل الزهور الرياحين..!
هاجسي خلنا في العشق نكتب ونقراء=منطقك طوّره دايم وحسنه تحسين
(ساري الليل) بانسري انا وانت مره=انت قابل محبينك وانا لي محبين
كان عاد الزمن والظرف يسمح بنظره=بايشل التعب من قلب تعبان مسكين
اللقاء نفع واما الهجر منه مضره=مثل للعتم جف تذبل ورود البساتين
لاتفارق حبيبك واعط صاحبك جبره=لاتضره لان الضر مكروه في الدين
من زمن قال بو محضار للناس عبره=كسروا في الخزف مايصلح الكسر في الصين
من قصر قل.. والبالغ ثلاثين شهره=قالوا اهل الوفاء وافي و(شهرك ثلاثين)