[علي فدعق الهاشمي]

يامرحبا ببيات شاعر ماخطاء=ماسردها من فضاء
جاب الحقيقه بعد مانزاح الغطاء=نسنس بصوت الدان
(ياحضرموت اتذرعي =بالصبر والايمان)
*************************
أربع ليالي والمواقع في وطاء=وغيث وادينا لطاء
وسحاب ربي ماتزحزح واعتطاء=وقشعرت لبدان
(ياحضرموت اتذرعي= بالصبر والايمان)
*************************
هذه السنه ماهي كما ذيك السنين =بحلف يمين
وان ردت الشاره عسى ربك يعين =بزرق وذهبان
(ياحضرموت اتذرعي =بالصبر والايمان)
*************************
هل عاد شي رحمه من المولى تعين=هذا اليقين
تتراحموا مابينكم يالمسلمين =وتتناولوا القران
(ياحضرموت اتذرعي= بالصبر والايمان)
*************************
وان كانها الأ تريقه دفعوا الثمن =طول الزمن
قولوا لي المرجع لمن =للواحد الديان
(ياحضرموت اتذرعي =بالصبر والايمان)
**************************
هذا الجزاء ياناس من جنس العمل =نعم المثل
سيروا سواء لاكنكم خلوا الحيل =والزور والبهتان
(ياحضرموت اتذرعي= بالصبر والايمان)
**************************
السيل ماهو سيل لي جاما وبس =من عالدكس
جانا الغضب كله ونس =ياغارة الرحمن
(ياحضرموت اتذرعي =بالصبر والايمان)
*************************
هذي اشاره والاشاره للحليم =وانت الفهيم
الثانيه باتعقب الليل الظليم =في شهر شعبان
(ياحضرموت اتذرعي= بالصبر والايمان)
**************************
من بايفرق بين ضحوه والمساء=قل للنساء
بعد الشرف والزهد يرمين الكساء=والحسم عريان
(ياحضرموت تذرعي= بالصبر والايمان)
************************
وين الذي يحنق ويخشى عالشرف =كله ترف
كل من قبض بالعود والقصبه درف =كلين ولهان
(ياحضرموت تذرعي =بالصبر والايمان)
************************
لولاء الحياء باقول ياناس اسكتوا=وبالرواقه تفقدوا
صلوا بنيه صادقه وأستغفروا=وعدلوا الميزان
(ياحضرموت تذرعي= بالصبر والايمان)
************************
الشر يعم عالناس مره كلهم =صغارهم وكبارهم
بالمرتبه لولاء يشل أسيادهم =وكبار لعيان
(ياحضرموت تذرعي =بالصبر والايمان)
************************
هذه قضيه والقضيه مانتهت =خذها وتبت
السطور السود شفها تورخت =عاطول لزمان
(ياحضرموت تذرعي =بالصبر والايمان)
*************************
طاقت بنا الوديان من كل الجهات =سيولهن متعاكسات
علوى وحدرى كلهن متحاكيات =بهمسات الاذان
(ياحضرموت تذرعي =بالصبر والايمان)
*************************
من روس دوعن بالسيوف الصارمات =وبالرماح مصوبات
هجمت على الاحقاف هجوم الفالات =وتهدم البنيان
(ياحضرموت تذرعي =بالصبر والايمان)
************************
وجاتها امدادات من وادي عدم=راس العلم
وماسيب وادي بن علي والعين ثم=سيلين عميان
(ياحضرموت تذرعي= بالصبر والايمان)
************************
شل المدن شل الموازع والنخيل=يصهل صهيل
ماهو بسبره لي تعدى عالسحيل=وحجول قحطان
(ياحضرموت تذرعي =بالصبر والايمان)
************************
سلمت الصفراء شبام العاليه=عنايه شافيه
الحمد لك والشكر ماهي واطيه=واوقاف ليتام
(ياحضرموت تذرعي =بالصبر والايمان)
************************
مالقهر والضيم الذي هو في القطون=خليت بطون
وتريم والمهره تباكتها عيون=الانس والجان
(ياحضرموت تذرعي =بالصبر والايمان)
*************************
وارض المكلا ماتعداها الخطر=وبندر عمر
وفوه مع البقرين والخور انكسر=ياخور صيفان
(ياحضرموت تذرعي =بالصبر والايمان)
***********************
عسى المعونات التي وصلت تعم=خيرات جم
تصل الى قاصي وداني بعد ماتبرى الذمم=مونه وسيمان
(ياحضرموت تذرعي= بالصبر والايمان)
***********************
وان كانه الا شغل بلويبك قنع=هيا ومع
باتنقهر لنفُس وبيزيد الوجع=وهدره وخرطان
(ياحضرموت تذرعي =بالصبر والايمان)
***********************
لكننا باقول ماشي يختفي=ابدا ولا باينتسي
القافله تسحب وطيارة علي=تغرف بلطنان
(ياحضرموت تذرعي= بالصبر والايمان)
**********************
القصد هذا ماجرى يالحاضرين=نعيش وحنا سالمين
وربنا يصلح لنا دنيا ودين=بالعفو والغفران
(ياحضرموت تذرعي= بالصبر والايمان)
***********************
والختم باصلي على الحق المبين=طه الأمين
تعداد ما في الكون من عنباء وتين=في كل بستان
(ياحضرموت تذرعي =بالصبر والايمان)
***********************

تم التنسيق بعد نصف ساعة محاوله أشكرك على القصيدة الرااائعة والرد الجزل على شاعرنا الموقر /غريب الدار (باذيب) الذي يدل على شاعريتك الفذه ولانقول الاكما قلتما في التخميسة لهذه القصيده (ياحضرموت تذرعي =بالصبر والايمان) كان الله في عون الجميع