[اسير القوافي]

شيذر الابداع=
هاجس معي لو قال مهما قال = واللي على خاطري قاله
اقسم بمن لي حقق الآمال = ما بعطي المحضار ما - له
لو ينسكب حبري كما الشلال = وإلا القلم ضمّه و شاله
ان قلت فالميدان هو خيال = وان قلت هو واسع خياله
وان قلت غيره للحموله شال = شله وشل حمله بشاله
وان قلت بانضرب بحد الأمثال = ما بانحصل حد مثاله
فالمرجلة لأعلى المراتب نال= نال الذي ما شخص ناله
رجال مثله ما خلق رجال = في وقت تتناقص رجاله
هو معجزة عصره وهو لازال= يروي ظمأ الظامي زلاله
هو شيذر الإبداع والدسمال = وأفضل هدف سامي سماء له
زلزل صروح القافية زلزال =والشك في لحظات زاله
الشعر قبله عن طريقة مال = حتى صبح هو رأس ماله
حرره من الأصفاد والأغلال = قبل أن يحل وعد اغتياله
شاعر تعدى شاعر الأطلال = في قصر شعره والإطالة
لولاه ماغنا لنا مرسال = طيبة وقم شل الرسالة
له فالحقيقة عالجميع أفضال = حتى الذي قال الفضاء له
لولاه ما طال الذي له طال =والمجد ما ناله وطاله
اسمه يجلوه الجميع إجلال= من فضل ربي ذو الجلالة
لي من بموته مات عال العال = وأصبح علينا العيف عاله
اشكي لمن همي وما فالحال = و ارث الوطن يرثى لحاله
فيه التعازي ع العرب تنهال= من بعد ما غيّب هلاله
والحزن لما اليوم عاده حال = يالله عسى الجنة حلاله
من له خوه فالشحر جم واعيال= وإحنا في الواقع عياله
وأهل القويرة عمها والخال = فيها نحب عمه وخاله