قصيده موجهه للشاعر للواقعي
برسل معا الزاجل رسالة شكر وتحيه تصل = للواقعي ذي برق عدله لاح عا اهل الجنوب
حقه وله والسر يسري في مقاطين العول = ذي صيتهم فوق البسيطه شاع عن كل الشعوب
ودي طلع بك فوق سطح البدر وتجاور زحل = وطرحك وبني لك على سطحه منيعات الغلوب
ياالواقعي قدها ونا خلفك وظهرك لاجبل = والكلب ينبح والقوافل ماشيه فوق الدروب
والصدق صدقه جاريه والصبر مضروب المثل = سنة محمد تدحر الشيطان وتصد العيوب
كل مازرعته ماخفاه الطين يحصد من بقل = لو نحسب الغربان مازرعنا الحميمه في الجروب
والنوب لا من نوب يخرج ( والكاعه من فشل ) = والموت ماهو من وجع والغيث ماهو من طهوب
بين الرجاء والمرتجى نا وياك نتقطع وصل = بطن المسيبح خاف مانلحق من الشاه العصوب
ماني مطول جيتها لا طيف وسقي لي جبل = دور على القرضه لحقته بعضهم يرشن بشوب
يتبادلون المدح حرفتهم وقيرهم عسل = كتابهم مرقوم ظهر الغيب من كثر الذنوب
جواب الواقعي
قولك يصم الراس مثل الهيل لي خلطه جفل=يسعا له اهل الكيف وامن اجله يخوضون الحروب
حمامك الزاجل بتاج الفخر عا كتفي نزل=والصدق له ومضات نلقطها برادار القلوب
لكنني للغز يا صاحبي ما حصّلت حل=فكّرت ثم فكّرت من صبحي الى وقت الغروب
دامك معي .. حصني قوي .. والساس ما صابه خلل=مثل الجبل صامد ولا هز الجبل عصف الهبوب
ما يدخل الميدان في جنب البطل غير البطل=في حلّها ما يهمرون الموت واصناف الخطوب
واللي يقبل كف ثم يدعي عليها بالشلل=حاسد ونار الحقد رشنت وسط جوفه في صلوب
كل وقت له ناسه ولاهل الوقت ياصحابي دول=عاد الأمل بالله والعاصي مصيره با يتوب
بعض العرب في داخل الغبّه يقصون الدقل=والبحر له ربان يعرف وقت موجه والسيوب
والسوق ماهو سوق لا غابو عن السوق الدلل=هم ينخلون الذري لا قد كثرت اصناف الحبوب
والختم يا ستار جنبنا المزالق والزلل=وارزقني التثبيت يوم الحشر لا ماشي هروب
[/QUOTE]
هذه القصيده للوالد حسن محمد باقديم
ياريت لي سلطنه ونفوذ مثل الدول =باحط قمر عاسماء بندر عمر والجبل
ذي ينقل الصوت والصوره لنا في عجل =من بافويلخ وعبدالله علي باالجدل
قومي وسعفتي غابوا واوحلوني وحل =غيبت ذييب عاكشيشه قطبوها وصل
وان كل غائب معه حجته قال المثل =حجة صحابي ضعيفه كل باب انقفل
ذي واعدوني وخلفوا زعلوا بي زعل =ياريت واحد على وعده ظهر واستقل
واعطى وخذ كان ماجاه العتب والفشل =حسبوا المواعيد سهله يارجال القبل
والوعد ذمه وسلفه عاالرقاب الثقل =سلك التلف والعذار البارده والحيل
خلت حسن في رصيف الشرج في معتقل =ذي قيدوني بموعدهم لقوا لي جدل
ذي مر بجنبي وانا عاالوعد في معتقل =ماهو على الرجل شفته مار في بو عجل
لاسئلت قالوا تبادالك وناظرك زل =كلن بهرجي تلكع يحسبوني خبل
ولا هبل مافرز العنبر وعود القفل =ياباطل البطل من هذه القصص والحيل
والناس اجناس كلن له طبيعه ودل =حد كحل للعين والثاني مثيل البصل
قولوا لهم خاطري ميدان من ذي حصل =قلبي كما الشاش والخاطر عليه العسل
كل ماوصلني زفاه الريح روس العقل =حب التسامح ولبس المؤمنين الوكل
من نعمة الصبر يااالضامي بحفنك نهل =والعفو والمعذره عند الخطاء والزلل
من فضلكم واشلوني عاالتسامح وشل =لاتشاغبوني وانا مشغول بااكل السقل
واحمده واشكره منه ماقطعت الامل =لارخاء بيدي ولاشده تجيب الزعل
يااهل نهلول والخطمان هي والسيل =عادتنا من وراء شيباننا لم تزل
تسرح وتضوي معي يامردفين القبل =عاالورث ماقول فاسي من هراوه نصل
سالف وعاده على القانص لبدوا الجبل =كل من سمع قرحة البندق من الطست كل
ونحب اشعاركم ان هذا الحظه تهطل امطار غزيره عامدينة المكلا رحمة خير وصلاح