بسم الله الرحمن الرحيم
هذه القصيده قديمه للوالد حسن محمد باقديم
مهداه للشيخ احمد سالم بلحامض النهدي
بعنوان ( كلن بغا حصته في نفط المئه وعشرين بئر )
ابديت بك وأدعوك يامعبود ياالفرد الصمد=ياقاضي الحاجات ياعالم بماهو في الضمير
ياحي ياقيوم يامولى العطايا المدد =تعلم ظواهرها وبالاسرار والباطن خبير
يامستجيب العبد ذي لاقد رفع يده ومد = يبلغ مقاصيده ونال الفوز والخير الكثير
ماقصده الا العافيه وخلافها مابه قهد = ماجاء على فاقته يستاكل ذره والاشعير
الحمد لك والشكر عد ماالبرق والراعد رعد =وعداد ماصب المطر والقطر من منشي غزير
يقول شاعر مامعي للقول شي غنوه وسد = قل الهويه مثل قرص الدخن في بيت الفقير
مامعي طرب من ذي يذبحون المواهب في المهد=هذا يحرف في الادب والورث واضراره كثير
والعز غالي من يروم العز يمسي في نكد =بعصب على بطني وللدنيا تجي والاتسير
يتعذب السالي على دنياه والباب انقلد =والوجه ذي يعرق يحس باللوم ويعيف السرير
نومي مقطب من هموم الوقت طرفي مارقد = كلن غفت عينه ونا بيت على فرشي سهير
شوق الخوه والاصدقاء يمسي يقهد بي قهد =برسل تحياتي واشواقي لهم عبر الاثير
ينذاه عاكرزم نسيم الصبح من راس الرتد =ينفح على الوادي وحلانه كما عود الكسير
والان ياعازم الى وادي الحبض والعزم جد=باعطيك مكتوبي وعجل باالتوجه والمسير
صل عند بوعبد المجيد الشيخ بلحامض حمد=سلمه مكتوبي وبلغه التحيات الكثير
شيخ ال بلحامض شديد الباس مفتاح السدد=شيخ العكيه من تعكاء جاه في الظرف العسير
للظلم يغدي مثل صاعق صيف في طاهب سود =وله مواقف كل صالح يجلب الخير الوفير
له عين تنبع بالمنافع من ضمي ليها ورد=وحنا شهدنا له ويافع شاهدة وبني كثير
وكرب وصيعر والشنافر وال بن عبد الصمد =ومراد والظني ومره سدرت البحث النوير
من يجهل الواقع ولن يعرف وعن الاسباب ند=ثعلب وجده كان ثعلب مختفي راس الحجير
وكل حبه لبها فيها منافعها تجد = وهبات ربك في عبيده حكمت الفرد القدير
رحمات عاالوالد وفضل الله وخير عاالولد = والخير والبركه تعم الشاب والطفل الصغير
سلام عاالحمضان عد ماالموج في جزره ومد=وعداد ماشمرت مراكب باطن البحر الغزير
ياقلعة القفل المعوج في المصاعب والشدد=والتبر في معدنه والسيف المهتر في الجفير
واهدي تحياتي لمن عني تخبر او نشد=رمز الرجال اشروعها مالي وللشرع القصير
وان حد تخبر عاالوطن قله مساهن شمس غد = يحلم بمستقبل وقد جاه المخبر والبشير
ياحضرموت العز والناموس من ابا وجد=والشعب ذي دافع عن الوحده وتقرير المصير
مايفترق مولى الحبض والكار وفروع المقد=من ساكن المشقاص والظبه وغيل الباوزير
وذي سكن سيئون والغناء وريدت بن كند= والعبر مع دوعن ومولى الشحر مره مع شحير
من يوم شافوا الخير في الوحدة واصلاح الجسد=ولاقطعنا عضو مانقدر على الاخر نسير
ياواليين الامر وزمام العداله في البلد= اعطوا المشوره لهلها والراي للعقل البصير
لاتستشيروا كل من ينظر بنظرات الحسد = ذي له مطامع تدعم التمزيق في الثوب الحرير
ذي مارفع صوته على باطل وعارض وانتقد = قضى سنينه في مناصبها وهو خادم اجير
معبوده الدينار كل من مد له مبلغ سجد= ولقاه صاحبه الذي ماله في الدنيا نظير
لاتمنحوا الفرصه لمن في الهدم يسعى والهدد=مادام فيها شعبها هوخير من بايستشير
والحرص واجب في المسائل والتأكد والاكد=من كل عاقل قبل مايقدم على الامر الخطير
تفقدوا حال المواطن ضاع عمره في كبد =كل ماطلع حاكم على راسه لقاء زبره وكير
والبار عاالربان يصلح ذي عليه المعتمد= ماهو عوايدنا نضلي دوب في الصف الاخير
لا يعترض لامواج في بحر المئه قامه ومد=مادام عاده يجهل احكام السباحه والمهير
ماشي بقي له عذر ومعه فوق ثلثين العدد=يثبت لمن رشحه لا هو باالثقه فعلا جدير
والقول يسبقه العمل والزرع من يزرع حصد =ويظهر البرهان ماهو باالدعايه والصفير
يحيي قوانيين العداله من يشل قسم الاسد=كلن بغا حصته في نفط المئه وعشرين بئر
يصدق على وعده وطبع الحر يوفي لا وعد=من اجل نتقدم وننسى ماضي الامس المرير
لبنه على لبنه وقام البيت كله والفند= لا قد النوايا طيبه عند المحافظ والوزير
هذا الذي قلته وجادت به قريحة بو حمد= من عند شاعر عنده الكلمات والمعنى كوير
واختم وصلي ماقرح بلجيك باامات الزرد= على شفيع الخلق لي يشفع في اليوم العسير
قصيده لحسن محمد سالم باقديم \ مهداه الى ( ملك اليمن ) موؤسس الديوان الملكي لشعراء الشعر الشعبي
سبحان لي يسمع دبيب النمل عا ظهر الحجر= ومسخر ارزاق الخلائق والطيور الطائرين
ماطير من عشه فرد ريشه وجنحانه وفر = الأ ورزقه ماانقطع من عند رب العالمين
الحمد له والشكر عالحاضر وعا كل ماعبر = حمدآ جزيلا يسعد الانسان في دنيا ودين
ثم صلاة الله وسلم عالنبي خير البشر = ياسعد من صلى على طه امام المرسلين
لي في الكرامه حن أليه الجذع وانشق القمر = واثني على آله وصحبه خلفاه الراشدين
الصدق لي في حومة الميدان مايوم اندحر = وقرونهم خير القرون وسنينهم خير السنين
يقول شاعر من صميم الرأس سرحت الفكر = مهداه لا ملك اليمن مني وربعه والبنين
شيخ الكرم والجود والحصن الذي ساسه حجر = يامكرم الضيفان يامغلاك ياالحصن الزبين
ياحصن كل من كن رأسه فيك ماداهمه شر = صبحت جماله في المراعي سالمات أمنعمين
ياحصن فيك المخيره قد شاع صيتك والخبر = وسطع مثيل الشمس ذي هي شارقه عا النا يفين
شرق وغرب من جبل رد فان لا وادي عمر = وعلى المطارح كلها من حيس لمان العنين
وهبات ربك في عبيده والنعم مالها قدر = يوهب ووهبا ته ذهب وألماس رب العالمين
على ثرى بشرون لاغبت نفانيف المطر = يابلكرم رحمتك عاالاحياء وذيهم ميتين
سلام مني عاالملك ماالبحر بمواجه زغر = وعد الكواكب ذي تلالي والنجوم الزاهرين
وسلام عاديوان نال اعجاب واجد واشتهر = له في اليمن شهره وفي الخارج كثير امشاهدين
للشعر والديوان ذي نال الرضاء عند البشر = ارفع رسالة شكر للشعار مره اجمعين
والي الملك ذي اسس الديوان باالخير انذكر = مشكور مني باالنيابه من جميع المعجبين
الله يزيدك فخر يالحصن الكريم المشتهر = وحنا شهدنا لك بذلك والخلائق شاهدين
سهرت وتعبت القلم وهو تعبني للسحر = على حديث المصطفى ووصاة جبريل الأمين
جاري كما داري وشرعي في المجوره ماقصر = والقلب مثل الشاش ملبوس العباد الصالحين
صالح فرج جاري ومن جاوره بينال الظفر = من جاور الجاويد حاز الفايدة دنيا ودين
ولا معي غير الدعاء لك يامطول في السفر = يكفي من الغربه كفاء لما متى متغربين
زين العمل منه الحصاد الزين في بحرا وبر = وانت حصادك زين ومكارمك ملت كل صين
عيني على بنك الضماير لا على بنك الدرر = والعقل والحكمه في البلوى كما التاج الثمين
مولى المروه تاجر التجار والعيف افتقر = فقر المروه ينزع البركات واللقمه تخين
وراء الطيور الفاره كل ماقبضنا طير فر = والكدم والرمحه في المسكين في الوقت المحين
لو باشكي لك ما بحالي عندي الصفوا اعتكر = والصبر اولى والشدايد بعدها رحمه ولين
هو لا عسى رحمه تصون الركب من فعل الضرر = رحمه تصون الحال وتصون المحل والساكنين
فيها صلاح المال والموال وصلاح الثمر = والخير فيها والرفاهيه في الحصن الحصين
وخلاف هذا كم عبر عا الراس في الدنيا ومر = عند التجارب واهلها تنسى طبيبك والبرين
واحوال دنيا منها قد حت راسي والشعر = معاد شي فيها يسر ذي يفرح القلب الحزين
ظهرت فتن وحروب نكره خلت العالم طير = والخو بعد من خوه من كثر الجفاء متباعدين
واستفحل الشيطان بين الناس ولحق له مقر = واصبح يحن في روؤسهم واذانهم ملقي حنين
وتكالبت الاخطار عا الامه وداهمها الخطر = والفرق واضح في زمنا من زمان الاولين
الى الخيام العاليه بارد طرفي والنظر = هذا هو الواقع وهذا الصح قل للعارفين
ياعين فوقش عين نامي لا يدمرش السهر = والخير ياتي والفرج في قبضت الحبل المتين
والعفو ياقارىء اذا شي نقص في قولي بدر = سامحكم مطلوب وحنا لا خوه متسامحين
والختم صلوا عا النبي تعداد ماهشت مطر = وعدد رعود الخرف لي هي في السحب تلقي حنين
[/QUOTE]
قصيده لحسن باقديم مهداه للشاعر علي بن ماضي
ذكرتني باالوجر ومعاقـل دحاميـل الرجـال=مهد المحاسن في صميم القلب ذكره مايـزال
واعرفه حـق المعرفـه كامـل ولله الكمـال=وان حد بغا رايي وكلمة حق مافيهـا جـدال
فاان القرى مثل النجوم وهو قمر شارق هلال=فلوا دحقه المصطفى وانعم بشمسه والضـلال
بايوصي العربان لا شعبـه يشـدون الرحـال=وباتكون الهجره الاولى الـى حيـث الرجـال
اهل الكرم والجود حلوا واستقروا في الحـلال=ياوجر بن ماضي حويت الصيت مابك شي بدال
لو حد عطاء ساكنك فارس والهرم هو والقنال=ماشافها شوفه الى صبـح حيـودك والرمـال
يسقيك ربي من طهوب الغيث لا صب السبـال=تصبح مساييلك خضيره حيث هدرات الجمـال
حتى مراعييك يحـن الوعـل ليهـا والغـزال=والمغترب ذي مايحصل له نسم وبـرود حـال
وهذا الجواب للشاعر الكبير علي بن ماضي
يامرحبا با اقوال من شاعر لنا مضرب مثال =شاعر وله دستور متفرد وله اسلوب عال
لاقد حضر وسط العضيده صال في بوها وجال = مايحتجي عنده بحوره يقلب المالح زلال
تركه ورثها واعتنى فيها من الناس الدوال = حافظ على لهجتة وكلامه بميزان القفال
لو قال شي تعجب بقوله لو تكلم فالخيال = ونها الحقيقه جابها نسم بها ع كل حال
سميت في وديان عندي ياحسن هي راس مال =هي راس مالي صدق لاحنت قروحش يالطوال
هذه حقيقه شف ثراها مسك عندي عال عال = مانغبط الا كل من فيها تنعم بالحلال
كن الزمن قاسي علينا ما عطانا اي مجال = والوقت يتقلب واصبح حالنا ياخس حال
وين الفرح والارض مغصوبه بجيش الاحتلال = ماشي لن في الفخر دام السيطرة لاهل الشمال
لاتقولي وحدة ترى الوحده ندفنت في الرمال =باعو اسسها والمواثيق الغليضه بالريال
وقسمو الغله عيال ابليس مابين العيال =وش تنتظر من لي تربو عالفتن والاحتيال
ماليوم وقت الجد يا باقديم صييح في الرجال =نبغى القبايل سيب تندر لاميادين القتال
يتوحد الشعب الجنوبي تحت رايات النظال =من اجل يرجع حق مانقبل بغيره اي بدال
ذه رغبتي اعلنتها واقبل باسوى احتمال = ياننتصر يانموت ونخلف لنا كلمة تقال