ومن ما راق لي وحبيت ان ابرزه للعرض في متحفنا الجميل هذه اللوحه الجميله للشاعر الكبير (عمر الذيب) وهي من اقدم لوحاته الجميله .
QUOTE=عمر الذيب;156447]
الى جميع الاخوان والاصدقاء افراد وقبائل وعوائل ومناطق
والى ابناء حضرموت جميعا السلام عليكم ورحمة الله وبركاته
اولا هذه القصيده كتبت عام 1987
اي قبل ان تكون هناك الخبره الكامله لا با لمناطق
ولا في الشعر لذلك ارجو المعذره من اي قبيله او منطقه او جماعه او فرد
لم اتي على ذكرهم فان احترم جميع سكان حضرموت الغاليه واقدرهم
فهم تاج راسي الذي افتخر به واذا نسيت احد فهوا سهوا وليس نقص من احد اواي
منطقه العفو مطلوبي ثم العفو ثم العفو اخوكم عمر الذيب
ياهاجسي بوصيك في رحلة سفر= رحله مسافتها تقدر بالف ميل
وان قلت لي اكثر نعم يمكن كثر =واللوم ماشي لوم لانقصة قليل
ودع رياض المجد بالبكره وطر =واركب تراي ستار من اخر مديل
ساعه ونص فوق السحب في الجو فر=واهبط بنا جده غبش قيم المقيل
لاوصلتها توك سرع لاتنتظر =توك الى الموقف وسط حي السبيل
واطلع الى مكه بنيه واعتمر =واركع وصل في البيت لي ماله مثيل
عود الى جده تبضع واستقر=يومين والثالث وقل حان الرحيل
واذهب لبا كلكا لقا مكتب سفر=واحجز في اليمداء اذا عفشك ثقيل
سرمن عروس البحر الاحمر واختصر=واركب في اليمداء وخل قالوا وقيل
واهبط في الريان بكره وانتظر=فتش قفاشيشك ولا خلصت شيل
واخرج من الصاله معد باتنتكر =واطلع الى البندر مع عابر سبيل
لا قابلك صاحب معد بايعتذر = بايوصلك لاداخل الديس الجميل
والشرج روح له عشيه منتشر = با تشوف لي ماشفت في الزام الدويل
با تشوف اسواقه خليه تعتكر=البن فيها والعسل والزنجبيل
والصبح شل نفسك وخل رحلتك بر=ساعه في الموتر وساعه عا الرجيل
بين المدن في بويش والريان مر=سلم على الجاويد ياكم من اصيل
والبسط في لدواس مابين القور=ومفرق احويره يجي بعده بقليل
وحسور من بعده تقشب بالشعر=تبغا لها سواق متعقل مهيل
قف في العقوبيه وبرد لايحر = مؤترك وتوكل وقل الله وكيل
وانكس لوادي العين واسرع واعتصر=با تشوف كمن حصن قدامه قبيل
وانشد على المعمور ويا بن بكر=لي صيتهم يرقل في الوادي رقيل
من قبل حوره جسر من فوقه تمر=هو نقطة العنوان الاول والدليل
ومسيال دوعن لي يجي سيله عسر=لاشرقي البن بشر له لازم تميل
سلم على متمت ومن عنده اشتر=حلوى نقيه مادخلها رانجيل
با تشوف عا اليمنى السفوله وافتخر=بالشيخ بو ياسر ونايف له شبيل
وبجنبهم عندل ولحروم النور=لي نورهم يشعل على اليمنى شعيل
والبدع وعنيبات لازم تنذكر=عامدخل احريضه سكن كمن نبيل
وادخل بي احريضه وواصل واستمر=واحذر من التغريز في الرمل الهليل
قصع في الحدبه ببو اربع كفر=بين المثور والرويضات القبيل
وال تبرعه والقرن بامد النظر =وبادخل وادي خضر كله نخيل
واصل في الحدبه ورض لاتصطقر=لازاهر الباقيس عا خط السبيل
والرحم من بعده بكل طيب اشتهر=مابينهم ما شي مسافه للدليل
وادخل بنا لفحون عا الزحمه صبر=لاجيت في الوقفه وهي ترقل رقيل
با تقابل السيله مع القرن الزور=والجدفره من بعدهم بثنين ميل
واقصع الى سريواه بازور النمر=بو مرعي الصمصوم لي يصهل صهيل
سلم على خنفر الى شفته ظهر=وعلى عنق تعداد ماسيله يسيل
با يقابلك منخوب عا اليمنى وشر=للرحب وحروبه وشضيه مش قليل
واعبر بنا تحت النعيري ياعمر=واسرع شوي من قبل لي ضايقك ليل
با يجيك حصن الشكل مبني بالحجر=ربا عمر صالح ومن مثله قليل
واعبر حبب فرحان مثل المنتصر= وادخل بنا لاعمد في الفاي الظليل
في دار بو احمد تعصر وانتشر=وانشد على عادل ولد ماله مثيل
واهله واخوانه وهادي يعتبر=مثل الصبي في العين لي مابه بديل
واصعد لجول اكريث واعقد مؤتمر=وابرز مع هاجسك لي يزقل زقيل
وانظر الى عجزر بنظره واختصر=واقصع الى دار الضريبي عا الرجيل
واصعد ولا جيت الدبه مد النظر=بي قابلك جاحز كما شمراخ خيل
وعبر قبل حبره وسلم وافتكر=حبره بلد بلقار مافيها دخيل
وطمحان عا اليمنى بلد كمن زور= والوجر قدامه كما حيد الجزيل
سلام عا طمحان والوجر العسر=والمعمله من حيث وطن بن عقيل
وقصع لبامهشم على اليمنى ندر=والسمح جنبه والمبارك في الدليل
ودخل الى سده وسلم وعتصر=ونشد على صالح وقله مستحيل
ماتنتسي عا البال ياوعل النتر=وعبر بنا عا الحصن لي ماله مثيل
وصعد على خطك مع الوادي وسر=بتشوف بامحفوظ في القرن الدويل
قله مساك الخير ياشبل النمر=تعداد مايهمل من اسحابه هميل
بلغه بامشموس هم والباعمر=يومهم علي مالو من السكه قليل
والشرجه اللي قد لها صيت وخبر=هي والشراقي مثل ينبع والجبيل
وطلع بي الكادر ولا نزلناه قر= بنزل من المؤتر وبدحق عا الرجيل
بدحق على الرجلين في شعبة عمر=عا المقيف المشهور وسوام الحجيل
امن ومستامن وريض باعبر =لبغا لي اقامه ولا ورقة كفيل
سلام يا الشعبه مئه والفين كر=تتوارثه الاجيال جيلن بعد جيل
وسلام ياظيهر قبل عيني ظهر=ظيهر ظهر ماباه من سدي يميل
فيه الخوه والخال وطن واستقر=في سعف باواكد وبارميم الاصيل
اهل الكرم والجود في وقت العسر=لامنهم طاغي ولا فيهم ذليل
وحجال من تحته تسر القلب سر=لاخضرة تلقي قصبها خط نيل
واصل على رجلك دحق ماشي خطر=بايشترح خاطرك والقلب العليل
وانظر ولا شطيت عا اليمنى نبر=لي با الكرع من سمح شعبه مستغيل
وسوام ومقايف بها عندك خبر=والعلبط المشهور با الفاي الظليل
بتقابل الرضحين سمعي والبصر=رضحين صناع المروه والجميل
سلام يا الرضحين عد قطر المطر=يامطرح الناموس والشرع الطويل
سلام عاجولك وعرضك والشجر =وعلى الحصى والطين مره والنخيل
وسلام لك ياجول بالحمر صدر=لهلك وسكانك ولي تحت الصليل
سلام لك تعداد رملك والحجر=يبلغ لعبد الله وحافظ والدقيل
قصد الزياره جيت يا الهاجس ندر=وسكن ونم في دار منظرها جميل
فوق الحضيره دار مابين القور=لذكرت ساكنها مساء دمعي يسيل
بيت وظل فيها ثلاث ايام جر=كلم عوض احمد وقله مستحيل
ماتنتسي في القلب ملقيلك مقر=يامن على شانك ترحلنا رحيل
والليل يا الهاجس سمر طاب السمر=شف عادها رحله معي عشرين ميل
بن بدل القافي لانه ماسبر =من شان عا قافي خري نمسي نكيل
ذا فصل والثاني على ذاك الطرف=باقي معي وادي خري كله خضار
بسرح وبازوره وباتكلف كلف=بدحق على الرجلين في ظهر النهار
بمشي مع الوادي ولا جاني ملف =من تحت بامحفوظ باقصه يسار
وعلى يميني ارض فيها ماعرف=غير الكرم والجود والناس الخيار
من فوقها حصنين عا روس الدكف=تشهد على الماضي على حالي وقار
والعسكري سدي على ذاك الردف=ساكن في الدكوه وله تاريخ سار
باقابل الخربه فللها والغرف=من فوقها ماقس بلد كل التجار
سلام يا الخربه عدد نزل القنف=وعداد رعدانه وعد مانجم ثار
وصعدة جاني شرج سودان العكف=فيه الاسد ساكن ومن حوله نمار
قابلني الشرقي بطيبه والحتف=جنه في الطيبه وفي الشدات نار
لي اصدقاء واصحاب يا الهاجس وقف=ماباك تستعجل تقول الجو حار
سلم على الشرقي مئة مره ردف =كرر سلامك الف مره بافتخار
وقصع الى مخيه سوى والقرن شف=سلم على الاخوان لي في كل دار
وطلع مع الوادي وعا يسراك لف=مقصدك لا قريه زبينه عا اليسار
لا رباط باكوبن مع الهادف هدف=ونشد على صدقاء وعا صاحب وجار
بي رحبو بك الف ماحد بي خلف =ليهم لقو مقصد لكل عابر ومار
عا البونعم سلم رجاجيل الشنف=عا الشاب والشيبه ولي عدهم صغار
اعداد ما بارق في اجهامه يرف=والرعد يتحطرم في اطراف المثار
وقلهم لو كان قل المختلف=كله سببه البعد واسباب السفار
واصل الى ترمل ولنته متعرف=حط الزبيدي يوم عندك مستشار
ون قال باساعفك قله لتسعف=ماباك سعفي نختلف في كل شار
هب خلني وحدي معا الوادي نلف=باقابل اترمل حصونه والديار
صاحب معي فيها من اصحاب الجلف=له عندنا قدره وعزه واعتبار
بو عيضه الصمصوم بلاغ الهدف=قله مساك الخير ياذري النمار
ونظر على اليمنى مقابل يعترف=وسلم على جول المحطه وانت مار
ورجع الى خطك على ذاك الطرف=بتجي القريه لي لها تقدير حار
واصل على رجلك مع الوادي وطف=ودخل بي الحوطه وزر كمن مزار
واصل الى الحاله طريقك لتوقف=بلغ تحياتي لهم عا دار دار
وقلهم باقي في الرحله هدف=وديت بازور الخميله با النهار
برجع عليهم بعد ماحصل ملف=داعس مع المعقل على نفس المسار
صدفه كتبناها ويامحلى الصدف=لاقد صدر فيها من الهاجس قرار
والقصد من هذا التعب والمختلف=قصدي زياره زور كل قريه ودار
عا الجود والمعروف مره والشرف=قد زرتكم ياراس مالي والضمار
والعفو لا شي ضرب من بندقي طف=ما يكمل ابنادم ولا بيده قرار
مايكمل الا الله قاضي كل شف=الامر بيده والقضاء هو والقدار
الحمد له والشكر عد هادف هدف=للحج والعمره وعد رمي الجمار
واعداد ما بحره بموجاته زغف=واعداد ماميح وغرد طير فار
عا لرض هذه ياحسوفه با الحسف =من عدة ايامه مفارق في السفار
من صدق قال الذيب واقع معترف=قرب الوطن جنه واما البعد نار
[/QUOTE]
احب ان انوه الى ان هذه القصيد تحت التمحيص والتعديل لما بها من غلطات مطبعيه
واخطاء كثيره للمعلوميه هي كتبت في الثمانينات لذلك وجب التنويه
عمر الذيب