شعر شبواني( مسيس)

[ابوحضرم]

الأوضاع تتزلزل وهنديها بهنديه رطن = والشعب بايطلع عليه الضغط لازاد الرطان
اذاكان تمت هكذا غش الشيادر يالصبن = بايظهر المخفي وكل مستور لازم بايبان
الفاس قربته وحده قيم لكبار الجدن = وبايقع تشريق لما الفجر يزعق بالأذان
الوقت مابه عيب أو عبن الليالي في الزمن = عبن إلا الكلاب الحمر لي يخرشن ماعاب الزمان
الميته لي كفنوها عزها الماء والكفن = وباقي الميت يشوف الشمس في البيض الكفان
أمات ديل معوجه الموس كسرها المسن = والكبر في الإنسان يلحق بالمطاحن والسنان
الكبش لازم ينذبح لازاد في الكبش السمن = المجزرة لي ربت الجزار تنشد عالسمان
أبديت بك يامحيي الميت ويامجري النسم = أنت المهيمن والقوي أنت قباض اللسان
وأثني كلامي بالنبي لي من أخطاه اعتصم = والآل والأصحاب لي بالله شدوا الاعتصام
القدس تشكي والنجف تشكي والأطفال اليتم = من بوش من شارون تشريد الأرامل واليتام
وين الزعامه وين خالد بن وليد اذا زعم = وين العروبه والعرب وين الدحاميل الزعام
وين القعيطي والكثيري وين نوح يادهم = وين سيبان المهيبه لي تقص ظفر البهام
وين آل باكازم وشبوة وين تاريخ العلم = وين المثلث لي برسماته يرفرن العلام
وين العوامر وين عز النفس بالقوس الصمم = وين الذي في يوم عاشورا وفي عرفه صيام
حسر يالمهره بكيتي عالمبادئ والقيم = شلوا مقام القاعده الأوغاد والمهره قيام
تاريخها بالحبر الأسود غصب سجله القلم = من شدة المأساه حنين المعالم والقلام
صدام فقدوه العرب اللي على رأسه رسم = ولعاد حد قدره معانا غير بن لادن أسام
الغرب صاحي عينه اليسرىحليفه ماتنم = الضان حكام العرب في غيهم ضلوا نيام
يابوعوض قل دان واحسن تهيبل أو غرم = في ذا الزمن لو باتفكر ةبايغرم بك غرام
أموالها تسري ونا ونت نطيب في العظم = اللحم لهل اللحم والكلبان يفحرن العظام
حد في ثرى عايش وحد عايش ينغنغ في النعم = الشعب في الجلسة وعمك نيم عاريش النعام
اسجع بصوت الدان حط همك على مليون هم = ولاتحن عالجوهره لاشفتها عاراس هام
الجوهرة راحت مع دعكيك ولقى سحر عم = وقعد سحر الجوهره يلعب بنا عشرين عام
كاتم علينا كتم في الأسواق ملحقنا نسم = يارب عسى له أمر عزرائيل قطاع النسام
يالعندليب الساحلي كل من لحق قرمه قرم = هانوا ميازين الذهب لي توزن إلا بالقرام
البحر منه صيد يسري ونت خصارك لخم = الجول شركاته تصدر للنصارى نفط خام
والبر فيه الخوف ماتامنه من كثر الزحم = فيه الأفاعي والحناش الصفر والسود الجحام
كلين ينهب في شروق الشمس وإلا في غيم = السارقه تسرق بعز الظهر من قبل الغيام
البر بسته آلاف منكر يالوزير المحترم = لي مايحترم حق المواطن مالبوه الاحترام
لما متى في ليلها تسري تعبيها قطم = والصبح تضربها ابر مهديات ديال طام
ذا الفصل والثاني بدع هاجسي ميزان الكلم = قدها مقاله يحبل الإنسان من بعض الكلام
له تحت كفرة سكس لي ضوى لنا دغشة رمم = وغز بوشوكه دليق الحد عاصعي الرمام
وباع عز النفس والناموس لكبار اللقم = وحرق شناب الهر لسود لي سقط ولعاد قام
لو لي نفوذ وسطو بالجمه ليهو ملتجم = الخيل لحمر مالحق فارس يشده باللجام
نبكي ونتألم على الماضي ونتناسى الألم = راح المداوي لي يداوي لي جروحي والألام
محد كما حد باختلاف الناس في شعوب وأمم = وسعيد صالح مايقع نصه كما عادل إمام
يابن دغر مايصعد الدخان فيها من عدم = بعت السياسه بعد ماشطبوك من حكم العدام
يالوعل مرصوص العير دخلوك في زرب الغنم = ولعاد لك قيمه مثيل التيس لي بين الغنام
وين الشهامه وينها وين الطوابع واللجم = وين العيون الساهره لي في زمنها ماتنام
فن السياسه كالأصابع وسط سباب وبهم = والحكم والتثبيت بالبصمه على صباع البهام
دلا السعوديه سياستها لعب كرة القدم = ياللي تدعسون السياسه بالحفيات القدام
بعتوا ثياب البيض والعطاس وقصار الحزم = في عرض جنبيه دويله مالها زهاب او حزام
وعادها وحده معي بانصب بها اربع خيم = مابي مهمه من سياسة دي صبح هي والخيام
الذيب الله يرحمه لي مات في وادي الهيم = وباقي الا الثعل الاحمر ياهيامه بالهيام
ديلته وسط القدر توقد والمرق وسط البرم = والكور دحسه بايقع عايد برمه والبرام
عرس السقل مقبل وحبل طبولها مزموم زم = والمشترح هو والمزمر يستحقون العزام
العاج مدرومه وكاس الصهد في الراس اندرم = واللي اندرم ماعزه الا الزقل مثناة الدرام
الثعل مكره زاد عاخوانه ومكره زاد جم = حصل حبابه تأكله حلوه طحينيه وجام
نيران بركانه على اهل الدار تتناثر حمم = حرقت طيور العول لي عالارض وطيور الحمام
ياأهل السياسه هاتوا المجهول ولقوا له رقم = لي زلزل الصفراء ودوعن شاص ماله شي رقام
الارهاب في ارباعها قبة صنم تنطح صنم = ياخيبة الهجرين والمشهد بعباد الصنام
لاقلت لهم ذاكعب قالوا لي نرد الكعب تم = وحسابهم فيه الغلط ماحسبوا الحسبه تمام
قم يااسامه ضم الاحقاف العريقه خير ضم = روادها ماشي عليهم كيل في حفظ الضمام
لي باينظمها مخالف لللوايح والنظم = ماظن تتنظم وسادتها يعكسون النظام

(ماظن تتنظم وسير الدحبشه عكس النظام

قم قيم ياباسيف شوف المال عادة منقسم = قسمته باتوقع على الرشاش ىمفكوك القسام
يامرحبا بابيات من شاعر حرق عشرين بم = رمضان انت من جفل منت من الصفراء شبام
الليله الشعار حدمسرف وحد مص العجم = وحد كما احمد بدير وحد كما عادل امام
واليوم ود باحارثه اعطوه صفارة حكم = واحكامه العوجاء تجيب الا الجديعه والزكام
حسين ود باحارثه ماليوم بايداته دكم = ساعه يلبد عالجماعه وساعه يدكمهم دكام
اما انا دلحين باتكلم معي اربع كلم = باسيف هذا عنده الحكمه وتفسير الكلام
الكلمه الاولى تخبر عاللبن سعره بكم = تجارنا هبروا بغوا هده وترفيع الكمام
والثانيه من شلة الافساد مالحقنا نسم = جعل لبوهم قنبله تقتل مع بارود سام
والثالثه بعد القصور العاليه نسكن خيم = وتجوروا حلان جذمه هم وحلان الخيام
والرابعه في ثمان من شوال قل بايسيل دم = ويومها والله ان قد ضلت خمستعشر مدام
قولوا لبو عاشور كل القصد والمقصود تم = مادام قد جاكم محافظ باتقع بقعه تمام
راضي انا باللي تجيبه انه شوي ون كان جم = عشيتنا مضبي وانت عشيتنا روتي وجام
والعم سالم باجبير الجود عنده والكرم = واولاده الاشراف واخوانه كرام ابناء كرام
يافرد يامعبود لي كلفتنا بالمستطع = واجب علي تو لاصدرت امر تو لامرك نطيع
ونت المسامح لاوقف دمعي وقلبي ماخشع = والااذا صدقت بعض الشائعات اللي تشيع
ياربنا فلسطين فيها حصار يامانع منع = وخاصة غزة على غزة لقوا سدا منيع
الظالمين ضربوا على الحصون مرة والقلع = متى يالرب القوي بس باتقلعهم قليع
ولعاد رحموا طفل والا شيخ ياقارع فرع = اليش ماهو راس بومازن يخرعونه خريع
وين حكام العرب ظني مغني جنب صقع = اولادكم واخوانكم في الطفي والبرد الصقيع
الكاف لي عملته شقعته كما اربع شقع = وينه في فلسطين با نبغاه يتشقع شقيع
والميج وينه لي ملقي خراط ياطاقع طقع = مابايلقي طمبقه بس عالعرب يقطع قطيع
والعين هو والقاف محد قال ياطارف رفع = وعاده اماة محد منهم ذوقه رفيع
والبا كما راحتي ماعنده في الخاطر وسع = الضيق مايدخله ذا ولفان عالحيت الوسيع
والسين من دوري الى دوري ويابارع برع = والياء على باب اليمن كل يوم يتبرع بريع
والباقيين الا همي محد على الخير اجتمع = شلل ثلاثه ارباع قالوا لي مخيم عالجميع
صلوا على المختار لاتشفع الى ربه شفع = وعساه ياكل من حضر يوقع لكل واحد شفيع
الهادي سكن بقعه ولا كل البقع = والآل والاصحاب لي دفنوا بمكه والبقيع
وعادنا دلحين باتكلم سمع مني سمع = عبدالصمد ياصاحبي ماهو كما عبد السميع
اخوان صح لكنهم كلن بمخلاعه خلع = ون اشتحكته بينهم والله ان يخلعونك خليع
واول الاخزان غش المشتريه والبيع = وقال وسط السوق شو كلن على كيفه يبيع
لاياكبير البطن لاقد شفتهم بلعوا بلع = ولا فتح افمه خزاين الارض يبلعهن بليع
وعاد خصله فيه لاقد شافهم رضعوا رضع = ويريد ايام السلى حلوه كما ايام الربيع
الغاز ذلا انطفى لكن على غفله ولع = يامعشر الشعار مادلحين ولعوها وليع
وثاني الاخوان قال الوقت ياسارع سرع = سرقاته الا بالقواطر تعبر الخط السريع
ياخير بقرة ضرعها مليان ياراضع رضع = وطفلها ماشاف شي مسكين يالطفل الرضيع
والليل يالشعار شادمون ماترجع جدع = بانركب الاريل اذا قالوا الاذاعه باتذيع
قد كان باجمال يطقع خل مجور لاطقع ينطط الاسفلت لي في القاع من كثر الطقيع