عمامة محروس بعشرة الاف ريال

[وحدوي وميت من الجوع]

مساكم الله بالخير يالحبايب ويالسادة اليوم حصلت لمحروس جارنا كرسة على قول اخواننا المصرين
محروس هدا جاري وبيني وبينة خلاف الناس وهو صحيح رجل طيب مثل مايقول المثل تحطة على الجرح يبرد المرة دى هو الدي انجرح .
كاعادتة محروس يقوم الفجر يصلى ويقرا القران لمان الساعة سبعة ونص يقوم يتصبح بصبوحة ويشرب لة فنجانين قهوه وبعدها يروح الدكان حقه في السوق يكدح كما الكادحين ولما اجاء هدا اليوم
بايفتح دكانة حصل واحد فارش بسطة امام الدكان شعرة صفر كما التركي وعلى شأن يفتح محروس الدكان مجبور يشترقع البسطة ودار بينهم هدا الحوار.
محروس يابوي خاف الله فارش امام محلي
بوشعر اصفر الدكان حقك انا مادخلتة انا فارش على الرصيف والرصيف حق الحكومة
محروس طيب كيف بغيت الزبائن يدخلون ياولد الحلال

بوشعر اصفر وانا مالي الرزق على اللة
محروس ونعم بالله لكن ماقال الله ضايق الناس في ارزاقها وانت دلحين تضايقنا
بوشعر اصفر اكيد انت امفصالي
محروس ياخي قم شل نفسك حرام عليك ياخي انا عشرين افصالي
بوشعر اصفر اسمع ياعزي انا مابتحرك من هنا ولو باتجب المحافظ
في هدة اللحظة فقد محروس اعصابة رغم انة مايحب المشاكل لكن الجوع كافر وهدا مصدر دخل عيالة اسمع إدا مابتشل هدة الفرشة شفنا بزقلبها في الشارع
بوشعر اصفر ما باحركها من هنا وريني ايش باتسوي اهنا
في هدة اللحظة انقلب محروس وحش شل البسطة ورماها ولما حاول ابو شعر اصفر الامساك بمحروس بطحة محروس وبدا يدلكم علية إلا وابوشعر اصفر يصيح بصوتة كلة ياعلى ياعبدة ياصالح ياقايد إلا وانقظو مثل الذياب على محروس اربعتهم وبشعر اصفر خامسهم ومن سؤ الحظ كان الشارع فاضي مافية ولا مهلل غير محروس والجماعة ويلقون لمحروس ترميحة لمان داخ لما داخ شردو واختفو ومحروس في الشارع يسيل دمة في هدة الساعة انا كنت خارج من بيتي وكاعادتي لما اخرج اسلم على محروس ولما جيئت باسلم عليه لقيت صاحبنا غرقان بدمائية وعلى طول اسعفتة الى المستشفى دخلنا المستشفى ومعى محروس فاقد الوعي يع يع يع علبوها مستشفى لما دخلت طرشت
من الوساخة الدي فيها والدباب يمرح ويلعب فيها المهم سألت واحد من الممرضينودار الحوار
وحدوي وميت من الجوع وين الدكاترة
الممرض محد هم غير دكتور واحد
وحدوي وميت من الجوع مستشفى ومافيها إلا دكتور واحد
الممرض كلم المسؤلين متكلمنا انا
وحدوي وميت من الجوع صح كلامك انت مالك دخل يابوي
الممرض ياخوي الدكاترة يوم يضربون ويوم ينضربون
وحدوي وميت من الجوع يضربون مفهوم لكن ينضربون مافهمتها
الممرض ينضربون يعني يجي واحد من اهل الخير يتبرع للمستشفى
وحدوي وميت من الجوع ليش والحكومة ماتعطيهم شئ
الممرض حكومة من ياخوي بلاد بلا حكومة خلها مستوره
وحدوي وميت من الجوع طيب ايش من دكتور الدي موجود جاري مضروب
الممرض الحمد لله الدكتور الموجود جراح
وحدوي وميت من الجوع الحمد لله هودة الدي بغيناة
الممرض بادخلك بس هت حق الورقة الكشفية
وحدوي وميت من الجوع ياخي دلحين هدا مستشفى حكومية إلا مستوصف
الممرض حكومية بس كلة ببيس ماشي بلاش دلى كان اول
وحدوي وميت من الجوع طيب تفضل هدا حق الورقة
في هدة الساعة دخلنا محروس الى عند الدكتور الدكتور ماقصر سوى لي فاتورة قال رحبهاالى الاستقبال وخلي محروس في السرير وجرى هدا الحوار
وحدوي وميت من الجوع هدة عطانا اياة الدكتور
الاستقبال بغينا منك دلحين حق المغديات وحق الابر وحق المخوط وحق الخيط وحق الشاش
وحدوي وميت من الجوع كلة هدا انا ادفعة
الاستقبال نعم كله عليك هدا
وحدوي وميت من الجوع ياباطلاة ويامنكراة ماعد باقي تقولون لي هت حق الكحل إدا عندكم كحل
الاستقبال هدا كلة حسب تعليمات الوزارة مثمتلة في الاخ الوزير
وحدوي وميت من الجوع ياخوي بلا وزير بلا خرابيط حقكم والمهرجانات يخصرون مئات الملايين يعني جاءت على التفتفة هدة ايش هدا الباطل المهم هدا الفلوس خلصو الرجال
وجلست انا في الغرفة الاستقبال إلا ودة صفصاف (صرصار)مقلوب على ظهرة يفحص ومع فحيصة يسوي صوت قلت ايش يسوي هدجالس يفحط المهم بغيت باساعدة قلبتة بعود قال لي ليش تقلبنا قلت لة بغيت باساعدك قال ساعد نفسك اول بعدين تعال ساعدنا قلت ايش هدا الكلام قال انا سمعت كلامك كلة مع الاستقبال وشفت الفلوس التي دفعها انبطحت على ظهري اضحك من قلبي على غلبكم اما نحن هدا المستشفى ملاذ آمن لنا قلت لها انتم من قالت نحن الصراصير وعيال عمنا الدباب وعيال اخوالنا البعوض بصراحة انا لما سمعت هدا الكلام جلست بفتقع من الضحك نسانا محروس إلا قبل عليا محروس ماشاء الله على محروس لبسوة عمامة بيضاء بتجي مترين فوق كورة ايش هدا يامحروس قال سو لي اربع غرز والحمد لله سليمة قلت لة قدامك العافية ياجاري قالي محروس وراك تضحك يوم قبلت عليك حكيت لة القصة قام محروس يضحك لما قال اي اي اي قلت لة يامحروس انت ممنوع عيك الضحك جرحك لازال طري لعاد تلبس شي عمامة ماشاء الله فصلوها لك المستشفى بالمقاس يالله بانخرج من قرف المستشفى وهمينا الخروج قلت دلحين وين بغيت يامحروس قال بشتكي في قسم الشرطة (الاحوال) قلت له يالله قم ياجاري اليوم ماعد بغيناة الشغل ورحنا الة قسم الشرطة
لقينا ملازم شمالي وعقيد جنوبي ودار الحوار بيننا
محروس حكي قصتة لهم للاخير
العقيد الجنوبي طيب خير
الملازم الشمالي حق الطقم
محروس عاد البنية صغيرة على الزواج مابغينا شئ طقوم
العقيد الجنوبي لا يامحروس اصل سيادة الفندم يقول حق الطقم العسكر يعني
الملازم الشمالي حق الطقم مستعجل عشرة الاف على مهلك خمسة الف
وحدوي وميت من الجوع ياخي نحن مابنشتري الطقم ايش هدا الكلام خافو الله
العقيد الجنوبي لا ياميت هدا بس الروتين
الملازم الشمالي اسكت ياجندي شمالي
العقيد الجنوبي حاضر يافندم
محروس ورى الكلام إلاكده انت عقيد جنوبي تقول للملازم حاضر يافندم وتستعد لة
العقيد بعدين باقولكم يااخواني خلصو الفندم اول وخلوة يوافق
محروس بغيتو كم اخر كلام
الملازم انا قلت كلمتي وكلمتي الى الامام فاهمين
العقيد الجنوبي ياخواني تعالو برع باكلمكم نستأذن يافندم
الملازم الشمالي استعد ياجندي شمالي ثم ادهب
العقيد الجنوبي حاضر يافندم
محروس ياعقيد جنوبي كنك في الحالة دى لبوك الترترة
وحدوي وميت من الجوع والله كلام محروس عين العقل كنك ياعقيد قابضك الملازم يهتورك قدامنا وبعدين ايش الكلام الفاضي هدا الدي نسمعة منة يقولك ياجندي شمالي وانت تقول يافندم دلحين فهمنا انت العقيد والا هو
العقيد الجنوبي انا العقيد بس مشكلتي اني جنوبي ومصنف في الامن المركز برتبتة جندي شمالي ومعاملتي في الامن هدا الرتبة وهي جندي شمالي
محروس ده كلام جديد طيب وليش يعطوك بدلة عقيد
العقيد الجنوبي للشهرة امام الناس والاعلام مثلي مثل الوحدة حق رمزنا الاسم اسم وحدةو والواقع واقع انفصالي بغيض وتميز وعنصرية مقيتة ومامعي من العقيد إلا الراتب ماباقي الحاجات لااهش ولاانش وعدروني ياخواني ان قصرت هدا حكم القوي على الضعيف
بعد هدا الموقف الحزين جلست انا ومحروس نبكي على ماحصل ويحصل لنا ولاخواننا وقام العقيد الجنوبي يبكي مثلنا ونحن كذلك إلا بصوت الملازم الشمالي يهز الجدار ياجندي شمالي دخل العقيد الجنوبي يهرول من الفزع تم جاء إلينا مسرعا دلحين ايش قلتو ياخواني الملازم ا زعلان
قلنا لة انا ومحروس نحن نريد هولا ء ان تردعهم العدالة إذا في عدالة وهدا العشرة الالاف سمع الكلام الملازم الشمالي وجاء مسرع هاتو امزلط وفي حينها امر بتحريك الطقم وماهي ساعات إلا وجاء بالاشخاص الخمسة في الطقم وهم مخزنين ودخلو على الملازم في غرفتة وماسمعنا إلا والضحكات شعقت مسامعنا ولا ندري ايش الدي صار شوية ألا وخرج الملازم الشمالي خلاص انتم ادهبو الى بيوتكم ونحن سوف نحقق معهم وندخلهم السجن قلت لمحروس يالله قم يامحروس دلحين بايأذن العصر ونحن بلا غداء ولابسط (الفطور) قال محروس بانروح المسجد وبانصلي العصر وبانخرج المقهاية اما دلحين كل احد يروح بيتة يتغدا واللقاء بعد العصر قلت لة تمام صلينا وخرجنا المقهاية لقينا الدي ضربوا جاري محروس جالسين في المقهاية والشاهي والدخان كأن لم يكن شئ في هدة اللحظة تيقنا ان نحن محتلين بنمره هوستمارة وماالباقي إلا خيع وغباء وجلسنا انا ومحروس ندعي ان ربنا ينصرنا على الظالمين


(كنكم قعو صماصيم معاد بادور لها كما دك بس باعرف نفسي اني غير مرغوب فية وباشل ملفتي وباتوكل)

[حد من الوادي]

وحدوي ميت من الجوع؟؟
دمت بعزوناموس ويفرجهاربك بعدالعسريسرين ؟
وهذة عقوبة نازلة على البلادوالعباداقنتوواطلبومنه الفرج وقعوصماصيم في بعظكم البعض ؟
-------------------------------------------------------------
انته عبقري مزيدمن الابداع والعبقرية الحضرمية المكلاوية؟

[جابرعثرات الكرام]

اقتباس : المشاركة الأصلية كتبت بواسطة وحدوي وميت من الجوع

(كنكم قعو صماصيم معاد بادور لها كما دك بس باعرف نفسي اني غير مرغوب فية وباشل ملفتي وباتوكل)

ياميت من الجوع

ماهو نحن الذي أنتفظناعلى دك,كنك قع وليد خلي أتاهمك الباطل تخبر قبل أن تتهم الجويدين حق السقيفه ولا بانحرك طقم وأنت اخبر بالباقي

[سالم زين العطاس]

يا ميّت شفها وحله ان جيت لها من هنا مصيبة وان جيت لها من هنا مصيبتين ، وخذ لي عليك يا ميّت ما تجيب اللي لك وبس وهذا الكلام يتكرر ، وبا يعطيك ابن هاشم مثال:
باسناو مع الهشمي اختلفوا على ارض كبيرة قريب المطار من اول توكلك الذياب فيه واليوم حنحنه . يا ميّت والكلام لكل ميّت حي وحي ناوي يموت والنفس جاري وحي يفهم مني ومنك الكلام
تنازعا فيما بينهما فذهبت ريحهما وفشلا ووصلت القضية عند قاضيها شي من شي وشي في شي وشي شفته انا والقاضي اوعز إلى واحد محترف ولعبوا بالاثنين لعب الكرة وخلصت القضية عند قطعتين للإثنين بعيدة عن المطار وبقية الارض كلها لمولانا وللمحترف.
في مقيل التخزينة قال واحد لصاحبه:
ـ زلط هاهنا مثل الرز ونفوس نفوس اطفال ما كنا ندري ولا عا ندري لكنهم يتخاصمون ويخلونا ندري والا قدها لخوه يدقّر ويغدي ركبة بعير والا قدها لنا كلّين يصرط مخوط!!!!!!!!!!!!!!!!!!!!!!!!!!!!!!!!!

عمامة محروس غالية ولي أغلا منها الرأس لي تحت العمامة
أفوتك بعافية يا مميّت ولا تنسانا من مواضيعك المضحكة المبكية

[الحضرمي 2003]

أسلوب رائع في النقد ، لكن تعتقد زوارنا يعرفون رطننا ، هل أثرنا فيهم أم اثروا فينا؟؟

في إعتقادي الشخصي إنهم إستطاعوا التأثير فينا أكثر مما أثرنا فيهم ، من ناحية اللهجة ، والثقافة ، والزلط ، ويمكن ( شقعناهم )في الكثير منها

وين موضوعك السابق + إعمل له إعادة !!!!!! وقل لابو صالح تحصن والبس لباس واقي من كله.

شكراً لك وحدوي وميت من الجوع إصبر -( إن الله مع الصابرين)

[جابرعثرات الكرام]

اقتباس : المشاركة الأصلية كتبت بواسطة الحضرمي 2003

وين موضوعك السابق + إعمل له إعادة !!!!!! وقل لابو صالح تحصن والبس لباس واقي من كله. شكراً لك وحدوي وميت من الجوع إصبر -( إن الله مع الصابرين)

الحضرمي 2003

ألم تعلم بمشكلة الاختراق التي حصلت وبالتالي ضاعت كثير من المواضيع وانت في غيك القديم والاستطفاف أرباء بنفسك عن هذا.

[وحدوي وميت من الجوع]

اقتباس : المشاركة الأصلية كتبت بواسطة جابرعثرات الكرام

الحضرمي 2003 ألم تعلم بمشكلة الاختراق التي حصلت وبالتالي ضاعت كثير من المواضيع وانت في غيك القديم والاستطفاف أرباء بنفسك عن هذا.

واه من اختراق حصل يابوكم مانعرف ا ن لقي شي إعادة ولايعارة خلوبوها بس بانقول الله يرحمها .

[ابن ال علي]

شكرا ياميت من الجوع اشبعتنا بقصة عمنا محروس وماتعرض له من ظلم واضطهاد وهو في عقر دراه وامثاله كثير باسلوب طريف ولهجه مميزة ربنا يحفظ عمنا محروس واهل حضرموت من كل مكروه ( وهذه واقع الوحده اليوم )