صاروخ قسامي ((جواب خالد بن قاسم على بن عكعوك))

[خالد بن قاسم]

السلام عليكم ورحمة الله وبركاته
الاخوان الكرام اقدم لكم هذة القصيدة
جواب على قصيدة الشاعر الكبير يسلم بن صالح بن عكعوك
ارجو ان تنال اعجابكم ومنتظر ردودكم وتعليقاتكم

القاسمي قال ماشي عذر نتفسم=ومن رفض بضربه صاروخ قسامي
الليل ياهاجسي ماباك تتوهم=واوقف على الحق لاتؤمن بالاوهامي
قم بعد ذلحين بالجوب على يسلم=ذي لا درس علم جغرافي ولا اسلامي
ولاحسابات يعرفها ولا يفهم=حاولت بافهمه ماهو بمفهامي
وكل من عامله مضمون بايندم=عشرون عاما ونا شابع تندامي
درس وعلم ولكن ربنا يعلم=يعلم بسري واخباري واعلامي
والمرجلة كوم في راسه ويتزهجم=وبالهراء والقصايد له تزهجامي
ولا بداء شف بن عكعوك يتنهم=من مد رجله لقعها لقعة الهامي
لانامو الناس هو عالنت يتقدم=وقال باشق خط السير باقدامي
يهجم على القاسمي في جنح ليل اظلم=وانا اعرفه من زمن شاجع وظلامي
لكن لاقمت بالبكرة بحمو الدم=ارسل جوابه وهو يحفر وانا دامي
وحم تحمحم وبتحمم وبتحمحم=والله ماهمني بارد ولا حامي
وبعد قم يالمعنى خيلك املجم=ولا توسقت ظهره فك للجامي
سلم على الجيد يسلم واخوته والعم=ذي دارس العلم والفهمان والعامي
وقله ان الشقر والطيب شمه شم=وبند الترك والمصري من الشامي
واللطم مانقبله باصم يده صم=في مدة اليد بعطي دم صمامي
جاهز مجهز على ذي قال مابرحم=اما انا مااقطع انسابي ولا ارحامي
لكن وقت الزعل بوخذ كماه او جم=لانا مقيد ولا حب التلجامي
ومدفعي مدفعي ياطم والله طم=هو كلمة الحق مثل الشامخ الطامي
وانته قدك تعترف بالحق وتالم=رغم ان مابك الم من كثر الامي
ولاتقول انتهينا بالتمي ثم=انا الملثم وانا ذي بنزع اللثامي
كمن عدو في سنة سبعين رمه رم=خبره معي قل ليسلم عالهدف رامي
بخرج من المشكة امعزز امكرم=من طيب نفسي ومن جودي واكرامي
ذكرت الاثنين ماحد حزم المحزم=وانته تحزم وانا ممقوط بحزامي
اثنين كلن يبا الملهف ويتكمم=ويقول للمصلحة بارفع اكمامي
ماهمه الناس مايحكم ويتحكم=ولايعول بشعبي هم وحكامي
وان جاه مظلوم غشه بالدواء والسم=والتعزية جات من مندوبه السامي
ذكرت حب الذرة ماشي معي معدم=ولا قربته شفه بيقرر اعدامي
هذا لربعه مخصص من قربهم هم=ذلا عرفت الغرض من كثر الهامي
والزحو حبه يباله راية المخرم=ذي يخرم الارض للنزغات خرامي
وحللوها لهم واحنا لنا امحرم=شلو ظماري وكوفيتي واحرامي
حتى على الدوم كل واحد يبا يرجم=حد ناش علبي وحد يرجمه رجامي
واشكي لمن منهم لصقع مع لعجم=ماحد فهمني كاني بين لعجامي
لاجيت بشكي لقيت الشيخ يتنقم=يضحك بشدقين يتنقم تنقامي
والمشكلة في عيال الشيخ بوملحم=هذا يبرد وذا يلهف على الحامي
من بعد ماسار حيدر هوويا هيثم=جابو خطاياي في الماضي واثامي
هذا الثقه يومني في حبهم مغرم=مااليوم صحيت من ولعتي وغرامي
بنهم بصوتي وصفي بانزمه زم=وشل زامك وانا بصمد على زامي
وبالرجع جميلة مالها محرم=بعطف عليها وبسترها بمحرامي
في شانها غصت بحر الهند والقلزم=باهد راس الجبل من فوق لقزامي
باجيبهم ساعة الماجوب من كل يم=بنغب وباشل بالمثمون واليامي
لكن ماجيت عالمحزاه يايسلم=لو جبت لي حلها باقول يسلامي
وجبت محزاه لي ولعاد تتكلم=عندي لها حل لاحد يفهم اكلامي
محزاتك الجبح فيه النوب يترنم=الظرف ميت وهو ملقي ترنامي
مضمون ذا حلها يالحيد يالصيم=او انوي الصوم ماباافطر من اصيامي
وبعد بحزيك من رجال يتوسم=رجال معروف يحمل عدة اسامي
يسرح ويضوي وسر المهنة امحكم=في شور حرمة تحكم به تحكامي
متزوجه كركره يسرح بها لبرم=يطلع بها في السماء يبرم تبرامي
هذا كلامي وحذرك ترفع المعصم=انا عصامي وخلك مثلي اعصامي
والختم لبغيت شي ساعة ولا خيتم=طمعان فالدين قصدي ختم اختامي