الحاضر يحكي للغايب قصيده عاجله

[سبع الليل]

أبديت بسم الله ربي لي عليه الاتكال=نمشي بتقديره وفي كل السُبل متوكلين
الواحد المعبود خلاًق الخفيفه والثقال=سالك بغفرانك لنا والعون منك يامعين
صلاه عالهادي محمد عد ماشاع الهلال=وتعداد ماكل الخلايق مهلـلين ومسبحين
والأل والصحاب لي نضربهم اروع مثال=ذي بالمعزه والمروه والشرف متمسكين
سلام من شاعر يروم العدل ويروم الوصال=والعفو والسمحان من كل الرجال المخلصين
بين الاهالي والاقارب عيال عم وعيال خال=والنيه الزينه وحُسن الخُلق والقول اليقين
ماشي كما الرحمه ولا الشفقه وتحسًين الفعال=والاخذ بالرأفه وبالاحسان بين المحسنين
الاسلام وصانا وعلمنا الادب والامتثال=والامر بالمعروف والعفه شعار المسلمين
وبالستر وصانا وبالجوده و تربات العيال=وأيظاُ بـبر الوالدين أحياء سوى او ميتين
على لسان المصطفى زين الفعايل والخصال=أدى الامانه كامله بالحق وبالصدق المُبين
وبعد ذا كله لزوماُ نـنتبه فيما يقال=ونتعظ ونوخذ العبره من اصحاب السنين
ياما وياما قد سمعنا من حوادث وأقتـتال=ومن مشاكل ومن فتن بين الاهالي والبنين
ياما عوايل تفرقت وياما اُسر فيها انفصال=في بيت واحد كلهم يعيشون وهم متفرقين
الكُره فيهم والحسد والبغض قد فاق الخيال=كلين يباء نفسه عاقل الاسره خلاف الباقيين
ان جاب شي للبيت يتمنـن ويبداء بالجدال=ويشتم اخوانه ويتلًسن على ذي جالسين
وان شاف شي غلطه صغيره قال ذي كُبر الجبال=يحذف بلي باداه ويرًمح برجله القاعدين
هذه الفعايل حاصله في ذا الزمن ماهي محال=كل يوم والثاني نشوف أشياء تشيًب بالجنين
وما بعضهم ينصاع للحرمه ويعطيها المجال=حتى على أمه يفضلها قليل العارفين
يسمح لها تومر وتنهي كأنها بدر الكمال=وتعيب في زوجات أخوانه وفي أخوانه تهين
يبًيت معاها في سمر وفي دندنه طول الليال=والصبح نامت ماتفكر في الذي هم ذاهنين
ولا وقت العداء قامت وقالت قربوا تحتي التفال=تقرب بجنب الصحن لي مثناته اللحم السمين
وان تكلم او نصح حطت على راسه القبال=ولا ضوى رجالها تشكي وتنحط بالونين
وعيالها ماحد يكلمهم وياويل من يضرب جلال=خلوه يفعل ما يباء واعطوه من كل شي أثنين
والله شو هذا بدال ياناس ما بعده بدال=ما هو من المفروض نعطيهن على كل ما بغين
والمشكله لا جاء المسافر بالهديا والطبال=يحتار في التقسوم و يفحس عا يساره واليمين
يبداء بمن لول مصيبه تزرزرت عنده الحبال=لابد تقوم القايمه اكبر على أبليس اللعين
وبعد تقسيم الكساء قالوا عطى نحن الدوال=وعطى عياله لي من الغالي وكل ماهو ثمين
ما شي جماله منهم لو سقيتهم صافي زلال=لابد يصلك اللوم والتلكيع كل ساعه وحين
لا قدر للوالد ولا حشمه لعًقال الرجال=كلين يلقي لي براسه ويعجن الدنيا عجين
والقصد شو هذا الذي هو بايسبـب الانفعال=والتفرقه والحقد ويخلي الخوه متخاصمين
الله يهدينا ويسلكنا طريق الاعتدال=ونراجع انفسنا ونـنظر للخطاء متمًعنين
هذا الذي هو بانعيشه ذا الزمن عاكل حال=ماحد بري من هذه الاشياء ابد يالسامعين
والختم صلو عالنبي تعداد مامسيال سال=وعد ما طلعت مناشي ورعدها يلقي حنين

[البكري]

بسم الله الرحمن الرحيم
اخي سبع الليل يقف العقل مذهولا عند رائعتك
انها فعلا رائعه بمعنى الكلمه انها دراما حقا
يعيشها معظم البيوت وتتمحور حول موضوع
لطالما النصح فيه قليل فياليت هذه القصيده
تشق طريقها الى كل بيت انها موعظه


البكري

[علي فدعق الهاشمي]

ســـــــــــــــــــــــبع اللـــــــــــــــــــــــــــــــــــــــــــــــ ــــيل

يسعــــــــــــــدني اِن اَطِلع على هـــــــــــــــــــذا القصيدة الواقعــــــــــــــــــــيه
بدأت بالمقــــــــــــدمه والصلاه على خير الخلـــــــــق ودشيت في الموضـــــــــــــــــــــــوع وكـــــــــــلام زين مابعــــــــــــــده كــــــــــــلام .

صــــــــــدقت ياخــــــــــوي وماقلت الا الصـــــــــــــــــــــــدق يازين الفعــــــــــــــــــــــــــــــــــــــــــال تطرقت في قصيدتك لعـــــــــــــــدة مواضيع تشــــــــــــــــــد الانتباه واعتقـــــــــــــــــــــد ان اغلـــــــــب الاســـــــــــــر اَذا ماقلنا كلهـــــــــــــــــــم انهم يعانون من هــــــــــــــــــــــــــــــذه الحــــــــــــــــــــوادث والله يلطــــــــــــــف بالجميع .
مااقــــــــــول الا ياعســـــــــــــى من قراهــــــــــــــــا يتعــــــــــــــظ ويسمع مافيها من عــــــــبر وكلامك زين ياسبع يفرض نفســـــــــــة ..............

تقبل شكـــــــــــــري وتقـــــــــــديري
اخـــــــــوك
علي بن حامد فدعق
الحامـــــــدي**ابوهاشم

[سفير الوادي]

صح لسان سبع الليل
هذه مشاكل حاصله عند اكثر الناس
الله المستعان
تحياتي للمبدع المتمكن

[أميرة الوادي]

درر تتوالى من عقد منظوم

وحكم من قلب مكلوم

أعاننا الله وإياكم على هذا الزمن!

[غازي عمر بن مهناء]

سبع الليل نعم انت غني عن اي مديح قد نقوله
ولكنها كلمة حق انت مبدع ورايع وشاعر بارع
تقاسيم مفردات بعد توجيه استرايجيه الخ000000000000
بالتوفيق يارب
مسرحه ممتازه جداً انا اعشق مثل هذا الطرح المميز

[لصقع]

صح لسانك ياسبع الليل
وهذافعلآ حاصل في هذا الزمن

[لصقع]

ياهلا بريحة بلادي ياهلا بشعر الحبيب من قراء شعرك يشوق الى بلادة والقريب
ياتنا ابيات زينة الدواء هي والطبيــــب سنح راسي راس مالي ياكناني والصليـب
جدنا والاصل واحد والنسب هووالنسيب ساقنا لرض البعيدة المقـدر والـنصيــــــب
شمس الصفراء القديمة شارقة ماباتغيب حد تجرع سم قاطع وحد عسل صافي صبيب

[ابومهند]

قصيدة رائعة ومعناها أروع ويامحسن الكلام الذي يبدء بذكر الله ويختم به وما أجملها من نصيحة أسأل الله العلي القدير يجعلها في ميزان حسناتك ، ويجعلنا مقتدين فيك وصدق عليه الصلاة والسلام : ( من دعا الى هدى كان له مثل أجر من تبعه الى يوم القيامة ) أوكما قال صلى الله عليه وسلم .

[سبع الليل]

شكراً للجميع بدون استثناء

وشكراً خاص للاخ لصقع واذا ما خاب ظني هو قريب مني
وعزيز وغالي . شـــــــــــــــــــــــــكراً جزيلاً