المشكله في من على الكرسي ركب

[الواثق بالله]

الليله الهاجس بقوله قد ولب =جاني وانا وحدي وحتى الشهر غاب
يامرحبا بالقول والهاجس طرب =وعالقوافي باينسق والخطاب
الليله المعنى في الراس انقلب =وذكرت زام العنتره والانقلاب
وتداخلت لفكار من اهل العجب=غطواعلي بافكار سوداء والحجاب
علي في السبعين قالوا لي خطب=وفي المساء قالواعلي ذاع الخطاب
علي سمعته قلت ماعمره كذب=يومه قسم بالله واقسم بالكتاب
هو حقق الوحده وبيده قد كتب=بالدم بانفديك ياخير التراب
وحده حقيقيه وحتى في النسب =لافرد زايد فوق حد بالانتساب
هذا كلام الشعب ياكاتب كتب =بالعشر قد وقع بوحده عالكتاب
بالامن والايمان حققنا الطلب=وزانت ايامه وفيها الحال طاب
وبايطور شعب غارق لركب=في الفقر والفاقه واكله والشراب
وبايعم الامن في اصل العرب=والغش بايلغيه من كل الحساب
والمشكله في من على الكرسي ركب=يصبح يفكر كيف بايملي الجراب
علم عياله كلهم من جاء حلب=وفي المنيحه واللبن عاشق وحاب
واصبح يذبح في غنمها والجلب=ماشي حياء يهتك حياها والحجاب
وحيث مايعجبه في القطعه صرب=طول السنه عنده في المطرح صراب
وعادني لازلت احسب له حسب =وهو علي طاغي ولا يحسب حساب
كله من اهل الويل واصحاب السبب= قد طيروا الصافي وشربوا من سراب
والشعب في ذا الوقت يتبع من غلب=تايه ولا يعرف مجيه والذهاب
سكتوا على اهل الملامه والعتب=عشرين عاما في الملامه والعتاب
يالله عسى ربك يصلح ماخرب=ماحد في الدنيا يساعد عالخراب
لما متى شف عاد فوق الناس رب=باينصف المظلوم من نقف الغراب
كل ماتركنا فصل قد ولى وهب=قلنا لهم صفحه جديده يا صحاب
وبعد عشر اعوام ذي قالوا غرب =جانا يذكرنا زمن ولى وغاب
وليش ما تميت في يوم النشب =خليت خلق الله والدنيا خراب
واليوم نبنى صرح شامخ ياعرب=لاجيالنا ذي باتجينا والشباب
وبانعمر ساس عاالفه وحب=من حوف للحوطه الى وادي نصاب
نبغى لهم تعليم في احياء وطب =ويعرفوا معنى الرقابه والحساب
وفي الثقافه يتحفونا والادب=وفي التجاره ايش معنى لكتساب
والختم صلوا عالنبي عالي النسب=المصطفى المختار واله والصحاب