معاناة زوجه

[بنت الساحل]

اما هذه فهي المعاناة الكبرى
معاناة زوجه ايضا للشاعر حسن عبدالله باحارثه

لمن أشتكي لمن أبكي ومن باينهي المنكر
أني زوجه وعندي زوج يتجاهل ويتنكّر
يفكّر بس في نفسه وفينا مابدا فكّر
يجي للبيت نصف الليل وبعض احيان يتأخر
وعمره مارجع للبيت قبل الساعه اثنعشر
وعمره ماسهر معنا وبرّع دايما يسهر
عياله نادرا يجلس معاهم صعب مايقدر
يجي في الليل متأخر ويصحى الساعه احدى عشر
وله بعد الغذاء غمضه ولاقد قام تو أدبر
معه شغله معه جلسه معه اعذار يتعذّر
يجيب اعذار مشبوهه تخلّي العقل يتحيّر
وهذي الاسطوانه غالب الاوقات تتكرر
وهو يسمر مع اصحابه وني في البيت اتحسّر
من التكنيس للتغسيل ثم الاكل يتحضّر
واتصارع مع الاولاد في المدخل وفي المندر
وحد يشتكي وحد يبكي وحد يسقط وحد يعثر
ولاقد ناموا الاولاد عندي الجو يتعكّر
لوحدي جالسه نصبي ونتحوّش ونتقهّر
من الشك والسهن والغيره الاعصاب تتوتّر
ويتغيّب علينا يوم أويومين أو اكثر
ولو نسأله عن غيبته يتنرفز ويتأثر
ويعلنها صراحه إن طبعي مابايتغيّر
بغيتوا ايش منّي أكلكم موجود وموفّر
ويحسب مالنا مطلب خلاف الرز والسكر
لنا عدّة مطالب لونسي مفروض يتذكّر
لنا جلسه مع الاولاد نتفاهم ونستفسر
ونعرف من هو المهمل ونعرف من هو الاشطر
نحسسهم حنان الاهل اصغرهم مع الاكبر
لنا جلسه موده في الظهيره او مع المسمر
لنا جلسات حلوه ريت يرجع أنسنا لي مر
أني لمّا متى عالزوج ذا ياناس اتصبّر
صبرت أكثر من اللآزم وفوق الصبر ذا مقدر
اقول السمع والطاعه وهو ينهي ويتأمّر
واستحمله مهما كان إن طوّل وإن قصّر
ولالي أي غرض طبعه بغيته بس يتغيّر
بغيته من مساري الليل يتنبّه ويتحذّر
ويعرف واجباته فبل كاس الود يتطيّر
ونرجع مثل ماكنا ويبقى غصننا أخضر
بعون الله نتعاون وكل العسر يتيسّر

:shudder: :no: :no:

[علي فدعق الهاشمي]

ياسلام ياسلام

من طول الغيبات جاب الغنايم

صح الله لسانك ولسان الشاعر

ابيات تشرح وضع مرير للزوجه

وين المتزوجين وين بومحمد الشحري ومجمل والبكري وبونمر نبغاهم يتفاعلون مع القصيده


دمتم بود

[شيخ القبايل.]

با حارثة ابدع في قصيدته .. وجابها في الطبق

ماشاء الله عليه


شكرا يا اخت بنت الساحل

[بنت الساحل]

والشكر لكم ايضا

[ولد مدوده]

صح الله لسانك ولسان الشاعر

[أبوعمر العمودي]

بعون الله نتعاون وكل العسر يتيسّرصح الله لسانك ولسان الشاعر موفق بإذن الله ... لك مني أجمل تحية .