حوار مع حنطبه

[القحص]

هنا في مساجلا الزامل دار بيني وبين اخي وصديقي الشاعر حنطبه الحوار التالي
ولرغبة حبيب وغالي حبيت اجمعه هنا في موضوع منفصل بلحاله
بدع حنطبه وقال

لامهمه ولاداعـي لخيـل الزناتـي =خيل عنتر يصل مشوارنا طين ساعه
قل لشيبوب لايرثي علي في حياتـي=بعد ماشاف بودقلين رافـع شراعـه

رد القحص وقال

خيل عنتر تعب من ركض لا ياغناتي=طاح فارسه من ظهره وكسرت ذراعه
مثل شيبوب له هبات تذهب وتاتـي =لوسلمنا هجومـه ماظمنّـا دفاعـه

حنطبه

صدق ماقلت لكن بايقصف نباتـي=لادحق ارض مافيها خلاف الزراعه
باصبر يوم ماغاثت علي في سناتي=قالوا الكنز للانسان رأس القناعـه

القحص

انت والله ذي صحيتنـي مـن سباتـي =والقناعه علـى ماقيـل كنـز ومناعـه
عادك اصبر شوي ياشهم واسمع وصاتي =والصبر كنزمثمن في سـواق البضاعـه

حنطبه

حضرمي خوك والصبر القوي من صفاتي=يعرفه من شرب من حسو يوم المجاعـه
عاد لي عرق في ذي مانسـى ذكرياتـي=بايجيني الدرك منهم رمـوز الشجاعـه

القحص

السعيده قناتـك والجزيـره قناتـي=شبت من ماتجيب التلفزه والاذاعه
باتركهم وبقعد في دعاي وصلاتـي=خير لي من رفاق البهلله والخجاعه

حنطبه

فوق ارضي اتكي يالمربعي عا عصاتي=سد عيني ومن خلفي وحولي سباعـه
وانت منهم ولاشي فرق ذاتك وذاتـي=واحده تعتبر في التضحيـه والنفاعـه

القحص

الحبق نكهته ماهو كما الكوجراتي=خل شاهيك لا يمصّرفه في قصاعه
لا تساهن درك من خابزين الشباتي=مالهم عالحمول البندري استطاعه

حنطبه

جات نقحه ولاهي قاضيه عانغاتـي=حصت منها وذي جنبي تقطع نخاعه
عاجهاتك حرس وترك عليً جهاتي=ماعلي منهم اهل القطل والمداعـه

القحص وهو بيت موجه في اخر الزامل للواقعي ولا رد عليه

منكـم يالمقـرّم جيـت دور نجاتـي=باقي الراس عاده مانسم من صداعه
منتظر اي فرصه لجل بجمع شتاتـي=قبل ماتنصروا خصمي علي في نزاعه

امل ان ينال رضاكم ولاتحرموني الردود ذا انا تعبت فيه اوي لاهنتو يالغالين