بين الامس واليوم

[سبع الليل]

سيرو على نهج الجدود الاولين=وتمسكو بالدين والسنه
لبسو ثياب العز سيروا مسترين=لاتلبسو البشت والزنه
انتو الاصل والفصل والمتطورين=انتو رجال العصر والزمنه
انتو الحضارم بالشرف متمسكين=فيكم شيوخ العلم والمهنه
يشهد لكم تاريخ من سابق سنين=بالسمعه الزينه وبالفطنه
وبالوفاء بالعهد والقول الرزين=وبالسلاء والبسط والقنه
وفي التحف كنتم روؤس المبدعين=وأحكامكم بالكيل والوزنه
كنتم أوائل عهدكم متقدمين=وبلادكم للنظارين فتنه
فيها الطراوه والنداء والاكسجين=صافي نقي مرسل من الجنه
خيرات فيها تفرح المتسوقين=أشياء تسر القلب وتهنه
ودينها تنفح بريح الياسمين=خضراء وحمراء غصانهامرنه
تشهد على هذا يساري ةاليمين=في شحرها وشبامها الدمنه
والقطن والمشقاص واطراف العنين=وغصيص ووادي عمد والجفنه
وسيؤن باتشهد ووادي بامتين=والعرض ووادي العين والدعنه
وسر مع يبهوض باتعكن عكين=بمياه من اعماقها مزنه
وتريم ارض الفقه والحصن الحصين=والنشر والدعوه بلا منه
من طيب خاطر باالامانه واليقين=نشروا علوم الدين والسنه
في افريقيا والمانيا والصين=صالوا وجالوا دافعوا عنه
هذه شيمنا هللو يامسلمين=وتناقدوا في وضعنا كنه
تغير هكذا من غير سين=ولعاد له حنه ولارنه
لكننا باقول نحن المهملين=ضعنا مع التربين والضمنه
ومع الاغاني ياجماعه والزفين=والقات لي كل البلاء منه
ولقبونا واللقب متخلفين=وعأيرونا عيار بوسنه
ياربنا سترك علينا يامعين=من سوقه الفجار والخونه