مــن عيون شعر الزّامــل

[سالم علي الجرو]

طالب باتيس النّعمــاني

حيابكم واثنـي تراحيبـي لكـم = مليون في مليون والزايد يزيـد
حيابكم ياهـل المعـزه والكـرم = ليلة لقانا تعتبـر جمعـه وعيـد
ياهل السقيفه وردوا من كل يـم = يالي تحبون المغانـي والقصيـد
حيوا زواملكم وعـادات اهلكـم = لا تنسوا الماضي مع العهد البعيد

ياهاجسي حلك من افكارك قسم=لهل السقيفه لي يحبون القصيد
رحب بسبع الليل لي صوته نهم=والصيعري لي هو معه رتبة عقيد
والجيد بن هاشم لطم بحره لطم=واتعالموا به ناس في ساحل ونيد
وابن الشبامي لي في الزامل قدم=رحب بكل الناس لي جوا من بعيد

ياهل السقيفه ياصلاب الروس=حيابكم مليون مره
عند الشبامي صاحب القاموس=لي قد نفح طيبه وعطره
مابين لمريكي وبين الروس=ابن العروبه ضاع قدره
صدام تمثاله صبح منكوس=والعلج لمريكي يجره

يامرحبا بالشاجع المغوار=لي يعرف البرعه على المثمون
يشكي من الحاظرعلى الشعار=مايعرف ان هذا زمن شارون
يوم العرب خافوا سلاح الجار=واستنجدوا بالكافر الملـ........
لرض العروبه جابوا الكفار=واستسلموا للوبي الصهيون
يهوين ياقهري على ماصار=كم من بطل شاجع رضي بالهون
وين العروبه عاد حد بايغار=يقدم وينشر سيفه المسنون
هذا كلامي لو قصر او جار=لبن الهلالي بعتذر مليون
شاعر وله في خاطري مقدار=واهل السقيفه قدرهم مايهون
شعارنا لاتشعلون النار=في جوف بوراضي كما المرشون
من قولكم دار الفلك بي دار=واصبحت في الشارع كما المجنون
ياريت في يدي مية طيار=بغزي بهم لما مدينة بون
بلقي كما رمزي مع المحظار=لي زوعوا العالم وكل الكون
واهل الميازر والرصاص الحار=بالثار ماشي عذر يستوفون
هذه بشاره وابشروا بالثار=باتجي بشاره من قدا سيئـون

يامرحبا من صدر التقرير=للناس قد صّدر قراره
من لا حسب للغش والتزوير=والله ضحى للبازراره
جساس شوا عينه براس الزير=والعار بايضوي لداره
جانا خبر من جبهة التحرير=منها اشتعل اول شراره
بغداد ياارض الرخاوالخير=صدام هتي لي خباره

من حب حد ل اقد ضوى للدار= يلقيه في التركه قسيمه
هذا كلامي معشر الحظار= شونا نبا قسمه سليمه
رعضوا وسقوا واصربوا لثمار= رحمه من المولى عظيمه
والعفو لا قولي كثر أو جار= ياهل القرارات الحكيمه
شوا ولد بن عوبث مسا محتار= قد له سنه نفسه سقيمه
والختم باصلي على المختار= لي جاب لايات الكريمه