أول قصيدة لي عساها تعجبكم

[محمد علي بازقامة]

بسم الله الرحمن الرحيم
الأخوة حلان سقيفة الأدب و الفن
السلام عليكم و رحمة الله و بركاته
هذي أول قصيدة لي في هذه السقيفة و في المنتديات عامة
أملي أن تنال اعجابكم و رضاكم و لكن لا تبخلوا علي بملاحظاتكم و انتقاداتكم لما فيها من المنفعة لي
و شكرا
و هاكم القصيدة

ياماضغين القات إيش الفائدة = من بايجاوبنا على هذا السؤال
إن كانها عدّي معاكم زايدة = لا تنفقوها غير في حاجة حلال
سوق البلا فيه المصايب واجدة = فيه المذلة والمهونة والسؤال
في السوق كم من نفس فوقه واردة = مثل الغنم تجتر فوقه والجمال
وين الرجولة والعقول الراشدة = لي يرخصون المال لأجله والعيال
الدين ضايع والعقائد فاسدة = للموت يدعونك وللصوعة تعال
كم وكم من بيت ناره خامدة = القات خلاها دواماً في اشتعال
غضبان والدهم وأما الوالدة = تدعي وتتضرع لإصلاح العيال
حتى المره طفشت وصبحت شاردة = باعوا ذهبها يوزنونه بالقفال
لي يحسب أن القات منه فائدة = خسران والله يا بداله بالبدال
أما السقارة عالمدخن شاهدة = يوم القيامة شاهده عاكل حال
تحرق فلوسك وإنته نفسك عامدة = والنار في كبدك تقطعها وصال
ما تدري إلا وانت جثة هامدة = ياصاحبي ممدود مابين الرجال
مضوى يقع لما الجنان الباردة = والاّ إلى النيران ياخسُّــه منال
من فاز بالجنة حياته خالدة = فيها جوائز ما يصدقها الخيال
الحور فيها عالأرائك قاعدة = فوق الأسرة عايمينك والشمال
عودوا خواني للطريق الجادة = بانجعل الحاضر من الماضي مثال
لا تتبعون أهل النفوس الحاسدة = أعمارهم تمضي على قيلاً وقال
هذه نصيحة والخطيِّة واردة = فينا الخطا وارد ولله الكمال
كل الأمم ثارت وأنتي راقدة = ياأمَّة الإسلام من قل الرجال؟
أجدادنا مثل النيار الواقدة = أبطال كانوا في ميادين القتال
أمجادهم ظلت عليهم شاهدة = أمثال حمزة والزبيري والبلال
صرنا غنيمة للجيوش الحاقدة = وتكسرت كل القواسم والقبال
صلوا على خير النفوس العابدة = يشفع لنا في يوم ما منه محال
والعفوا إن زلت ولا هي قاصدة = نفسي تحب الخير وتحب الحلال